അങ്കമാലി ഭദ്രാസനത്തിലെ സീനിയർ വൈദികൻ റവ. ഫാ. വി.വി. അന്ത്രയോസ് വലിയ ഉപ്പുട്ടിൽ കശ്ശീശ കർത്താവിൽ നിദ്രപ്രാപിച്ചു

കുറുപ്പംപടി: മലങ്കര യാക്കോബായ സുറിയാനി സഭ അങ്കമാലി ഭദ്രാസനം പെരുമ്പാവൂർ മേഖല സീനിയർ വൈദികനും ഐമുറി സെന്റ് മേരീസ് യാക്കോബായ സുറിയാനി ചാപ്പൽ വികാരിയുമായ റവ. ഫാ. വി.വി. അന്ത്രയോസ് വലിയ ഉപ്പുട്ടിൽ കശ്ശീശ കർത്താവിൽ നിദ്രപ്രാപിച്ചു. 2026 സെപ്റ്റംബർ 10 വ്യാഴാഴ്ച പുലർച്ചെയായിരുന്നു അന്ത്യം. പൗരസ്ത്യ സുവിശേഷ സമാജത്തിന്റെ മുൻ മാനേജിംഗ് കമ്മിറ്റി അംഗമായും സെന്റ് തോമസ് ഓർഫനേജ്, പാഴൂർ എ.ജി.സി.എം. കരുണാലയം വൃദ്ധമന്ദിരം എന്നിവയുടെ മുൻ പ്രസിഡന്റായും അച്ചൻ സേവനമനുഷ്ഠിച്ചിട്ടുണ്ട്. സമാജം വലിയപാറ മാർ ഗ്രീഗോറിയോസ് ചാപ്പൽ വികാരിയായും അച്ചൻ ശുശ്രൂഷ ചെയ്തിട്ടുണ്ട്. അച്ചന്റെ ഭൗതികശരീരം അങ്കമാലി ലിറ്റിൽ ഫ്ലവർ ആശുപത്രിയിൽ സൂക്ഷിച്ചിരിക്കുകയാണ്. സെപ്റ്റംബർ 10 വ്യാഴാഴ്ച വൈകുന്നേരം നാലിന് കുറുപ്പംപടി ഐമുറിയിലുള്ള സ്വവസതിയിൽ ഭൗതികശരീരം എത്തിക്കും. തുടർന്ന് വൈകിട്ട് 5 മണിക്ക് ഒന്നാം ശുശ്രൂഷയും 6.30ന് സന്ധ്യാപ്രാർത്ഥനയും വൈകിട്ട് 7 മണിക്ക് രണ്ടും മൂന്നും ശുശ്രൂഷകളും നടത്തപ്പെടും. നാളെ (സെപ്റ്റംബർ 11) രാവിലെ 9 മണിക്ക് അഭിവന്ദ്യ മോർ അഫ്രേം മാത്യൂസ് മെത്രാപ്പോലീത്ത ഭവനത്തിലെത്തി നാലും അഞ്ചും ശുശ്രൂഷകൾക്ക് നേതൃത്വം നൽകും. തുടർന്ന് രാവിലെ 10.30ന് ഐമുറി സെന്റ് മേരീസ് ചാപ്പലിൽ ആറാം ശുശ്രൂഷ നടക്കും. ഉച്ചയ്ക്ക് 12 മണിയോടെ അച്ചന്റെ മാതൃ ഇടവകയായ പെരുമ്പാവൂർ ബഥേൽ സുലോക്കോ കത്തീഡ്രലിൽ ഭൗതികശരീരം പൊതുദർശനത്തിനായി വയ്ക്കും. ഇവിടെ ഏഴാം ഘട്ട ശുശ്രൂഷകളും നടക്കും. തുടർന്ന് ഉച്ചയ്ക്ക് 1 മണിയോടെ ഭൗതികശരീരം വിലാപയാത്രയായി തുരുത്തിപ്ലി മോർ തോമൻ ചെറിയ പള്ളിയിലേക്ക് കൊണ്ടുപോകും. അവിടെ എട്ടാം ശുശ്രൂഷകൾ പൂർത്തിയാക്കിയ ശേഷം കബറടക്കം നടത്തും. പിറവം ചെന്നമ്പിള്ളിൽ കുടുംബാംഗം ബസ്ക്യോമോ ആലീസാണ് ഭാര്യ. ഡീക്കൺ എലിയാസ് ഏകമകനാണ്. കണ്ണൂർ കേളകം സെന്റ് തോമസ് ഹയർ സെക്കൻഡറി സ്കൂളിൽ അധ്യാപകനാണ് ഡീക്കൺ എലിയാസ്. പുണ്യശ്ലോകനായ കടവിൽ മോർ അത്താനാസിയോസ് പൗലോസ് തിരുമേനിയുടെ തൃക്കരങ്ങളാൽ 1977 മാർച്ച് 16നാണ് റവ. ഫാ. വി.വി. അന്ത്രയോസ് വലിയ ഉപ്പുട്ടിൽ കശ്ശീശ പട്ടമേറ്റത്.അച്ചന്റെ ആത്മാവിന് നിത്യശാന്തി ലഭിക്കട്ടെയെന്നും ദുഃഖിതരായ കുടുംബാംഗങ്ങൾക്ക് ദൈവം ആശ്വാസം നൽകട്ടെയെന്നും പ്രാർഥിക്കുന്നു. “ആചാര്യേശാ മിശിഹാ കൂദാശകളർപ്പിച്ചോ- രാചാര്യന്മാർക്കേകുക പുണ്യം നാഥാ സ്തോത്രം.”

Comments (0)

Related Stories