ആഗോള മരിയൻ തീർത്ഥാടന കേന്ദ്രമായ കട്ടച്ചിറ സെന്റ് മേരീസ് ചാപ്പലിൽ പരിശുദ്ധ കന്യകാമറിയത്തിന്റെ ജനനപ്പെരുന്നാൾ; സെപ്റ്റംബർ 1 മുതൽ 8 വരെ

കട്ടച്ചിറ: ആഗോള മരിയൻ തീർത്ഥാടന കേന്ദ്രമായ കട്ടച്ചിറ സെന്റ് മേരീസ് ചാപ്പലിൽ സെപ്റ്റംബർ 1 മുതൽ 8 വരെ വിപുലമായ പെരുന്നാൾ ചടങ്ങുകൾ നടക്കും. പരിശുദ്ധ ദൈവമാതാവിന്റെ മധ്യസ്ഥതയിലൂടെ അനുഗ്രഹം പ്രാപിക്കുന്നതിനായി വിവിധ പ്രദേശങ്ങളിൽനിന്നുള്ള വിശ്വാസികൾ പങ്കെടുക്കുന്ന ആത്മീയ സംഗമമായാണ് പെരുന്നാൾ ദിനങ്ങൾ.1955-ൽ പരിശുദ്ധ ദൈവമാതാവിന്റെ നാമധേയത്തിൽ പണികഴിപ്പിച്ച ദൈവാലയമാണ് കട്ടച്ചിറ സെന്റ് മേരീസ് ചാപ്പൽ. പ്രതികൂലശക്തികൾ അധാർമ്മികതയിലൂടെ പിടിച്ചെടുക്കാൻ ശ്രമിച്ചപ്പോഴും, പ്രതിസന്ധികൾ ആഞ്ഞടിച്ചപ്പോഴും ഇടവകയിലെ മുഴുവൻ കുടുംബങ്ങളും പ്രാർത്ഥനയിലൂടെ ഒരുമനപ്പെട്ട് ദൈവാലയത്തെ സത്യസുറിയാനി സഭയ്ക്ക് അഭിമാനമായി നിലനിർത്തി. പരിശുദ്ധ അമ്മയുടെ ദിവ്യാത്ഭുത ദർശനത്താൽ അനുഗ്രഹീതവും നാനാജാതി മതസ്ഥരുടെ ആശ്രയകേന്ദ്രവുമായ ഈ ദൈവാലയത്തെ, പരിശുദ്ധ മോറാൻ മോർ ഇഗ്നാത്യോസ് സഖാ പ്രഥമൻ പാത്രിയർക്കീസ് ബാവ ആഗോള മരിയൻ തീർത്ഥാടന കേന്ദ്രമായി പ്രഖ്യാപിച്ചിരുന്നു.മുൻ വർഷങ്ങളിലേതുപോലെ ഈ വർഷവും പെരുന്നാൾ നാടിന്റെ വലിയ മഹോത്സവമായാണ് ആചരിക്കുന്നത്. യാക്കോബായ സുറിയാനി സഭയുടെ അഭിവന്ദ്യ തിരുമേനിമാരും വൈദികരും പ്രധാന കാർമ്മികത്വം വഹിക്കുന്ന പെരുന്നാൾ ചടങ്ങുകൾക്ക് വിശ്വാസികളേവരും നേർച്ചകാഴ്ചകളോടെ വന്ന് സംബന്ധിച്ച് അനുഗ്രഹം പ്രാപിക്കണമെന്ന് സംഘാടകർ താൽപര്യപ്പെടുന്നു.സെപ്റ്റംബർ 1-ന് രാവിലെ 7ന് പ്രഭാത നമസ്കാരവും 8ന് വിശുദ്ധ കുർബാനയും നടക്കും. ഹോണവർ മിഷൻ, മംഗലാപുരം മേഖലയിൽനിന്നുള്ള അഭിവന്ദ്യ മോർ യാക്കൂബ് മോർ അന്ത്യോന്യോസ് മെത്രാപ്പോലീത്തയുടെ നേതൃത്വത്തിൽ വിശുദ്ധ കുർബാനയും ധ്യാനവും നടക്കും. വൈകിട്ട് സന്ധ്യാനമസ്കാരം, ഗാനശുശ്രൂഷ, ആമുഖപ്രസംഗം, സുവിശേഷപ്രസംഗം എന്നിവയും ഉണ്ടായിരിക്കും.