മൂറോൻ കൂദാശ നവംബർ 13ന്; മൂന്നു ദിവസത്തെ ഉപവാസത്തിന് ആഹ്വാനം; ശ്രെഷ്ഠ കത്തോലിക്കാ ബാവായുടെ P 15/2026 കല്പന

പുത്തൻകുരിശ്: വിശുദ്ധ മൂറോൻ കൂദാശയ്ക്കു മുന്നോടിയായി നവംബർ 10, 11, 12 തീയതികളിൽ വിശ്വാസികൾ ഉപവാസം ആചരിക്കണമെന്ന് ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസ്സേലിയോസ് ജോസഫ് ബാവ ആഹ്വാനം ചെയ്തു. സഭാംഗങ്ങളുടെ പ്രാർഥനാപൂർവമായ പങ്കാളിത്തം ഉറപ്പാക്കണമെന്നും പൊതുകല്പനയിൽ നിർദേശിച്ചു.പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവായുടെ മുഖ്യ കാർമികത്വത്തിൽ നവംബർ 13 വെള്ളിയാഴ്ച പുത്തൻകുരിശ് സഭാ ആസ്ഥാനത്തെ മോർ അത്തനാസിയോസ് കത്തീഡ്രലിലാണ് മൂറോൻ കൂദാശ നടക്കുക. വിശുദ്ധ കുർബാനയ്ക്കും കൂദാശയ്ക്കും ശേഷം ഉച്ചകഴിഞ്ഞ് രണ്ടിന് യാക്കോബായ സുറിയാനി ക്രിസ്ത്യാനി അസോസിയേഷനും അനുബന്ധ പൊതുസമ്മേളനവും നടക്കും.നവംബർ 14ന് മുളന്തുരുത്തി മർത്തോമൻ കത്തീഡ്രലിൽ പരിശുദ്ധ പാത്രിയർക്കീസ് ബാവായുടെ അധ്യക്ഷതയിൽ എപ്പിസ്കോപ്പൽ സുന്നഹദോസും സഭാ വർക്കിങ് കമ്മിറ്റി–മാനേജിങ് കമ്മിറ്റി യോഗവും ചേരും. പരിശുദ്ധ ഗീവർഗീസ് മോർ ഗ്രിഗോറിയോസ് തിരുമേനിയുടെ 125ാം ഓർമപ്പെരുന്നാളിന്റെ ഒരു വർഷം നീളുന്ന ആചരണവും പരിശുദ്ധ ബാവ ഉദ്ഘാടനം ചെയ്യും. ആചരണം 2027 നവംബറിൽ സമാപിക്കും.നവംബർ 13, 14 തീയതികളിലെ ഇടവകപ്പെരുന്നാളുകളും മറ്റു പരിപാടികളും മാറ്റിവച്ച് സഭാതല പരിപാടികളിൽ പങ്കെടുക്കണമെന്ന് കല്പനയിൽ അഭ്യർഥിച്ചു. പരിപാടികളുടെ നടത്തിപ്പിനായി ഓരോ കുടുംബത്തിൽനിന്നും കുറഞ്ഞത് 500 രൂപ വീതം ഇടവകകളിലൂടെ സമാഹരിച്ച് ഒക്ടോബർ 31ന് മുമ്പ് സഭാ ആസ്ഥാനത്ത് എത്തിക്കണമെന്നും നിർദേശിച്ചിട്ടുണ്ട്.

Comments (0)

Related Stories