മലേക്കുരിശ് ദയറായിൽ പൗലോസ് ദ്വിതീയൻ ബാവയുടെ ശ്രാദ്ധപ്പെരുന്നാളിന് കൊടിയേറി.

മലേക്കുരിശ്: ഭാഗ്യസ്മരണാർഹനായ മലങ്കരയുടെ പ്രകാശ ഗോപുരം ശ്രേഷ്ഠ ആബൂൻ മോർ ബസേലിയോസ് പൗലോസ് ദ്വിതീയൻ കാതോലിക്കാ ബാവയുടെ മുപ്പതാമത് ശ്രാദ്ധപ്പെരുന്നാളിന് മലേക്കുരിശ് ദയറായിൽ കൊടിയേറി. ഓഗസ്റ്റ് 23 ഞായറാഴ്ച രാവിലെ വിശുദ്ധ കുർബാനയ്ക്കുശേഷം മഞ്ഞിനിക്കര ദയറാധിപൻ മോർ അത്തനാസിയോസ് ഗീവർഗീസ് മെത്രാപ്പോലീത്ത കൊടിയേറ്റി.ശ്രാദ്ധപ്പെരുന്നാളിനോടനുബന്ധിച്ചുള്ള ആത്മീയ ശുശ്രൂഷകൾക്കും പ്രത്യേക പ്രാർത്ഥനകൾക്കും ഇതോടെ തുടക്കമായി. ഓഗസ്റ്റ് 31, സെപ്റ്റംബർ 1 തീയതികളിലാണ് പ്രധാന പെരുന്നാൾ ചടങ്ങുകൾ നടക്കുന്നത്.കൊടിയേറ്റിന് ശേഷം ദയറായിൽ നടന്ന വിവിധ പ്രാർത്ഥനാ ശുശ്രൂഷകളിൽ വൈദികരും വിശ്വാസികളും പങ്കെടുത്തു. ശ്രേഷ്ഠ ബാവയുടെ ഓർമ പുതുക്കുന്നതിനും അദ്ദേഹത്തിന്റെ ആത്മീയ ജീവിതവും സഭയ്ക്കു നൽകിയ സേവനങ്ങളും അനുസ്മരിക്കുന്നതിനുമായി വിവിധ ആത്മീയ പരിപാടികളും പെരുന്നാളിനോടനുബന്ധിച്ച് നടക്കും.മലേക്കുരിശ് ദയറാധിപൻ മോർ ദിയസ്കോറസ് കുര്യാക്കോസ് മെത്രാപ്പോലീത്ത, വികാരി വെരി. റവ. ഫാ. കുര്യാക്കോസ് കണിയത്ത് കോറെപ്പിസ്കോപ്പ, ദയറാ ട്രസ്റ്റിമാർ, സഭാ ഭാരവാഹികൾ, വിശ്വാസികൾ എന്നിവർ കൊടിയേറ്റ ചടങ്ങിൽ സംബന്ധിച്ചു.

Comments (0)

Related Stories