കാരുണ്യ പുരസ്‌കാരം കലയപുരം ജോസിന്; സമ്മാനിച്ചത് ചാണ്ടി ഉമ്മൻ എം.എൽ.എ

നല്ലില (കൊല്ലം): അശരണർക്കും ആലംബഹീനർക്കും തെരുവിലാക്കപ്പെട്ട മാനസികരോഗികൾക്കും ഉപേക്ഷിക്കപ്പെട്ട മാതാപിതാക്കൾക്കും കുട്ടികൾക്കും അത്താണിയായി പ്രവർത്തിക്കുന്ന ആശ്രയ സങ്കേതം ഡയറക്ടർ കലയപുരം ജോസിന് ഫാ. റ്റി. സി. മാത്യൂസ് കോർ എപ്പിസ്കോപ്പ സ്മാരക കാരുണ്യ പുരസ്കാരം 2026 സമ്മാനിച്ചു. ക്യാഷ് അവാർഡും ഫലകവും അടങ്ങുന്നതാണ് പുരസ്കാരം. നീണ്ട 52 വർഷക്കാലം നല്ലില സെന്റ് ജോർജ് യാക്കോബായ സുറിയാനി പള്ളിയുടെ വികാരിയായും സഭാ മാനേജിങ് കമ്മിറ്റി അംഗമായും ഭദ്രാസന കൗൺസിൽ അംഗമായും പ്രവർത്തിച്ച വന്ദ്യ ഫാ. റ്റി. സി. മാത്യൂസ് കോർ എപ്പിസ്കോപ്പയുടെ സ്മരണാർഥമാണ് പുരസ്കാരം ഏർപ്പെടുത്തിയിരിക്കുന്നത്. നല്ലില പൗരസമിതി പ്രസിഡന്റ്, നല്ലില വൈ.എം.സി.എ. രക്ഷാധികാരി എന്നീ നിലകളിലും പ്രവർത്തിച്ച അദ്ദേഹം നാടിന്റെ വിവിധ വികസന പ്രവർത്തനങ്ങൾക്ക് നേതൃത്വം നൽകിയിരുന്നു. വെള്ളിയാഴ്ച രാവിലെ 9.30ന് നല്ലില സെന്റ് ജോർജ് യാക്കോബായ സുറിയാനി പള്ളിയിൽ നടന്ന ചടങ്ങ് കൊല്ലം ഭദ്രാസനാധിപൻ അഭിവന്ദ്യ മോർ തേവോദോസിയോസ് മാത്യൂസ് മെത്രാപ്പോലീത്ത ഉദ്ഘാടനം ചെയ്തു. വന്ദ്യ ഫാ. റ്റി. സി. മാത്യൂസ് കോർ എപ്പിസ്കോപ്പയുമായി അടുത്ത ബന്ധം പുലർത്തിയിരുന്ന മുൻ മുഖ്യമന്ത്രി ഉമ്മൻചാണ്ടിയുടെ മകൻ ചാണ്ടി ഉമ്മൻ എം.എൽ.എ പുരസ്കാരം സമ്മാനിച്ചു. അശരണർക്കും സമൂഹത്തിന്റെ വിവിധ തലങ്ങളിൽ പിന്തള്ളപ്പെട്ടവർക്കുമായി കലയപുരം ജോസ് നടത്തുന്ന സേവന പ്രവർത്തനങ്ങളെ ചടങ്ങിൽ അനുസ്മരിച്ചു. കാരുണ്യവും സാമൂഹിക പ്രതിബദ്ധതയും മുൻനിർത്തിയുള്ള അദ്ദേഹത്തിന്റെ പ്രവർത്തനങ്ങൾക്കുള്ള അംഗീകാരമായാണ് പുരസ്കാരം വിലയിരുത്തപ്പെടുന്നത്. നെടുമ്പന ഗ്രാമപഞ്ചായത്ത് പ്രസിഡന്റ് ബീന നാസിമുദ്ദീൻ ലബ്ബ, മുഖത്തല ബ്ലോക്ക് പഞ്ചായത്ത് അംഗം ലാവണ്യ സജീവ്, വാർഡ് മെമ്പർ ജേക്കബ് മാത്യു എന്നിവർ ചടങ്ങിൽ സന്നിഹിതരായിരുന്നു. നല്ലില സെന്റ് ജോർജ് പള്ളി വികാരി ഫാ. റ്റി. വി. പുന്നൂസ് തരകൻ, സെക്രട്ടറി വൈ. ജോയിക്കുട്ടി കാഞ്ഞിരംവിള, ട്രസ്റ്റി അജി റ്റി. എബ്രഹാം കല്ലുവിള എന്നിവർ ചടങ്ങിന് നേതൃത്വം നൽകി.

Comments (0)

Related Stories