എട്ടുനോമ്പ് പെരുന്നാളിന്റെ ഭക്തിനിറവിൽ മണർകാട് കത്തീഡ്രലിൽ മെറിറ്റ് ഡേയും വയോജന ആദരവും; കർദിനാൾ ക്ലീമീസ് ബാവായെ ആദരിച്ചു

മണർകാട്: നാനാജാതി വിശ്വാസികൾക്ക് ആത്മീയവും മാനസികവുമായ സംതൃപ്തി പകരുന്ന ഇടമാണ് മണർകാട് മർത്തമറിയം യാക്കോബായ സുറിയാനി കത്തീഡ്രലെന്ന് കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ പറഞ്ഞു. എട്ടുനോമ്പ് പെരുന്നാളിന്റെ നാലാം ദിനത്തോടനുബന്ധിച്ച് കത്തീഡ്രലിൽ നടന്ന മെറിറ്റ് ഡേ, വയോജന ആദരം, അനുമോദന സമ്മേളനം എന്നിവ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പെരുന്നാളിന്റെ നാലാം ദിനമായ സെപ്റ്റംബർ നാലിനാണ് ചടങ്ങുകൾ നടന്നത്. നാടിന്റെ വേദനകളും പ്രയാസങ്ങളും ദൈവസന്നിധിയിൽ ഇറക്കിവയ്ക്കുന്നതിനുള്ള ഇടമായി ദൈവാലയങ്ങൾ മാറിയിട്ടുണ്ടെന്ന് തിരുവഞ്ചൂർ രാധാകൃഷ്ണൻ പറഞ്ഞു. മണർകാട് പള്ളിയിൽ എത്തുന്നവർ പ്രാർഥനയിലൂടെയും വിശ്വാസത്തിലൂടെയും പരിപൂർണമായ സംതൃപ്തിയോടെയാണ് മടങ്ങുന്നതെന്നും അദ്ദേഹം കൂട്ടിച്ചേർത്തു. കോട്ടയം ഭദ്രാസനാധിപൻ ഡോ. തോമസ് മോർ തീമോത്തിയോസ് മെത്രാപ്പോലീത്ത അധ്യക്ഷത വഹിച്ചു. മെത്രാഭിഷേകത്തിന്റെ രജതജൂബിലി ആഘോഷിക്കുന്ന സീറോ മലങ്കര സുറിയാനി കത്തോലിക്കാ സഭയുടെ മേജർ ആർച്ച് ബിഷപ്പും കാതോലിക്കാ ബാവായുമായ കർദിനാൾ മോർ ബസേലിയോസ് ക്ലീമീസിനെ മണർകാട് കത്തീഡ്രൽ ഇടവകയുടെ നേതൃത്വത്തിൽ ആദരിച്ചു. കർദിനാൾ ക്ലീമീസ് ബാവാ ചടങ്ങിൽ മുഖ്യപ്രഭാഷണം നടത്തി. മണർകാട് കത്തീഡ്രലിന്റെ ആത്മീയവും സാമൂഹികവുമായ പ്രവർത്തനങ്ങളിൽ നിർണായക പങ്കുവഹിച്ചുവരുന്ന മുതിർന്ന തലമുറയോടുള്ള ആദരസൂചകമായി 80 വയസ്സ് പൂർത്തിയായ മാതാപിതാക്കളെയും ചടങ്ങിൽ ആദരിച്ചു. മൂവാറ്റുപുഴ എം.എൽ.എ മാത്യു കുഴൽനാടൻ ആദരം നിർവഹിച്ചു. ഇടവകയുടെ അഭിമാനമായ മുതിർന്ന മാതാപിതാക്കളെ ആദരിക്കുന്ന ചടങ്ങ് വിശ്വാസസമൂഹത്തിൽ കുടുംബബന്ധങ്ങളുടെയും തലമുറകളോടുള്ള ആദരവിന്റെയും പ്രാധാന്യം ഉയർത്തിക്കാട്ടുന്നതായി. വിദ്യാഭ്യാസരംഗത്ത് ഉന്നത വിജയം നേടിയ വിദ്യാർഥികളെയും ചടങ്ങിൽ ആദരിച്ചു. കോട്ടയം ആർ.ഡി.ഒ നിജു കുര്യൻ വിജയികളായ വിദ്യാർഥികൾക്ക് ഉപഹാരങ്ങളും ക്യാഷ് അവാർഡുകളും വിതരണം ചെയ്തു. മണർകാട് കത്തീഡ്രൽ സൺഡേ സ്കൂളിന്റെ ശതാബ്ദി ആഘോഷങ്ങളുടെ ഭാഗമായി തയ്യാറാക്കിയ ശതാബ്ദി സുവനീർ കോഴിക്കോട് ഭദ്രാസനാധിപൻ പൗലോസ് മോർ ഐറേനിയോസ് മെത്രാപ്പോലീത്ത പ്രകാശനം ചെയ്തു. സൺഡേ സ്കൂളിന്റെ നൂറുവർഷത്തെ വിശ്വാസ-വിദ്യാഭ്യാസ ശുശ്രൂഷകളുടെ ഓർമകളും പ്രവർത്തനങ്ങളും രേഖപ്പെടുത്തുന്ന പ്രസിദ്ധീകരണമാണിത്. അഖില മലങ്കര യാക്കോബായ സുറിയാനി സഭാ യൂത്ത് അസോസിയേഷൻ വൈസ് പ്രസിഡന്റായി തിരഞ്ഞെടുക്കപ്പെട്ട റവ. ഫാ. കുര്യൻ മാത്യു വടക്കേപറമ്പിൽ, എം.ജെ.എസ്.എസ്.എ അഖില മലങ്കര സെക്രട്ടറിയായി തിരഞ്ഞെടുക്കപ്പെട്ട അവിനേഷ് എബ്രഹാം തണ്ടാശേരിൽ എന്നിവരെയും ചടങ്ങിൽ ആദരിച്ചു. മണർകാട് ഗ്രാമപഞ്ചായത്ത് വൈസ് പ്രസിഡന്റ് കെ.കെ. തോമസ് കുന്നേൽ, ജില്ലാ പഞ്ചായത്ത് അംഗം ഗ്രേസി കരിമ്പന്നൂർ എന്നിവർ ആശംസകൾ നേർന്നു. പ്രോഗ്രാം കോഓർഡിനേറ്റർ റവ. ഫാ. ലിറ്റു ജേക്കബ് തണ്ടാശേരിൽ സ്വാഗതം ആശംസിച്ചു. കത്തീഡ്രൽ ട്രസ്റ്റി പി.എ. സക്കറിയാച്ചൻ പള്ളത്ത് കൃതജ്ഞത രേഖപ്പെടുത്തി.

Comments (0)

Related Stories