സെപ്റ്റംബർ 2, 3 തീയതികളിലും സമാന ക്രമത്തിൽ പ്രഭാത നമസ്കാരം, വിശുദ്ധ കുർബാന, ധ്യാനം, സമർപ്പണ പ്രാർത്ഥന എന്നിവയ്ക്കൊപ്പം വൈകുന്നേരങ്ങളിൽ സന്ധ്യാനമസ്കാരവും ഗാനശുശ്രൂഷയും സുവിശേഷപ്രസംഗവും നടക്കും. സെപ്റ്റംബർ 4-ന് വിശുദ്ധ കുർബാനയ്ക്കുശേഷം ധ്യാനവും സമർപ്പണ പ്രാർത്ഥനയും, വൈകിട്ട് പതിവ് ശുശ്രൂഷകളും ഉണ്ടായിരിക്കും.സെപ്റ്റംബർ 5-ന് പ്രഭാത ശുശ്രൂഷകൾക്കുശേഷം വിവിധ ഇടവകകളിലെ ആത്മീയ സംഘടനകളുടെ നേതൃത്വത്തിൽ സങ്കീർത്തനപാരായണം നടക്കും. സെപ്റ്റംബർ 6-ന് വിശ്വാസികൾ നേർച്ചയായി കൊണ്ടുവരുന്ന മുത്തുക്കുടകൾ ഘോഷപൂർവം സ്വീകരിക്കുന്ന പ്രത്യേക ചടങ്ങ് നടക്കും.പെരുന്നാളിന്റെ പ്രധാന ദിവസമായ സെപ്റ്റംബർ 7-ന് രാവിലെ പ്രഭാത നമസ്കാരത്തിനും വിശുദ്ധ കുർബാനയ്ക്കും മുവാറ്റുപുഴ മേഖലയിൽനിന്നുള്ള അഭിവന്ദ്യ മോർ ഗബ്രിയേൽ മോർ ഗ്രിഗോറിയോസ് മെത്രാപ്പോലീത്ത നേതൃത്വം നൽകും. തുടർന്ന് അവാർഡ് വിതരണവും വൈകിട്ട് ഗാനശുശ്രൂഷയും മറ്റ് ആത്മീയ പരിപാടികളും നടക്കും.സെപ്റ്റംബർ 8-ന് പെരുന്നാൾ സമാപിക്കും. യാക്കോബായ സഭാ വൈദിക ട്രസ്റ്റി റവ. ഫാ. റോയി ജോർജ് നേതൃത്വം നൽകുന്ന മധ്യസ്ഥ പ്രാർത്ഥനയ്ക്കുശേഷം രാവിലെ 9.30ന് ചാപ്പലിൽനിന്ന് ആരംഭിക്കുന്ന പകൽ റാസ മൂന്നാംകുറ്റി ജംഗ്ഷനിലെ കുരിശിങ്കൽ ധൂപപ്രാർത്ഥന നടത്തി മരിയൻ ഗ്രൗണ്ടിലൂടെ പള്ളിയിൽ പ്രവേശിക്കും. തുടർന്ന് ആശീർവാദം, നന്ദിപ്രകാശനം, പാച്ചോർ നേർച്ച എന്നിവയ്ക്കുശേഷം രാവിലെ 11ന് കൊടിയിറക്കോടെ ഈ വർഷത്തെ പെരുന്നാൾ ചടങ്ങുകൾക്ക് സമാപനമാകും.

Comments (0)

Related Stories