ചെന്നിത്തലയച്ചൻ — ഓർമ്മയിൽ തെളിയുന്ന ഒരു ആചാര്യജീവിതം : ഒരു കാലഘട്ടത്തിന്റെ ആചാര്യസാക്ഷ്യം

തെക്കൻ ഭദ്രാസനങ്ങളിൽ സത്യവിശ്വാസം നിലനിർത്തുന്നതിനായി അഹോരാത്രം പ്രവർത്തിച്ച കർത്താവിന്റെ വിശ്വസ്തനായ ശുശ്രൂഷകൻ; സഭാതർക്ക വിഷയങ്ങളിൽ വിട്ടുവീഴ്ചയില്ലാത്ത നിലപാടുകൾ സ്വീകരിക്കുമ്പോഴും വ്യക്തിബന്ധങ്ങൾ തകരാതെ കാത്തുസൂക്ഷിച്ച അസാധാരണ വ്യക്തിത്വം; ചെറിയൊരു വിട്ടുവീഴ്ചയിലൂടെ പോലും വ്യക്തിപരമായ സ്ഥാനമാനങ്ങൾ നേടാമായിരുന്ന സാഹചര്യങ്ങളിൽ അതെല്ലാം നിരസിച്ച് സത്യത്തിനും നീതിക്കും ഒപ്പം ഉറച്ചുനിന്ന ധീരനായ വൈദികൻ — അതായിരുന്നു വന്ദ്യ ടി. കെ. ഡാനിയേൽ കശ്ശീശ, എല്ലാവർക്കും പ്രിയപ്പെട്ട ചെന്നിത്തലയച്ചൻ.സ്വന്തം കുടുംബത്തോടൊപ്പം ചെലവഴിക്കുന്നതിനേക്കാൾ കൂടുതൽ സമയം സഭയ്ക്കും വിശ്വാസികൾക്കുമായി മാറ്റിവച്ച പരമസാത്വികനായ പുരോഹിതനായിരുന്നു അദ്ദേഹം. ആരാധനാകാര്യങ്ങളിൽ വിട്ടുവീഴ്ചയില്ലായിരുന്നു. വിശുദ്ധ മദ്ബഹയിലെ ശുശ്രൂഷകളിൽ തെറ്റുകൾ കണ്ടാൽ കർശനമായി തിരുത്തിയിരുന്നെങ്കിലും, മദ്ബഹാ ശുശ്രൂഷകരെ ഏറെ കരുതുകയും അവരെ പരിശീലിപ്പിക്കുകയും പ്രോത്സാഹിപ്പിക്കുകയും ചെയ്ത വൈദികശ്രേഷ്ഠനായിരുന്നു ചെന്നിത്തലയച്ചൻ.പരിശുദ്ധ സുറിയാനി സഭയുടെ വിശ്വസ്തനായ ആ പോരാളി നമ്മെ വിട്ടുപിരിഞ്ഞിട്ട് കാൽനൂറ്റാണ്ട് പിന്നിടുന്നു. അച്ചന്റെ 25-ാം ഓർമ്മ 2026 ആഗസ്റ്റ് 22, 23 തീയതികളിൽ ചെന്നിത്തല സെന്റ് ജോർജ് ഹോറേബ് യാക്കോബായ സുറിയാനി പള്ളിയിൽ ആചരിക്കപ്പെടുകയാണ്.സൈനികനിൽനിന്ന് കർത്താവിന്റെ ശുശ്രൂഷകനിലേക്ക്1930 ആഗസ്റ്റ് 25-ന് ആലപ്പുഴ ജില്ലയിലെ ചെന്നിത്തല കുമരേത്ത് ശ്രീ ഗീവർഗീസ് കോശിയുടെയും ശ്രീമതി സാറയുടെയും ഇളയ മകനായി ഡാനിയേൽ ജനിച്ചു. പ്രാഥമിക വിദ്യാഭ്യാസം ചെന്നിത്തല സ്കൂളിലും ഹൈസ്കൂൾ വിദ്യാഭ്യാസം മാന്നാർ നായർ സമാജം സ്കൂളിലും പൂർത്തിയാക്കി.ESSLC-ക്കുശേഷം ഹ്രസ്വകാലം ഇന്ത്യൻ സൈന്യത്തിലെ സിഗ്നൽ കോറിൽ സേവനമനുഷ്ഠിച്ചു. സൈനികസേവനത്തിനിടയിലും പഠനം തുടർന്ന അദ്ദേഹം ടെലികമ്മ്യൂണിക്കേഷൻ ഡിപ്ലോമ കരസ്ഥമാക്കി.പിൽക്കാലത്ത് വൈദികനായശേഷവും അദ്ദേഹത്തിന്റെ ഈ സൈനികപശ്ചാത്തലം നാട്ടുകാരുടെയും അടുത്തറിയുന്നവരുടെയും ഓർമ്മയിൽ മായാതെ നിന്നു. അതുകൊണ്ടുതന്നെ ആദരവും സ്നേഹവും കലർന്ന അടുപ്പത്തോടെ ചിലർ അദ്ദേഹത്തെ “പട്ടാളം അച്ചൻ” എന്നും വിളിച്ചിരുന്നു. അത് പരിഹാസത്തിന്റെ വിളിപ്പേരായിരുന്നില്ല; മറിച്ച് അദ്ദേഹത്തിന്റെ ജീവിതത്തിലെ ഒരു വ്യത്യസ്ത അധ്യായത്തെ ഓർമ്മിപ്പിച്ചിരുന്ന സ്നേഹസംബോധനയായിരുന്നു.