നാല് പതിറ്റാണ്ടിനുശേഷം പൂർവിക ഗ്രാമത്തിലേക്ക് മടങ്ങി സുറിയാനി ക്രൈസ്തവർ

തുർ അബ്ദിൻ: ഏകദേശം നാല് പതിറ്റാണ്ടിനുശേഷം പൂർവിക ഗ്രാമത്തിൽ തിരിച്ചെത്തി വിശ്വാസത്തിന്റെയും പൈതൃകത്തിന്റെയും സ്മരണകൾ പുതുക്കി സുറിയാനി ക്രൈസ്തവ കുടുംബങ്ങൾ. തുർക്കിയിലെ ഷിർനാക് പ്രവിശ്യയിലുള്ള ജിനറ്റ് ഗ്രാമത്തിലെ ചരിത്രപ്രസിദ്ധമായ സുറിയാനി ഓർത്തഡോക്സ് ദെറൂനാ ആശ്രമത്തിൽ നടന്ന മോർ ഗീവർഗീസ് സഹദായുടെ പെരുന്നാളിലാണ് കുടുംബങ്ങൾ ഒത്തുചേർന്നത്.ബെൽജിയം, ഫ്രാൻസ്, ജർമ്മനി എന്നീ രാജ്യങ്ങളിൽനിന്നെത്തിയ കുടുംബങ്ങൾ പ്രദേശവാസികൾക്കൊപ്പം പെരുന്നാൾ ആഘോഷങ്ങളിൽ പങ്കെടുത്തു. വിശുദ്ധ കുർബാനയും പ്രത്യേക പ്രാർഥനകളും നടന്നു. പൂർവികരുടെ സ്മരണ പുതുക്കി ഗ്രാമത്തിലെ സെമിത്തേരിയിലും പ്രാർഥനകൾ അർപ്പിച്ചു.പതിറ്റാണ്ടുകളുടെ ഇടവേളയ്ക്കുശേഷം പൂർവികരുടെ മണ്ണിൽ ഒത്തുചേരാനായത് കുടുംബങ്ങൾക്കും സമൂഹാംഗങ്ങൾക്കും വൈകാരിക അനുഭവമായി. തങ്ങളുടെ വേരുകളിലേക്കുള്ള മടക്കയാത്ര, വിശ്വാസവും പാരമ്പര്യവും പുതുതലമുറയുമായി പങ്കുവയ്ക്കാനും സമൂഹാംഗങ്ങൾ തമ്മിലുള്ള ബന്ധം പുതുക്കാനും അവസരമൊരുക്കി.സുറിയാനി ക്രൈസ്തവ പാരമ്പര്യത്തിന്റെ ചരിത്രപ്രധാന കേന്ദ്രങ്ങളിലൊന്നായ തുർ അബ്ദിൻ മേഖലയിലാണ് ജിനറ്റ് ഗ്രാമം സ്ഥിതിചെയ്യുന്നത്. പ്രവാസത്തിന്റെയും കുടിയൊഴിപ്പിക്കലിന്റെയും പ്രതിസന്ധികൾക്കിടയിലും ആത്മീയവും സാംസ്കാരികവുമായ പൈതൃകത്തോടുള്ള സമൂഹത്തിന്റെ അടുപ്പം പ്രകടമാക്കുന്നതായി ഈ പെരുന്നാൾ സംഗമം.

Comments (0)

Related Stories