കന്നി 20 പെരുന്നാൾ: കോതമംഗലത്തേക്ക് തീർഥാടക പ്രവാഹം; ബാവായുടെ കബറിങ്കൽ വിശ്വാസിസഹസ്രങ്ങൾ

കോതമംഗലം ● മാർ തോമാ ചെറിയപള്ളിയിൽ ചരിത്രപ്രസിദ്ധമായ കന്നി 20 പെരുന്നാളിനോടനുബന്ധിച്ച് പരിശുദ്ധ യൽദോ മോർ ബസേലിയോസ് ബാവായുടെ കബറിങ്കലേക്ക് തീർഥാടകരുടെ പ്രവാഹം. ഇന്നലെ രാവിലെ മുതൽ വിവിധ വഴികളിലൂടെ കാൽനടയായി എത്തിയ തീർഥാടകരാൽ നഗരവീഥികൾ നിറഞ്ഞു. നാട്ടുകാരും വിവിധ സംഘടനകളും വഴിയരികിൽ പാനീയങ്ങളും ലഘുഭക്ഷണവും ഒരുക്കി തീർഥാടകരെ വരവേറ്റു. വൈകിട്ടോടെ പെയ്ത മഴയെ വകവയ്ക്കാതെ പള്ളിയും പരിസരവും നഗരവും വിശ്വാസികളാൽ തിങ്ങിനിറഞ്ഞു. ഹൈറേഞ്ച് മേഖലയിൽ നിന്നുള്ള തീർഥാടകർക്ക് കോഴിപ്പിള്ളി ജംക്ഷനിലും പടിഞ്ഞാറൻ മേഖലയിൽ നിന്നുള്ളവർക്ക് മൂവാറ്റുപുഴ ജംക്ഷനിലും വടക്കൻ മേഖലയിൽ നിന്നുള്ളവർക്ക് ഹൈറേഞ്ച് ജംക്ഷനിലും പോത്താനിക്കാട് മേഖലയിൽ നിന്നുള്ളവർക്ക് ചക്കാലക്കുടി ചാപ്പലിലും സ്വീകരണം നൽകി. ഡീൻ കുര്യാക്കോസ് എം.പി, ഷിബു തെക്കുംപുറം എം.എൽ.എ, നഗരസഭാധ്യക്ഷ ഭാനുമതി രാജു, ബ്ലോക്ക് പഞ്ചായത്ത് പ്രസിഡന്റ് ജെസി സാജു, മറ്റു ജനപ്രതിനിധികൾ, വൈദികർ, പള്ളി ഭരണസമിതി അംഗങ്ങൾ തുടങ്ങിയവർ സ്വീകരണത്തിന് നേതൃത്വം നൽകി. തീർഥാടകർക്കായി പള്ളിയിൽ നേർച്ചക്കഞ്ഞിയും ഒരുക്കിയിരുന്നു. പെരുന്നാളിന്റെ എട്ടാം ദിനമായ ഇന്നലെ നടന്ന മൂന്നിന്മേൽ കുർബാനയിൽ ഡോ. മോർ അന്തിമോസ് മാത്യൂസ് മെത്രാപ്പോലീത്ത മുഖ്യ കാർമികനായി. മേമ്പൂട്ടിൽ നിന്ന് പള്ളി ഉപകരണങ്ങൾ പള്ളിയകത്ത് എത്തിച്ചു. സന്ധ്യാനമസ്കാരത്തിന് ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് ബാവ നേതൃത്വം നൽകി. സഭയിലെ മെത്രാപ്പോലീത്തമാർ സംബന്ധിച്ചു. തുടർന്ന് 151 പൊൻ-വെള്ളിക്കുരിശുകളുടെ അകമ്പടിയോടെ വി. മർത്തമറിയം കത്തീഡ്രൽ (വലിയപള്ളി), സെന്റ് ജോർജ് കത്തീഡ്രൽ, മലയിൻകീഴ് കുരിശ്, എം.ബി.എം.എം ആശുപത്രി, ടൗൺ കുരിശ്, മാർ ബേസിൽ സ്കൂൾ റോഡ് എന്നിവിടങ്ങളിലൂടെ നഗരം ചുറ്റി പ്രദക്ഷിണം നടന്നു. ഇന്ന് (ശനി) രാവിലെ 5-ന് പ്രഭാതനമസ്കാരവും 5.30-ന് വിശുദ്ധ കുർബാനയും നടന്നു. ഡോ. മോർ സേവേറിയോസ് എബ്രഹാം വലിയ മെത്രാപ്പോലീത്ത കുർബാനയ്ക്ക് കാർമികത്വം വഹിച്ചു. 7-ന് നടക്കുന്ന കുർബാനയ്ക്ക് ഡോ. മോർ തിമോത്തിയോസ് തോമസ് മെത്രാപ്പോലീത്തയും, 8.30-ന് നടക്കുന്ന കുർബാനയ്ക്കും പ്രസംഗത്തിനും ശ്രേഷ്ഠ കാതോലിക്കാ ആബൂൻ മോർ ബസേലിയോസ് ജോസഫ് ബാവയും കാർമികത്വം വഹിക്കും. 10.30-ന് നേർച്ചസദ്യയും തുടർന്ന്, യൽദോ മോർ ബസേലിയോസ് ബാവായുടെ പാദസ്പർശനത്താൽ അനുഗ്രഹീതമായ ചക്കാലക്കുടി ചാപ്പലിലേക്ക് പ്രദക്ഷിണവും നടക്കും. വൈകിട്ട് 5-ന് പള്ളി ഉപകരണങ്ങൾ തിരികെ മേമ്പൂട്ടിലേക്ക് കൊണ്ടുപോകും. 6-ന് സന്ധ്യാനമസ്കാരത്തോടെ ഇന്നത്തെ ചടങ്ങുകൾ സമാപിക്കും. നാളെ (ഒക്ടോബർ 4, ഞായർ) രാവിലെ 6.30-ന് ഏലിയാസ് മോർ അത്താനാസിയോസ് മെത്രാപ്പോലീത്തയും 8.15-ന് മാത്യൂസ് മോർ അഫ്രേം മെത്രാപ്പോലീത്തയും വിശുദ്ധ കുർബാനയ്ക്ക് കാർമികത്വം വഹിക്കും. രാവിലെ 10 മണിയോടെ ഗജവീരന്മാർ ബാവായുടെ കബറിടം വണങ്ങാനെത്തും. വൈകിട്ട് 4-ന് പരിശുദ്ധ യൽദോ മോർ ബസേലിയോസ് ബാവായുടെ 341-ാം ഓർമ്മപ്പെരുന്നാളിന്റെ കൊടിയിറങ്ങും. ഈ മാസം 11 വരെ ദീപാലങ്കാരങ്ങൾ ഉണ്ടായിരിക്കും. പെരുന്നാൾ ക്രമീകരണങ്ങൾക്ക് വികാരി ഫാ. സാജു ജോർജ് കുരിക്കപ്പിള്ളിൽ, സഹവികാരിമാർ, തന്നാണ്ട് ട്രസ്റ്റിമാരായ ബേബി പാറേക്കര, ബിനോയ് മണ്ണഞ്ചേരി, വർക്കിംഗ് കമ്മിറ്റി, മാനേജിംഗ് കമ്മിറ്റി അംഗങ്ങൾ എന്നിവർ നേതൃത്വം നൽകി.

Comments (0)

Related Stories