മുൻ സഭാ സെക്രട്ടറി കമാണ്ടർ ഡോ. രാജൻ സ്കറിയ നിര്യാതനായി; സംസ്കാരം നാളെ

കൊച്ചി: മലങ്കര യാക്കോബായ സുറിയാനി സഭയുടെ മുൻ സെക്രട്ടറി ബാർ ഈത്തോ മഹൈമ്നോ കമാണ്ടർ ഡോ. രാജൻ സ്കറിയയുടെ സംസ്കാരം നാളെ, ഒക്ടോബർ 13ന് നടക്കും. ഭവനത്തിലെ ശുശ്രൂഷകൾ ഉച്ചകഴിഞ്ഞ് മൂന്നിന് ആരംഭിക്കും. തുടർന്ന് വൈകിട്ട് നാലിന് കൊച്ചി ഭദ്രാസനത്തിലെ ഇളംകുളം സെന്റ് മേരീസ് സൂനോറോ യാക്കോബായ കത്തീഡ്രൽ പള്ളിയിൽ ശുശ്രൂഷകൾ നടക്കും. ഇതിനു ശേഷം പള്ളി സെമിത്തേരിയിൽ കബറടക്കം നടത്തും.സഭയുടെ നിർണായക പ്രതിസന്ധിഘട്ടങ്ങളിൽ നേതൃത്വരംഗത്ത് സജീവമായിരുന്ന വ്യക്തിത്വമായിരുന്നു കമാണ്ടർ ഡോ. രാജൻ സ്കറിയ. ശ്രേഷ്ഠ കാതോലിക്കാ ബാവായോടൊപ്പം പ്രവർത്തിച്ച് സഭയുടെ വളർച്ചയ്ക്കും പുരോഗതിക്കും അദ്ദേഹം നിർണായക സംഭാവനകൾ നൽകി.ഡൽഹിയിൽ സഭയുടെ വക്താവെന്ന നിലയിലും ശ്രദ്ധേയമായ പ്രവർത്തനങ്ങൾ കാഴ്ചവെച്ചു. ഭരണ, നിയമ, രാഷ്ട്രീയ നേതൃത്വങ്ങളുമായി സഭയുടെ ബന്ധങ്ങൾ സ്ഥാപിക്കുന്നതിനും സഭയുടെ നിലപാടുകളും ആവശ്യങ്ങളും അധികാരകേന്ദ്രങ്ങളിൽ എത്തിക്കുന്നതിനും അദ്ദേഹം നേതൃത്വം നൽകി.അദ്ദേഹത്തിന്റെ നിര്യാണത്തിൽ ശ്രേഷ്ഠ കാതോലിക്കാ ആബൂൻ മോർ ബസേലിയോസ് ജോസഫ് ബാവായും സഭാ ഭാരവാഹികളും സഭാ സമിതികളും അനുശോചനം രേഖപ്പെടുത്തി. പരേതന്റെ ആത്മശാന്തിക്കായി പ്രാർത്ഥിക്കുന്നതായും ദുഃഖാർത്തരായ കുടുംബാംഗങ്ങളുടെ ദുഃഖത്തിൽ പങ്കുചേരുന്നതായും സഭ അനുശോചന സന്ദേശത്തിൽ അറിയിച്ചു.ഡൽഹി ഭദ്രാസനാധിപൻ അഭിവന്ദ്യ മോർ യൗസേബിയോസ് കുര്യാക്കോസ് മെത്രാപ്പോലീത്ത അദ്ദേഹത്തിന്റെ ഭവനത്തിലെത്തി അനുശോചനം രേഖപ്പെടുത്തി.

Comments (0)

Related Stories