ആ പേരിനോട് ചേർന്നുനിന്ന ചില സവിശേഷതകളും അദ്ദേഹത്തിന്റെ ജീവിതത്തിൽ കാണാമായിരുന്നു — കൃത്യനിഷ്ഠ, അച്ചടക്കം, ധീരത, തീരുമാനങ്ങളിലെ ഉറപ്പ്. എന്നാൽ ആ സൈനികമായ അച്ചടക്കത്തിനുള്ളിൽ വിശ്വാസികളോടുള്ള കരുതലും സാധാരണക്കാരോടുള്ള കരുണയും നിറഞ്ഞ ഒരു ആചാര്യഹൃദയവുമുണ്ടായിരുന്നു.എന്നാൽ അദ്ദേഹത്തിനായി ദൈവം മറ്റൊരു വഴി ഒരുക്കിയിരുന്നു. ദൈവവിളിക്ക് ചെവികൊടുത്ത ഡാനിയേൽ ആദ്യം മലേക്കുരിശ് ദയറായിലും പിന്നീട് മഞ്ഞനിക്കര മോർ ഇഗ്നാത്തിയോസ് ദയറായിലും താമസിച്ച് വൈദികപഠനം നടത്തി.1958 മാർച്ച് 18-ന് തിരുവല്ല കട്ടപ്പുറത്ത് സെന്റ് ജോർജ് യാക്കോബായ സുറിയാനി പള്ളിയിൽവച്ച് ‘മലങ്കരയുടെ ഉരുക്കുമനുഷ്യൻ’ എന്ന അപരനാമത്തിൽ അറിയപ്പെട്ടിരുന്ന അഭിവന്ദ്യ ഗീവർഗീസ് മോർ ഗ്രീഗോറിയോസ് വയലിപ്പറമ്പിൽ തിരുമേനിയിൽനിന്ന് ‘കോറൂയോ’ പട്ടം സ്വീകരിച്ചു.വൈദികപഠനം പൂർത്തിയാക്കിയ ഡാനിയേൽ ശെമ്മാശനെ 1960 ആഗസ്റ്റ് 15-ന് ശൂനോയോ പെരുന്നാൾ ദിവസം മഞ്ഞനിക്കര മോർ ഇഗ്നാത്തിയോസ് ദയറായിൽവച്ച് അന്ത്യോഖ്യാ പ്രതിനിധിയായിരുന്ന ഏലിയാസ് മോർ യൂലിയോസ് ബാവ കശ്ശീശ സ്ഥാനത്തേക്ക് ഉയർത്തി. തുടർന്ന് ചെന്നിത്തല സെന്റ് ജോർജ് ഹോറേബ് യാക്കോബായ സുറിയാനി പള്ളിയുടെ ഇടവകപ്പട്ടക്കാരനായി നിയമിച്ചു.പുണ്യശ്ലോകരായ ശ്രേഷ്ഠ കാതോലിക്ക ആബൂൻ മോർ ബസേലിയോസ് തോമസ് പ്രഥമൻ ബാവ, കുര്യാക്കോസ് മോർ കൂറിലോസ് പൂതിക്കോട്ട്, ഗീവർഗീസ് മോർ ഗ്രീഗോറിയോസ് പെരുമ്പള്ളി തുടങ്ങിയ പിതാക്കന്മാർ അക്കാലത്ത് സെമിനാരിയിൽ അച്ചന്റെ സഹപാഠികളായിരുന്നു.സ്ഥാനമാനങ്ങളേക്കാൾ വലുതായിരുന്ന വിശ്വാസം1964-ലെ മലങ്കര സഭായോജിപ്പിനുശേഷം, 1970-കളുടെ മധ്യത്തോടെ സഭാനൗക വീണ്ടും കാറ്റിലും കോളിലും ഉലഞ്ഞപ്പോൾ, സ്ഥാനമാനങ്ങളടക്കം വാഗ്ദാനം ചെയ്ത മറുഭാഗത്തിന്റെ പല പ്രലോഭനങ്ങളെയും അച്ചൻ നിരസിച്ചു. പരിശുദ്ധ അന്ത്യോഖ്യാ സിംഹാസനത്തോടും പരിശുദ്ധ പാത്രിയർക്കീസ് ബാവായോടുമുള്ള കൂറ് പ്രഖ്യാപിച്ച അദ്ദേഹം തെക്കൻ ഭദ്രാസനങ്ങളിൽ സത്യവിശ്വാസം നിലനിർത്തുന്നതിനായി വിശ്വാസികൾക്ക് ധീരമായ നേതൃത്വം നൽകി.