കളമശ്ശേരി സെന്റ് മേരീസ് പള്ളി സുവർണ ജൂബിലി ആഘോഷങ്ങൾക്ക് സമാപനം സമാപന സമ്മേളനം മുഖ്യമന്ത്രി വി.ഡി. സതീശൻ ഉദ്ഘാടനം ചെയ്തു

കളമശ്ശേരി: അങ്കമാലി ഭദ്രാസനത്തിലെ കളമശ്ശേരി സെന്റ് മേരീസ് യാക്കോബായ സുറിയാനി പള്ളിയുടെ സുവർണ ജൂബിലി ആഘോഷങ്ങൾക്ക് സമാപനമായി. ഒക്ടോബർ 24 ശനിയാഴ്ച വൈകിട്ട് ഏഴിന് ദൈവാലയ അങ്കണത്തിൽ നടന്ന സമാപന സമ്മേളനം കേരള മുഖ്യമന്ത്രി വി.ഡി. സതീശൻ ഉദ്ഘാടനം ചെയ്തു.വൈകിട്ട് 5.45ന് സന്ധ്യാപ്രാർത്ഥനയോടെയാണ് ചടങ്ങുകൾക്ക് തുടക്കമായത്. തുടർന്ന് ദൈവാലയ ഗായകസംഘം പ്രാർത്ഥനാഗാനം ആലപിച്ചു. പൊതുസമ്മേളനത്തിൽ ഇടവക വികാരി ഫാ. ഏലിയാസ് പി. ജോർജ് പുത്തൻപുരയ്ക്കൽ സ്വാഗതം ആശംസിച്ചു. അങ്കമാലി മേഖലാധിപൻ അഭിവന്ദ്യ ഡോ. മാത്യൂസ് മോർ അന്തിമോസ് മെത്രാപ്പോലീത്ത അധ്യക്ഷത വഹിച്ചു.ശ്രേഷ്ഠ കാതോലിക്കായും മലങ്കര മെത്രാപ്പോലീത്തയുമായ ആബൂൻ മോർ ബസ്സേലിയോസ് ജോസഫ് ബാവ മുഖ്യപ്രഭാഷണം നടത്തി. സംസ്ഥാന മത്സ്യബന്ധന, സാമൂഹ്യനീതി വകുപ്പ് മന്ത്രി വി.ഇ. അബ്ദുൾ ഗഫൂർ, ഹൈബി ഈഡൻ എം.പി., കളമശ്ശേരി മുനിസിപ്പൽ ചെയർമാൻ ജമാൽ മണക്കാടൻ, വാർഡ് കൗൺസിലർ ഷഹനാ സാംജി, സഭാ സെക്രട്ടറി ജേക്കബ് സി. മാത്യു, മുൻ വികാരിമാരെ പ്രതിനിധീകരിച്ച് വന്ദ്യ സാജു ചെറുവിള്ളിൽ കോറെപ്പിസ്കോപ്പ, ഇടവകയിലെ വൈദികൻ ഫാ. എബി ബാബു എന്നിവർ ആശംസകൾ നേർന്നു.സുവർണ ജൂബിലിയോടനുബന്ധിച്ച് വനിതാ സമാജം സംഘടിപ്പിച്ച ബൈബിൾ ക്വിസ് മത്സരത്തിലെ വിജയികൾക്ക് സമ്മാനങ്ങൾ വിതരണം ചെയ്തു. ഇടവകയിൽ ശുശ്രൂഷ നിർവഹിച്ച മുൻ വികാരിമാർ, സ്ഥാപകാംഗങ്ങൾ, ദൈവാലയത്തിൽ മികച്ച സേവനം അനുഷ്ഠിച്ചവർ എന്നിവരെ ചടങ്ങിൽ ആദരിച്ചു. ഭാഗ്യസ്മരണാർഹനായ ശ്രേഷ്ഠ ബസ്സേലിയോസ് തോമസ് പ്രഥമൻ ബാവായുടെ രണ്ടാം ശ്രാദ്ധപ്പെരുന്നാളിനോടനുബന്ധിച്ച് പുറത്തിറക്കുന്ന സിഡിയുടെ പ്രകാശനവും നടന്നു.തുടർന്ന് സെന്റ് മേരീസ് യാക്കോബായ സിറിയൻ ക്രിസ്ത്യൻ ഫെലോഷിപ്പ് പ്രസിഡന്റ് സിബി കുര്യൻ ഇടവകയുടെ ചരിത്രം അവതരിപ്പിച്ചു. പള്ളി ട്രഷറർ റോണി വർഗീസ് നന്ദി അറിയിച്ചു. തുടർന്ന് വിവിധ കലാപരിപാടികൾ അരങ്ങേറി.ജൂബിലി ആഘോഷങ്ങളുടെ ഭാഗമായി ഒക്ടോബർ 25 ഞായറാഴ്ച രാവിലെ ഏഴിന് പ്രഭാതപ്രാർത്ഥനയും എട്ടിന് അഭിവന്ദ്യ ഡോ. മാത്യൂസ് മോർ അന്തിമോസ് മെത്രാപ്പോലീത്തയുടെ കാർമികത്വത്തിൽ വിശുദ്ധ കുർബാനയും നടന്നു.ഇടവക വികാരി ഫാ. ഏലിയാസ് പി. ജോർജ് പുത്തൻപുരയ്ക്കൽ, പ്രസിഡന്റ് സിബി കുര്യൻ, സെക്രട്ടറി പി.പി. ഫിലിപ്പ്, ട്രഷറർ റോണി വർഗീസ്, ഭരണസമിതി അംഗങ്ങൾ എന്നിവർ പരിപാടികൾക്ക് നേതൃത്വം നൽകി.

Comments (0)

Related Stories