ഓറിയന്റൽ ഓർത്തഡോക്സ് സഭകളുടെ പ്രസിഡന്റായി മോർ തീത്തോസ് യൽദോ മെത്രാപ്പോലീത്ത

അമേരിക്ക: സ്റ്റാൻഡിങ് കോൺഫറൻസ് ഓഫ് ഓറിയന്റൽ ഓർത്തഡോക്സ് ചർച്ചസിന്റെ (SCOOCH) അടുത്ത മൂന്ന് വർഷത്തേക്കുള്ള പ്രസിഡന്റായി മലങ്കര യാക്കോബായ സുറിയാനി സഭയുടെ അമേരിക്കൻ മലങ്കര അതിഭദ്രാസന മെത്രാപ്പോലീത്തയും പാത്രിയർക്കൽ വികാരിയുമായ അഭിവന്ദ്യ മോർ തീത്തോസ് യൽദോ മെത്രാപ്പോലീത്തയെ തെരഞ്ഞെടുത്തു. സെപ്റ്റംബർ 15ന് ന്യൂയോർക്കിലെ വെസ്റ്റ് പാർക്കിലുള്ള സെന്റ് മേരി ആൻഡ് പോപ്പ് സെന്റ് കിറില്ലോസ് ആറാമൻ മൊണാസ്റ്ററി ആൻഡ് റിട്രീറ്റ് സെന്ററിൽ ചേർന്ന SCOOCH അംഗസഭകളുടെ മേലധ്യക്ഷന്മാരുടെ യോഗത്തിലാണ് തിരഞ്ഞെടുപ്പ് നടന്നത്. കോപ്റ്റിക് ഓർത്തഡോക്സ് സഭയുടെ ന്യൂയോർക്ക്, ന്യൂ ഇംഗ്ലണ്ട് രൂപതാധ്യക്ഷൻ എച്ച്.ജി. ബിഷപ്പ് ഡേവിഡിന്റെ ആതിഥേയത്വത്തിലായിരുന്നു യോഗം. വിവിധ ഓറിയന്റൽ ഓർത്തഡോക്സ് സഭകളുടെ മേലധ്യക്ഷന്മാർ യോഗത്തിൽ പങ്കെടുത്തു. കൂടാതെ വിവിധ സഭകളിലെ വൈദികരും ശെമ്മാശന്മാരും യോഗത്തിൽ സംബന്ധിച്ചു. വിശ്വാസാചാരാനുഷ്ഠാനങ്ങളിലും ആരാധനാക്രമങ്ങളിലും ഓർത്തഡോക്സ് വിശ്വാസത്തിന്റെ സംരക്ഷണത്തിലും സമാനമായ പാരമ്പര്യം പുലർത്തുന്ന സഭകൾക്ക് പരസ്പരം സഹകരിക്കാനും കൂട്ടായ പ്രവർത്തനങ്ങൾ സംഘടിപ്പിക്കാനും അവസരമൊരുക്കുക എന്ന ലക്ഷ്യത്തോടെയാണ് സ്റ്റാൻഡിങ് കോൺഫറൻസ് ഓഫ് ഓറിയന്റൽ ഓർത്തഡോക്സ് ചർച്ചസ് പ്രവർത്തിക്കുന്നത്. 1973ൽ വടക്കേ അമേരിക്കയിൽ പ്രവർത്തനം ആരംഭിച്ച ഈ കൂട്ടായ്മ വിവിധ ഓറിയന്റൽ ഓർത്തഡോക്സ് സഭകളെ ഒരുമിച്ച് കൊണ്ടുവരുന്ന വേദിയാണ്. സഭകളുടെ ഐക്യം ശക്തിപ്പെടുത്തുന്നതിനും ആത്മീയ പരിപോഷണത്തിനും ഉന്നമനത്തിനും യുവജനങ്ങളുടെ ക്ഷേമത്തിനും പ്രാധാന്യം നൽകുന്ന വിവിധ പ്രവർത്തനങ്ങൾ SCOOCH മുഖേന നടപ്പാക്കിവരുന്നു. അമേരിക്കയിലെ വിവിധ സഭകളിൽപ്പെട്ട യുവജനങ്ങളുടെ ഓർത്തഡോക്സ് വിശ്വാസജീവിതം പരിപോഷിപ്പിക്കുന്നതിനും ആത്മീയ ഉന്നമനത്തിനും സഭയ്ക്കും സമൂഹത്തിനും പ്രയോജനകരമായ സൽപ്രവർത്തനങ്ങളിൽ ഏർപ്പെടുന്നതിനും പ്രചോദനം നൽകുന്നതിനായി കൂട്ടായ ബലിയർപ്പണം, റിട്രീറ്റുകൾ, പഠന ക്ലാസുകൾ തുടങ്ങിയ പരിപാടികളും സംഘടിപ്പിക്കുന്നുണ്ട്. യോഗത്തിൽ അടുത്ത കാലയളവിൽ അമേരിക്കയിലെ വിവിധ ഭാഗങ്ങളിൽ SCOOCHയുടെ ആഭിമുഖ്യത്തിൽ നടത്തേണ്ട പരിപാടികളും അവയുടെ നടത്തിപ്പുമായി ബന്ധപ്പെട്ട കാര്യങ്ങളും വിശദമായി ചർച്ച ചെയ്തു. കോളജ് കാമ്പസുകളിലെ ഓർത്തഡോക്സ് ക്രിസ്ത്യൻ കൂട്ടായ്മകൾ (OCCM) കൂടുതൽ ശക്തിപ്പെടുത്തുന്നതിനുള്ള പ്രവർത്തനങ്ങളെക്കുറിച്ചും യോഗം ചർച്ച ചെയ്തു. റോമൻ കത്തോലിക്കാ സഭയുമായി നടത്തിവരുന്ന വാർഷിക ചർച്ചകളും വിവിധ ഓർത്തഡോക്സ് സഭകൾ തമ്മിലുള്ള സഹകരണവും യോഗത്തിന്റെ പരിഗണനാവിഷയങ്ങളായി. വിവിധ സഭകൾ തമ്മിലുള്ള ആശയവിനിമയവും സഹകരണവും കൂടുതൽ ശക്തിപ്പെടുത്തുന്നതിനുള്ള പ്രവർത്തനങ്ങൾ മുന്നോട്ടുകൊണ്ടുപോകാനും തീരുമാനിച്ചു. ഈ വർഷത്തെ സംയുക്ത ബലി നവംബർ ഏഴിന് ന്യൂജേഴ്സിയിലെ മോർ ഗബ്രിയേൽ സിറിയൻ ദൈവാലയത്തിൽ നടത്താനും യോഗം തീരുമാനിച്ചു. വിവിധ ഓറിയന്റൽ ഓർത്തഡോക്സ് സഭകളിലെ മെത്രാപ്പോലീത്തമാരുടെ നേതൃത്വത്തിലായിരിക്കും സംയുക്ത ബലി. കാലാവധി പൂർത്തിയാക്കിയ മുൻ പ്രസിഡന്റ് എച്ച്.ജി. ബിഷപ്പ് ഡേവിഡിന്റെ നേതൃത്വത്തിനും സേവനങ്ങൾക്കും യോഗം നന്ദിയും അഭിനന്ദനവും രേഖപ്പെടുത്തി. പുതിയ പ്രസിഡന്റായി ചുമതലയേൽക്കുന്ന അഭിവന്ദ്യ മോർ തീത്തോസ് യൽദോ മെത്രാപ്പോലീത്തയുടെ നേതൃത്വത്തിൽ SCOOCHയുടെ സഭൈക്യ, ആത്മീയ, യുവജനക്ഷേമ പ്രവർത്തനങ്ങൾ കൂടുതൽ ഏകോപിതമായി മുന്നോട്ടുകൊണ്ടുപോകുന്നതിനുള്ള പദ്ധതികളും യോഗത്തിൽ ചർച്ച ചെയ്തു.

Comments (0)

Related Stories