മെത്രാൻ കക്ഷി അസോസിയേഷൻ അംഗപ്പട്ടികയിൽ യാക്കോബായ പള്ളികളുടെ പേരുകൾ ഉൾപ്പെടുത്തിയിട്ടുണ്ടോയെന്ന് പരിശോധിക്കണം; ഇടവക പള്ളികൾക്ക് ശ്രേഷ്ഠ കാതോലിക്ക ബാവയുടെ ജാഗ്രതാനിർദേശം.

പുത്തൻകുരിശ് ● 2026 ആഗസ്റ്റ് 27ന് ഓർത്തഡോക്സ് മെത്രാൻ കക്ഷി യോഗത്തിന്റെ പശ്ചാത്തലത്തിൽ യാക്കോബായ സുറിയാനി സഭയിലെ പള്ളികളും ഇടവക ഭരണസമിതികളും ജാഗ്രത പാലിക്കണമെന്ന് ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് ബാവ നിർദേശം നൽകി. വിവിധ യാക്കോബായ പള്ളികളിൽ നിന്നുള്ള അംഗങ്ങളുടെയും പള്ളികളുടെയും പേരുകൾ അനുമതിയില്ലാതെ മെത്രാൻ കക്ഷി അംഗപ്പട്ടികയിൽ ഉൾപ്പെടുത്തിയതായി വിവരങ്ങൾ ലഭിച്ചതിനെ തുടർന്നാണ് സഭാ നേതൃത്വം ജാഗ്രതാനിർദേശം നൽകിയത്.യാക്കോബായ സുറിയാനി സഭയിലെ ഓരോ പള്ളിയും തങ്ങളുടെ ഇടവകയിൽ നിന്നുള്ള അംഗങ്ങളുടെ പേരുകൾ പ്രസ്തുത പട്ടികയിൽ ഉൾപ്പെടുത്തിയിട്ടുണ്ടോയെന്ന് പരിശോധിക്കണമെന്ന് ശ്രേഷ്ഠ കാതോലിക്ക ബാവ നിർദേശിച്ചു. പള്ളിയുടെയോ ഇടവകാംഗങ്ങളുടെയോ പേരുകൾ അനുമതിയില്ലാതെ പട്ടികയിൽ ഉൾപ്പെടുത്തിയതായി കണ്ടെത്തുന്ന പക്ഷം ബന്ധപ്പെട്ട അധികാരികൾക്ക് ഉടൻ നോട്ടീസ് നൽകണമെന്നും, നോട്ടീസിന്റെ പകർപ്പ് പുത്തൻകുരിശ് പാത്രിയർക്കാ കേന്ദ്രത്തിലും ലഭ്യമാക്കണമെന്നും നിർദേശിച്ചിട്ടുണ്ട്.വൈദികർ, വികാരിമാർ, സഹവികാരിമാർ, സന്ന്യാസിമാർ, ഭദ്രാസന അംഗങ്ങൾ എന്നിവർക്ക് നൽകിയ സർക്കുലറിലൂടെയാണ് സഭാ നേതൃത്വം നിർദേശങ്ങൾ അറിയിച്ചത്.ഇതിനിടെ, ഓഗസ്റ്റ് 27ന് നടക്കുന്ന യോഗവുമായി ബന്ധപ്പെട്ട് വിവിധ യാക്കോബായ പള്ളികളുടെ ഭരണസമിതികൾ ഔദ്യോഗിക അറിയിപ്പുകൾ പുറപ്പെടുവിച്ചിട്ടുണ്ടെന്നും, യോഗത്തോടോ അതിന്റെ പ്രതിനിധിത്വ സംവിധാനത്തോടോ ബന്ധപ്പെട്ട് തങ്ങൾക്കോ ഇടവകാംഗങ്ങൾക്കോ യാതൊരു ബന്ധവുമില്ലെന്ന് വ്യക്തമാക്കിയിട്ടുണ്ടെന്നും സഭാ വൃത്തങ്ങൾ അറിയിച്ചു.പ്രതിനിപട്ടികയുമായി ബന്ധപ്പെട്ട് ചില പള്ളികളുടെയും ചാപ്പലുകളുടെയും പേരുകൾ പ്രത്യേകം കണക്കാക്കുന്നതും, ഒരേ വൈദികന്റെ പേരിൽ വിവിധ ഇടവകകളുടെ പ്രതിനിധിത്വം ഉണ്ടാകുന്നതുമടക്കമുള്ള വിഷയങ്ങളിൽ വ്യക്തത ആവശ്യപ്പെട്ടും സഭാ വിശ്വാസികൾ രംഗത്തെത്തിയിട്ടുണ്ട്. കോടനാട് സെഹിയോൻ ആശ്രമവും മോർ മൽക്കെ പള്ളിയും ഒരേ കെട്ടിടത്തിൽ പ്രവർത്തിക്കുന്ന രണ്ട് പ്രസ്ഥാനങ്ങളാണെങ്കിലും അവയെ രണ്ട് പള്ളികളായി പരിഗണിച്ച് പ്രതിനിധിത്വം വർധിപ്പിക്കുന്നുവെന്ന ആരോപണവും ഉയർന്നിട്ടുണ്ട്.