ഓസ്ട്രിയൻ–സ്വിസ് പ്രതിനിധിസംഘത്തെ സ്വീകരിച്ച് പരിശുദ്ധ പാത്രിയർക്കീസ് ബാവ

ഡമാസ്കസ്: ഓസ്ട്രിയൻ ആഭ്യന്തര മന്ത്രാലയത്തിലെയും സ്വിസ് സർക്കാർ സ്ഥാപനങ്ങളിലെയും പ്രതിനിധികളുമായി പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവ കൂടിക്കാഴ്ച നടത്തി. ഒക്ടോബർ 16 വെള്ളിയാഴ്ച രാവിലെ ഡമാസ്കസിലെ ബാബ് തൂമയിലുള്ള പാത്രിയർക്കാ ആസ്ഥാനത്തായിരുന്നു കൂടിക്കാഴ്ച.ഓസ്ട്രിയൻ ആഭ്യന്തര മന്ത്രാലയത്തിലെ മധ്യപൂർവദേശ വികസന മേധാവി മോണിക്ക സ്പോട്ടലിന്റെ നേതൃത്വത്തിലുള്ള സംഘത്തെയാണ് പരിശുദ്ധ ബാവ സ്വീകരിച്ചത്. സ്വിസ് ഫെഡറൽ നീതിന്യായ–പോലീസ് വകുപ്പിലെ മധ്യപൂർവദേശ കാര്യ വിശകലന വിദഗ്ധ അന്ന ഡീം, ഡമാസ്കസിലെ സ്വിസ് സഹകരണ കാര്യാലയത്തിന്റെ പ്രോഗ്രാം ഡയറക്ടർ മുർഹഫ് അബ്സി, ഡമാസ്കസിലെ ഓസ്ട്രിയൻ എംബസിയുടെ ചുമതല വഹിക്കുന്ന ക്രിസ്റ്റോഫ് വൈഡിംഗർ എന്നിവരും സംഘത്തിലുണ്ടായിരുന്നു.പ്രതിനിധികളെ സ്വാഗതം ചെയ്ത പരിശുദ്ധ പാത്രിയർക്കീസ് ബാവ സിറിയയിലെ നിലവിലെ സാഹചര്യങ്ങൾ അവരുമായി ചർച്ച ചെയ്തു. സിറിയൻ ജനതയെ സഹായിക്കുന്നതിനും അവർക്ക് പ്രത്യാശ നൽകുന്നതിനുമുള്ള ക്രിയാത്മക സംരംഭങ്ങളെ പരിശുദ്ധ ബാവ സ്വാഗതം ചെയ്തു.പാത്രിയർക്കൽ അസിസ്റ്റന്റ് അഭിവന്ദ്യ മോർ ജോസഫ് ബാലി മെത്രാപ്പോലീത്ത, പാത്രിയർക്കൽ സെക്രട്ടറി അഭിവന്ദ്യ മോർ ഔഗീൻ അൽഖൂറി നെമത്ത് മെത്രാപ്പോലീത്ത, മോർ അഫ്രേം സുറിയാനി പാത്രിയർക്കൽ വികസന സ്ഥാപനമായ ഇ.പി.ഡി.സി.യുടെ എക്സിക്യൂട്ടീവ് ഡയറക്ടർ എൻജിനീയർ ഹിഷാം സാദ് എന്നിവരും കൂടിക്കാഴ്ചയിൽ പങ്കെടുത്തു.

Comments (0)

Related Stories