റവ. ഫാ. വി.വി. അന്ത്രയോസ് വലിയ ഉപ്പുട്ടിൽ കശ്ശീശയുടെ സംസ്കാര ശുശ്രൂഷകൾ നാളെ

കുറുപ്പംപടി: മലങ്കര യാക്കോബായ സുറിയാനി സഭ അങ്കമാലി ഭദ്രാസനത്തിലെ സീനിയർ വൈദികനും ഐമുറി സെന്റ് മേരീസ് യാക്കോബായ സുറിയാനി ചാപ്പൽ വികാരിയുമായ റവ. ഫാ. വി.വി. അന്ത്രയോസ് വലിയ ഉപ്പുട്ടിൽ കശ്ശീശയുടെ സംസ്കാര ശുശ്രൂഷകൾ സെപ്റ്റംബർ 10, 11 തീയതികളിലായി നടക്കും. ഇന്ന് (സെപ്റ്റംബർ 10) വൈകിട്ട് 4 മണിക്ക് ഭവനത്തിൽ വച്ച് ശുശ്രൂഷകൾ ആരംഭിച്ചു. തുടർന്ന് വൈകിട്ട് 5 മണിക്ക് ഒന്നാം ശുശ്രൂഷയും 6.30ന് സന്ധ്യാപ്രാർത്ഥനയും വൈകിട്ട് 7 മണിക്ക് രണ്ടും മൂന്നും ശുശ്രൂഷകളും നടത്തപ്പെടും. നാളെ (സെപ്റ്റംബർ 11) രാവിലെ 9 മണിക്ക് അഭിവന്ദ്യ മോർ അഫ്രേം മാത്യൂസ് മെത്രാപ്പോലീത്ത ഭവനത്തിലെത്തി നാലും അഞ്ചും ശുശ്രൂഷകൾക്ക് നേതൃത്വം നൽകും. തുടർന്ന് രാവിലെ 10.30ന് ഐമുറി സെന്റ് മേരീസ് ചാപ്പലിൽ ആറാം ശുശ്രൂഷ നടക്കും. ഉച്ചയ്ക്ക് 12 മണിയോടെ അച്ചന്റെ മാതൃ ഇടവകയായ പെരുമ്പാവൂർ ബഥേൽ സുലോക്കോ കത്തീഡ്രലിൽ ഭൗതികശരീരം പൊതുദർശനത്തിനായി വയ്ക്കും. ഇവിടെ ഏഴാം ഘട്ട ശുശ്രൂഷകളും നടക്കും. തുടർന്ന് ഉച്ചയ്ക്ക് 1 മണിയോടെ ഭൗതികശരീരം വിലാപയാത്രയായി തുരുത്തിപ്ലി മോർ തോമൻ ചെറിയ പള്ളിയിലേക്ക് കൊണ്ടുപോകും. അവിടെ എട്ടാം ശുശ്രൂഷകൾ പൂർത്തിയാക്കിയ ശേഷം കബറടക്കം നടത്തും. പിറവം ചെന്നമ്പിള്ളിൽ കുടുംബാംഗം ബസ്ക്യോമോ ആലീസാണ് ഭാര്യ. ഡീക്കൺ എലിയാസ് ഏകമകനാണ്. കണ്ണൂർ കേളകം സെന്റ് തോമസ് ഹയർ സെക്കൻഡറി സ്കൂളിൽ അധ്യാപകനാണ് ഡീക്കൺ എലിയാസ്. വൈദിക ശുശ്രൂഷയുടെ ദീർഘകാല യാത്രയിൽ വിവിധ ഇടവകകളിലും ചാപ്പലുകളിലും അച്ചൻ സ്തുത്യർഹമായ സേവനം അനുഷ്ഠിച്ചു. പെരുമ്പാവൂർ ബഥേൽ സുലോക്കോ കത്തീഡ്രൽ, കുറുപ്പംപടി സെന്റ് മേരീസ് കത്തീഡ്രൽ, കോഴിച്ചാൽ സെന്റ് ജോർജ്, എഡേസ സെന്റ് തോമസ്, മലമ്പുഴ സെന്റ് ജോർജ്, പെരുവ സെന്റ് ജോർജ്, മീനങ്ങാടി സെന്റ് മേരീസ്, പൂവത്തിങ്കാട് സെന്റ് ജോർജ്, മറയൂർ സെന്റ് ജോർജ്, മുരിക്കാശ്ശേരി സെന്റ് ജോർജ് പള്ളികൾ എന്നിവിടങ്ങളിലും ചൂരമുടി സെന്റ് ജോർജ്, വലിയപാറ സെന്റ് ഗ്രിഗോറിയോസ്, തിരുവിലാംകുന്ന് സെന്റ് ജോർജ്, പീച്ചാനിക്കാട് സെന്റ് ജോർജ്, ഈസ്റ്റ് ഐമുറി സെന്റ് മേരീസ് ചാപ്പൽ എന്നിവിടങ്ങളിലും അച്ചൻ ശുശ്രൂഷ നിർവഹിച്ചു. സഭയ്ക്കും വിശ്വാസസമൂഹത്തിനുമായി ദീർഘകാലം വൈദിക ശുശ്രൂഷ നിർവഹിച്ച അച്ചന്റെ വേർപാടിൽ വിശ്വാസസമൂഹം ദുഃഖം രേഖപ്പെടുത്തി. കബറടക്ക ശുശ്രൂഷകൾക്ക് അഭിവന്ദ്യ മോർ അഫ്രേം മാത്യൂസ് മെത്രാപ്പോലീത്ത നേതൃത്വം നൽകും.

Comments (0)

Related Stories