മൂവാറ്റുപുഴ മേഖലയിലെ പുളിന്താനം സെന്റ് ജോൺസ് ബസ്ഫാഗെ യാക്കോബായ സുറിയാനി പള്ളി, കാലാമ്പൂർ സെന്റ് മേരീസ് യാക്കോബായ സുറിയാനി പള്ളി തുടങ്ങിയ പള്ളികളുടെ പേരുകൾ അസോസിയേഷൻ പ്രതിനിധിത്വവുമായി ബന്ധപ്പെട്ട് ഉപയോഗിക്കുന്നുവെന്ന ആരോപണങ്ങളും ഉയർന്നിട്ടുണ്ട്. ഇത്തരം അവകാശവാദങ്ങൾക്ക് പിന്നിലെ രേഖകളും അംഗപ്പട്ടികകളും ബന്ധപ്പെട്ടവർ പരിശോധിക്കണമെന്നാണ് യാക്കോബായ സഭാ വിശ്വാസികളുടെ ആവശ്യം.മണർകാട് സെന്റ് മേരിസ് കത്തീഡ്രൽ , ചേലാട് സെന്റ് സ്റ്റീഫൻ ബസ്അനിയാ പള്ളി, മീനടം സെന്റ് ഇഗ്നേഷ്യസ് പള്ളി തുടങ്ങി അനേകം പള്ളികൾ തങ്ങൾക്കോ ഇടവകാംഗങ്ങൾക്കോ ഈ യോഗവുമായി യാതൊരു ബന്ധവുമില്ലെന്ന് വ്യക്തമാക്കി ഔദോയ്ഗിക അറിയിപ്പു പുറപ്പെടുവിച്ചു. അസോസിയേഷൻ അംഗസംഖ്യയും പ്രതിനിധിത്വവും സംബന്ധിച്ച് സുതാര്യത ഉറപ്പാക്കേണ്ടതുണ്ടെന്നും, ഒരേ കുടുംബങ്ങളുടെയോ വ്യക്തികളുടെയോ പേരുകൾ ഒന്നിലധികം ഇടങ്ങളിൽ ഉപയോഗിക്കുന്നുണ്ടോ, യഥാർഥ ഇടവകാംഗത്വത്തിന്റെ അടിസ്ഥാനത്തിലാണോ പ്രതിനിധിത്വം നിശ്ചയിച്ചിരിക്കുന്നത് തുടങ്ങിയ കാര്യങ്ങൾ പരിശോധിക്കണമെന്നും സഭാ വിശ്വാസികൾ ആവശ്യപ്പെട്ടു.അതേസമയം, മുകളിൽ പറയുന്ന അംഗപ്പട്ടിക ക്രമക്കേടുകൾ, വ്യാജരേഖകൾ, കോടതികളെ തെറ്റിദ്ധരിപ്പിക്കൽ തുടങ്ങിയ ആരോപണങ്ങൾ ബന്ധപ്പെട്ട രേഖകളും നിയമപരമായ നടപടികളും പരിശോധിച്ച ശേഷമേ വസ്തുതയായി സ്ഥിരീകരിക്കാനാകൂ. അതിനാൽ ഇത്തരം ആരോപണങ്ങൾ സംബന്ധിച്ച് ഔദ്യോഗിക രേഖകളുടെ അടിസ്ഥാനത്തിലുള്ള പരിശോധന ആവശ്യമാണ്.യാക്കോബായ സുറിയാനി സഭയുടെ പള്ളികളുടെയും ഇടവകാംഗങ്ങളുടെയും പേരുകൾ അനുമതിയില്ലാതെ ഏതെങ്കിലും അസോസിയേഷൻ പട്ടികയിൽ ഉൾപ്പെടുത്തിയിട്ടുണ്ടെങ്കിൽ, അത് സംബന്ധിച്ച് ആവശ്യമായ നിയമപരവും ഭരണപരവുമായ നടപടികൾ സ്വീകരിക്കണമെന്നതാണ് ശ്രേഷ്ഠ കാതോലിക്ക ബാവയുടെ നിർദേശത്തിന്റെ പ്രധാന ഉള്ളടക്കം. സഭയുടെ പള്ളികളും വിശ്വാസികളും ജാഗ്രത പാലിച്ച് വസ്തുതകൾ രേഖകളുടെ അടിസ്ഥാനത്തിൽ പരിശോധിക്കണമെന്ന സന്ദേശവും ഇതിലൂടെ നൽകുന്നു.

Comments (0)

Related Stories