മണ്ണിന്റെ കാവലാൾക്ക് വിട; ചെറുവയൽ രാമന് അന്തിമോപചാരമർപ്പിച്ച് മോർ സ്തേഫാനോസ് ഗീവർഗീസ് മെത്രാപ്പോലീത്ത

വയനാട്: പരമ്പരാഗത നെൽവിത്തുകളുടെ സംരക്ഷണത്തിലൂടെ ദേശീയ ശ്രദ്ധ നേടിയ പത്മശ്രീ ചെറുവയൽ രാമന് മലബാർ ഭദ്രാസനാധിപൻ അഭിവന്ദ്യ ഡോ. മോർ സ്തേഫാനോസ് ഗീവർഗീസ് മെത്രാപ്പോലീത്ത അന്തിമോപചാരം അർപ്പിച്ചു. മണ്ണിനെയും വിത്തിനെയും പ്രകൃതിയെയും ചേർത്തുപിടിച്ച അദ്ദേഹത്തിന്റെ ജീവിതം വരുംതലമുറകൾക്ക് പ്രചോദനമായിരിക്കുമെന്ന് മെത്രാപ്പോലീത്ത അനുസ്മരിച്ചു.മണ്ണും വിത്തും കച്ചവടച്ചരക്കുകളല്ലെന്നും വരുംതലമുറയ്ക്കുള്ള കരുതലാണെന്നും ജീവിതത്തിലൂടെ പഠിപ്പിച്ച കർഷകനായിരുന്നു ചെറുവയൽ രാമനെന്ന് മെത്രാപ്പോലീത്ത പറഞ്ഞു. പാരമ്പര്യകൃഷിയുടെ പാഠശാലയായും മണ്ണറിവിന്റെ മഹാപുസ്തകമായും മാറിയ അദ്ദേഹത്തിന്റെ ജീവിതം പ്രകൃതിസംരക്ഷണത്തിന്റെ മഹത്തായ സന്ദേശമാണ് പകർന്നുനൽകുന്നത്. കാർഷിക പൈതൃകം കാത്തുസൂക്ഷിച്ച അപൂർവ വ്യക്തിത്വത്തെയാണ് കേരളത്തിന് നഷ്ടമായതെന്നും അദ്ദേഹം അനുസ്മരിച്ചു.വയനാട് മാനന്തവാടി കമ്മന സ്വദേശിയായ ചെറുവയൽ രാമൻ, അന്യംനിന്നുപോകുമായിരുന്ന നിരവധി പരമ്പരാഗത നെൽവിത്തിനങ്ങൾ സംരക്ഷിച്ചാണ് ശ്രദ്ധേയനായത്. വയനാടിന്റെ ‘നെല്ലച്ഛൻ’ എന്നറിയപ്പെട്ട അദ്ദേഹം രാസവളങ്ങളും കീടനാശിനികളും ഒഴിവാക്കി പ്രകൃതിയോടിണങ്ങിയ കൃഷിരീതികൾ പിന്തുടർന്നു. പാരമ്പര്യ കാർഷിക അറിവുകൾ പുതുതലമുറയ്ക്ക് പകർന്നുനൽകുന്നതിലും സജീവമായിരുന്നു.വിത്തുകളെ വിൽപ്പനച്ചരക്കായി കാണാതെ മറ്റു കർഷകർക്ക് കൈമാറുന്നതായിരുന്നു അദ്ദേഹത്തിന്റെ രീതി. അടുത്ത കൃഷിക്കാലത്ത് തത്തുല്യമായ അളവിൽ വിത്ത് തിരികെ നൽകണമെന്ന വ്യവസ്ഥയിലൂടെ വിത്തുസംരക്ഷണത്തിന്റെയും പങ്കുവയ്ക്കലിന്റെയും മാതൃക സൃഷ്ടിച്ചു. കാർഷിക മേഖലയ്ക്കും ജൈവവൈവിധ്യ സംരക്ഷണത്തിനും നൽകിയ സംഭാവനകൾ പരിഗണിച്ച് 2023ൽ രാജ്യം അദ്ദേഹത്തെ പത്മശ്രീ നൽകി ആദരിച്ചു.കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലിരിക്കെയാണ് ചെറുവയൽ രാമൻ അന്തരിച്ചത്. മാനന്തവാടി കമ്മന നവോദയം എൽ.പി. സ്കൂളിൽ പൊതുദർശനത്തിനു വച്ച ഭൗതികശരീരത്തിൽ നൂറുകണക്കിനാളുകൾ അന്ത്യാഞ്ജലി അർപ്പിച്ചു.കൊടുമലയിലെ കുറിച്യ സമുദായ ശ്മശാനത്തിൽ സംസ്ഥാന സർക്കാരിന്റെ ഔദ്യോഗിക ബഹുമതികളോടെ സംസ്കാരം നടന്നു. പൊലീസ് ഗാർഡ് ഓഫ് ഓണറും നൽകി.

Comments (0)

Related Stories