പരിശുദ്ധ പാത്രിയർക്കീസ് ബാവയുടെ അധ്യക്ഷതയിൽ വിശുദ്ധ സുന്നഹദോസ് ഓൺലൈൻ യോഗം

ദമാസ്കസ്: പരിശുദ്ധ സുറിയാനി ഓർത്തഡോക്സ് സഭയുടെ വിശുദ്ധ സുന്നഹദോസ് ഓൺലൈൻ യോഗം സെപ്റ്റംബർ 15ന് പരിശുദ്ധ പാത്രിയർക്കീസ് മോർ ഇഗ്നാത്തിയോസ് അഫ്രേം ദ്വിതീയൻ ബാവയുടെ അധ്യക്ഷതയിൽ ചേർന്നു. സഭയുടെ വിവിധ ആഗോള മേഖലകളുമായി ബന്ധപ്പെട്ട വിഷയങ്ങൾ യോഗത്തിൽ വിശദമായി ചർച്ച ചെയ്തു. പ്രാർഥനയോടെയാണ് പരിശുദ്ധ പാത്രിയർക്കീസ് ബാവ യോഗത്തിന് തുടക്കം കുറിച്ചത്. തുടർന്ന് സഭയുടെ വിവിധ ഇടവകകളും ഭദ്രാസനങ്ങളും ലോകത്തിന്റെ വിവിധ ഭാഗങ്ങളിലെ സഭാ പ്രവർത്തനങ്ങളുമായി ബന്ധപ്പെട്ട വിഷയങ്ങളിൽ പാത്രിയർക്കീസ് ബാവയും സുന്നഹദോസ് സെക്രട്ടേറിയറ്റിലെ മെത്രാപ്പോലീത്തമാരും ആശയവിനിമയം നടത്തി. സുന്നഹദോസ് അംഗങ്ങളായ സഹ്ലേ–ബേക്കാ പാത്രിയർക്കൽ വികാരി മോർ യുസ്തീനോസ് പോളോസ് സഫർ, ജർമനിയിലെ പാത്രിയർക്കൽ വികാരി മോർ ഫീലക്സിനോസ് മത്തിയാസ് നയിസ്, അമേരിക്കൻ ഐക്യനാടുകളുടെ കിഴക്കൻ അതിഭദ്രാസനത്തിലെ പാത്രിയർക്കൽ വികാരി മോർ ദിയോണീസിയോസ് യോഹന്നാൻ കാവക്, മൊസൂൾ–കിർക്കുക്ക്–കുർദിസ്ഥാൻ അതിഭദ്രാസനാധിപൻ മോർ നിക്കോദിമോസ് ദാവൂദ് ഷറഫ്, ഹോംസ്–ഹമാ–താർത്തൂസ് അതിഭദ്രാസനാധിപൻ മോർ തിമോത്തിയോസ് മത്താ അൽഖൂരി, പാത്രിയർക്കൽ അസിസ്റ്റന്റ് മോർ യൂസഫ് ബലി, പാത്രിയർക്കൽ സെക്രട്ടറി മോർ ഔഗീൻ അൽഖൂരി നെയ്മത് എന്നിവർ യോഗത്തിൽ പങ്കെടുത്തു. സഭയുടെ വിവിധ പ്രദേശങ്ങളിലെ നിലവിലെ സാഹചര്യങ്ങൾ, സഭാ പ്രവർത്തനങ്ങൾ, വിവിധ ഭദ്രാസനങ്ങളുമായി ബന്ധപ്പെട്ട കാര്യങ്ങൾ എന്നിവ ഉൾപ്പെടെയുള്ള വിഷയങ്ങളാണ് യോഗത്തിൽ പരിഗണിച്ചത്. ലോകത്തിന്റെ വിവിധ ഭാഗങ്ങളിലുള്ള സുറിയാനി ഓർത്തഡോക്സ് സഭാ സമൂഹങ്ങളുടെ ആവശ്യങ്ങളും പ്രവർത്തനങ്ങളും ഏകോപിപ്പിക്കുന്നതിന്റെ ഭാഗമായി സുന്നഹദോസ് തലത്തിൽ നടന്ന പ്രധാനപ്പെട്ട കൂടിയാലോചന കൂടിയായിരുന്നു യോഗം. പരിശുദ്ധ പാത്രിയർക്കീസ് ബാവയുടെ അധ്യക്ഷതയിൽ നടന്ന സുന്നഹദോസ് വിവിധ വിഷയങ്ങളിൽ അഭിപ്രായങ്ങളും നിർദേശങ്ങളും പങ്കുവച്ചു.

Comments (0)

Related Stories