ഷമ്മർ ഗോത്രത്തലവൻ ഷെയ്ഖ് മാനെ ഹുമൈദി അൽ-ദഹാം അൽ-ജർബ പരിശുദ്ധ പാത്രിയർക്കീസ് ബാവയെ സന്ദർശിച്ചു

ദമസ്കസ് (സിറിയ) ● സിറിയയിലെ പ്രമുഖ അറബ് ഗോത്രങ്ങളിലൊന്നായ ഷമ്മർ ഗോത്രത്തിന്റെ പരമാധികാരി ഷെയ്ഖ് മാനെ ഹുമൈദി അൽ-ദഹാം അൽ-ജർബ ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷനും അന്ത്യോഖ്യാ സിംഹാസനാധിപതിയുമായ പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവയെ സന്ദർശിച്ച് കൂടിക്കാഴ്ച നടത്തി. ഓഗസ്റ്റ് 31-ന് ദമസ്കസിലെ ബാബ് തോമയിലുള്ള പാത്രിയർക്കൽ ആസ്ഥാനത്തായിരുന്നു കൂടിക്കാഴ്ച. ഷെയ്ഖ് മാനെ അൽ-ദഹാമിന്റെ നേതൃത്വത്തിലുള്ള പ്രതിനിധി സംഘവുമായി നടത്തിയ കൂടിക്കാഴ്ചയിൽ സിറിയയിലെ നിലവിലെ സാഹചര്യങ്ങൾ വിശദമായി ചർച്ച ചെയ്തു. രാജ്യത്ത് സമാധാനവും സാമൂഹിക ഐക്യവും നിലനിർത്തുന്നതിന്റെയും വിവിധ ചരിത്രപരമായ സമൂഹങ്ങൾക്കിടയിൽ പരസ്പര ബഹുമാനവും സഹവർത്തിത്വവും ശക്തിപ്പെടുത്തുന്നതിന്റെയും പ്രാധാന്യം പരിശുദ്ധ പാത്രിയർക്കീസ് ബാവയും ഷെയ്ഖ് മാനെ അൽ-ദഹാമും ചർച്ചയിൽ ഊന്നിപ്പറഞ്ഞു. സിറിയയുടെ സാമൂഹിക ഘടനയിൽ വിവിധ സമൂഹങ്ങൾ തമ്മിലുള്ള സമാധാനപരമായ സഹവർത്തിത്വം ഉറപ്പാക്കേണ്ടതിന്റെ ആവശ്യകതയും, പരസ്പര വിശ്വാസവും സൗഹൃദവും കൂടുതൽ ശക്തിപ്പെടുത്തുന്നതിലൂടെ രാജ്യത്തിന്റെ സമാധാനത്തിനും സ്ഥിരതയ്ക്കും സംഭാവന നൽകാനാകുമെന്ന ആശയവും കൂടിക്കാഴ്ചയിൽ പങ്കുവെച്ചു. ഇതോടൊപ്പം, ചരിത്രത്തിലുടനീളം സുറിയാനി സഭയും പ്രദേശത്തെ വിവിധ സമൂഹങ്ങളും തമ്മിൽ നിലനിന്നിരുന്ന സൗഹൃദപരവും സവിശേഷവുമായ ബന്ധങ്ങളും കൂടിക്കാഴ്ചയിൽ അനുസ്മരിച്ചു. സഭയും സമൂഹങ്ങളും തമ്മിലുള്ള പരസ്പര സഹകരണവും ആശയവിനിമയവും കൂടുതൽ ശക്തിപ്പെടുത്തേണ്ടതിന്റെ പ്രാധാന്യവും ചർച്ചയായി. കൂടിക്കാഴ്ചയിൽ ഹോംസ്, ഹമാ, താർത്തൂസ് പ്രദേശങ്ങളുടെ മെത്രാപ്പോലീത്ത മോർ തിമോത്തിയോസ് മത്താ അൽ ഖൂരി, പാത്രിയർക്കൽ അസിസ്റ്റന്റ് മോർ യൗസഫ് ബാലി, യുവജനകാര്യ-ക്രൈസ്തവ വിദ്യാഭ്യാസ വിഭാഗങ്ങളുടെ പാത്രിയർക്കൽ വികാരി മോർ അന്ത്രയോസ് ബാഹി, പാത്രിയർക്കൽ സെക്രട്ടറി മോർ ഓഗീൻ അൽ ഖൂരി നെയ്മത്, ജഡ്ജി ആദിൽ സഹ്ദോ എന്നിവരും സന്നിഹിതരായിരുന്നു.

Comments (0)

Related Stories