ജറുസലേമിൽ പരിശുദ്ധ ദൈവമാതാവിന്റെ സ്വർഗാരോഹണ പെരുന്നാൾ ആഘോഷിച്ചു

ജറുസലേം ● പൗരസ്ത്യ കലണ്ടർ പ്രകാരമുള്ള പരിശുദ്ധ ദൈവമാതാവിന്റെ സ്വർഗാരോഹണ പെരുന്നാൾ ജറുസലേമിലെ സുറിയാനി ഓർത്തഡോക്സ് സഭയിൽ ഭക്തിനിർഭരമായി ആഘോഷിച്ചു. വൈദികരും സന്ന്യാസികളും ശെമ്മാശന്മാരും വിശ്വാസികളും പങ്കെടുത്ത പെരുന്നാൾ ശുശ്രൂഷകൾ പ്രാർത്ഥനാനിർഭരമായി നടന്നു.പെരുന്നാളിനോടനുബന്ധിച്ച് രാവിലെ 10ന് ജറുസലേം പഴയ നഗരത്തിലെ സുറിയാനി ഓർത്തഡോക്സ് സഭയുടെ വിശുദ്ധ മർക്കോസ് ആശ്രമത്തിൽ നിന്ന് ഔദ്യോഗിക പ്രദക്ഷിണം ആരംഭിച്ച് വിശുദ്ധ നഗരത്തിലെ വിശുദ്ധ മറിയം ദൈവാലയത്തിലേക്ക് നീങ്ങി. തുടർന്ന് രാവിലെ 10.30ന് വിശുദ്ധ കുർബാന ആരംഭിച്ചു.വിശുദ്ധ കുർബാനയ്ക്ക് വിശുദ്ധ നാട്ടിലെ ഇന്ത്യൻ സുറിയാനി സമൂഹത്തിന്റെ ചുമതലയുള്ള അഭിവന്ദ്യ മോർ തീമോത്തിയോസ് മാത്യൂസ് മെത്രാപ്പോലീത്ത പ്രധാന കാർമികത്വം വഹിച്ചു. വൈദികരും സന്ന്യാസികളും ശെമ്മാശന്മാരും സഹകാർമികരായി. നിരവധി വിശ്വാസികൾ വിശുദ്ധ കുർബാനയിൽ സംബന്ധിച്ചു.പെരുന്നാൾ ശുശ്രൂഷകളിൽ പരിശുദ്ധ ദൈവമാതാവായ മറിയാമിന്റെ മദ്ധ്യസ്ഥത തേടി പ്രത്യേക പ്രാർത്ഥനകളും സ്തുതിഗീതങ്ങളും അർപ്പിച്ചു. സഭകളെയും ഭവനങ്ങളെയും കുടുംബങ്ങളെയും മക്കളെയും ദൈവം കാത്തുസംരക്ഷിക്കണമെന്നും ലോകത്തിന് സമാധാനവും അനുഗ്രഹവും നൽകണമെന്നും പ്രാർത്ഥനയിൽ അഭ്യർഥിച്ചു. പരിശുദ്ധ ദൈവമാതാവിന്റെ മദ്ധ്യസ്ഥതയിൽ അനുഗ്രഹീതമായ പുതുവർഷത്തിനായുള്ള പ്രാർത്ഥനകളോടെയാണ് പെരുന്നാൾ ശുശ്രൂഷകൾ സമാപിച്ചത്.

Comments (0)

Related Stories