എട്ടുനോമ്പിന്റെ പുണ്യത്തിൽ വൈദികർക്ക് സ്‌നേഹക്കൂടൊരുക്കാൻ മണർകാട് കത്തീഡ്രൽ; ഭവന പദ്ധതിക്ക് 10 ലക്ഷം രൂപ

മണർകാട്: എട്ടുനോമ്പ് പെരുന്നാളിന്റെ ആത്മീയ പുണ്യത്തിൽ കാരുണ്യത്തിന്റെ കൈത്താങ്ങുമായി മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രൽ. യാക്കോബായ സുറിയാനി സഭയിലെ വൈദികർക്കായി നടപ്പാക്കിവരുന്ന ഭവന പദ്ധതിയിലേക്ക് 10 ലക്ഷം രൂപയുടെ സഹായം നൽകി മണർകാട് കത്തീഡ്രൽ സമൂഹം പദ്ധതിയുടെ ഭാഗമായി. കത്തീഡ്രലിന്റെ കീഴിൽ കഴിഞ്ഞ പതിറ്റാണ്ടുകളായി പ്രവർത്തിച്ചുവരുന്ന വിശുദ്ധ മർത്തമറിയം സേവകാസംഘത്തിന്റെ നേതൃത്വത്തിലാണ് സഹായം നൽകിയത്. ഈ വർഷത്തെ ഭവന പദ്ധതിയിൽ ഉൾപ്പെടുത്തിയാണ് 10 ലക്ഷം രൂപയുടെ ചെക്ക് ശ്രേഷ്ഠ കാതോലിക്കായും മലങ്കര മെത്രാപ്പോലീത്തയുമായ ആബൂൻ മോർ ബസേലിയോസ് ജോസഫ് ബാവയ്ക്ക് കൈമാറിയത്. സേവകാസംഘം പ്രസിഡന്റ് റവ. ഫാ. ലിറ്റു ജേക്കബ് തണ്ടാശേരിൽ സംഘത്തിന് വേണ്ടി ചെക്ക് കൈമാറി. ജീവിതം മുഴുവൻ സഭയ്ക്കും വിശ്വാസിസമൂഹത്തിനുമായി സമർപ്പിച്ച വൈദികർക്ക് സ്വന്തമായി ഒരു ഭവനം എന്ന സ്വപ്നം യാഥാർഥ്യമാക്കുന്നതിനായി സഭ നടപ്പാക്കുന്ന ഭവന പദ്ധതിക്ക് മണർകാട് കത്തീഡ്രലിന്റെ ഈ സഹായം കരുത്തേകും. വൈദികരുടെ ജീവിതസാഹചര്യങ്ങളിൽ കരുതലും പിന്തുണയും ഉറപ്പാക്കുന്നതിനുള്ള സഭയുടെ സാമൂഹിക പ്രതിബദ്ധതയുടെ ഭാഗമായാണ് പദ്ധതി മുന്നോട്ടുപോകുന്നത്. മണർകാട് കത്തീഡ്രലിന്റെ സാമൂഹിക സേവന പ്രവർത്തനങ്ങളിൽ ശ്രദ്ധേയമായ പങ്കുവഹിക്കുന്ന സംഘടനയാണ് വിശുദ്ധ മർത്തമറിയം സേവകാസംഘം. വർഷംതോറും രണ്ട് കോടിയിലധികം രൂപയുടെ വിവിധ ജീവകാരുണ്യ പ്രവർത്തനങ്ങൾ നടത്തിവരുന്നതായാണ് സംഘത്തിന്റെ പ്രവർത്തനങ്ങൾ വ്യക്തമാക്കുന്നത്. സാധുജന സേവനം, കാരുണ്യ പ്രവർത്തനങ്ങൾ തുടങ്ങിയ മേഖലകളിൽ തുടർച്ചയായി ഇടപെടുന്ന സേവകാസംഘം എട്ടുനോമ്പ് പെരുന്നാളിന്റെ പുണ്യകാലത്തും സമൂഹത്തിന് മാതൃകയായ പ്രവർത്തനമാണ് ഏറ്റെടുത്തിരിക്കുന്നത്.

Comments (0)

Related Stories