നിരണം, തുമ്പമൺ, കൊല്ലം തുടങ്ങിയ തെക്കൻ ഭദ്രാസനങ്ങളിലെ ചെന്നിത്തല സെന്റ് ജോർജ് ഹോറേബ്, കാരക്കാട് സീനായിക്കുന്ന് സെന്റ് മേരീസ്, കായംകുളം കാദീശ, ചേപ്പാട് സെന്റ് ജോർജ്, കട്ടച്ചിറ സെന്റ് മേരീസ്, മാന്തളിർ സെന്റ് തോമസ്, കുന്നന്താനം സെന്റ് പീറ്റേഴ്സ് തുടങ്ങി നിരവധി ദേവാലയങ്ങളിലും ക്നാനായ സഭയിലെ വിവിധ ദേവാലയങ്ങളിലും അച്ചൻ സേവനമനുഷ്ഠിച്ചു.1964-ലെ സഭായോജിപ്പിന്റെ കാലയളവിൽ ഒന്നായിരുന്ന മലങ്കര സഭയിൽ ഉൾപ്പെട്ടിരുന്ന, ഇപ്പോൾ മറുഭാഗത്തു നിൽക്കുന്ന മാന്നാർ കുട്ടേമ്പേരൂർ സെന്റ് മേരീസ് യാക്കോബായ സുറിയാനി പള്ളി, കല്ലുങ്കൽ സെന്റ് ജോർജ് യാക്കോബായ സുറിയാനി പള്ളി എന്നീ ദേവാലയങ്ങളിലും അദ്ദേഹം സേവനം ചെയ്തിട്ടുണ്ട്.പിന്നീട് ജീവിതാന്ത്യംവരെ പരിശുദ്ധ അന്ത്യോഖ്യാ സിംഹാസനത്തിൻ കീഴിലുള്ള പള്ളികളിൽ വികാരിയായി സേവനം തുടർന്നു. ഇഹലോകവാസം വെടിയുന്ന സമയത്ത് ചെന്നിത്തല, ചേപ്പാട്, കാരക്കാട് പള്ളികളുടെ വികാരിയായിരുന്നു ഡാനിയേൽ അച്ചൻ.‘ഗർജ്ജിക്കുന്ന സിംഹ’ത്തോടൊപ്പംകോട്ടയം, കൊല്ലം, നിരണം, തുമ്പമൺ ഭദ്രാസനങ്ങളുടെ പിതാവായിരുന്ന, ‘മലങ്കരയുടെ ഗർജ്ജിക്കുന്ന സിംഹം’ എന്നറിയപ്പെട്ടിരുന്ന പുണ്യശ്ലോകനായ മിഖായേൽ മോർ ദിവന്ന്യാസിയോസ് തിരുമേനിയോട് അച്ചന് അഗാധമായ ഭയഭക്തിയും ബഹുമാനവും ആദരവുമുണ്ടായിരുന്നു.കായംകുളം മിഖായേൽ മോർ ദിവന്ന്യാസിയോസ് ചാപ്പലിന്റെ — കായംകുളം കാദീശ യാക്കോബായ പള്ളിയുടെ — ആരംഭം മുതൽ നിർമ്മാണം പൂർത്തിയാകുന്നതുവരെ അതിന്റെ എല്ലാ പ്രവർത്തനങ്ങളിലും അച്ചൻ സജീവസാന്നിധ്യമായിരുന്നു. ദീർഘകാലം അവിടെ വികാരിയായും സേവനമനുഷ്ഠിച്ചു.കാരക്കാട് സീനായിക്കുന്ന് സെന്റ് മേരീസ് യാക്കോബായ പള്ളിയുടെ നിർമ്മാണത്തിലും അച്ചന്റെ കഠിനാധ്വാനം നിർണ്ണായകമായിരുന്നു. അവിടെയും അദ്ദേഹം ദീർഘകാലം വികാരിയായി സേവനം ചെയ്തു.ദേവാലയങ്ങൾക്കു കാവലായിരുന്ന ധീരതചെന്നിത്തല സെന്റ് ജോർജ് ഹോറേബ്, ചേപ്പാട് സെന്റ് ജോർജ്, കുണ്ടറ, കാരക്കാട്, കായംകുളം, കട്ടച്ചിറ തുടങ്ങി നിരവധി പള്ളികളിൽ സഭാതർക്കത്തിന്റെ ഭാഗമായി പ്രതിസന്ധികളുണ്ടായപ്പോൾ സത്യവിശ്വാസികളെ ചേർത്തുനിർത്തുകയും നിരവധി ദേവാലയങ്ങളെ പരിശുദ്ധ സിംഹാസനത്തിൻ കീഴിൽ ഉറപ്പിച്ചുനിർത്തുകയും ചെയ്യുന്നതിൽ അച്ചൻ നിർണ്ണായക പങ്കുവഹിച്ചു.ചെന്നിത്തല പള്ളിയുടെ ഇടവകപ്പട്ടക്കാരനെന്ന നിലയിൽ അച്ചന് അനുകൂലമായ കോടതി വിധി നേരത്തെ ഉണ്ടായിരുന്നതിനാൽ, ചെന്നിത്തല പള്ളിക്കെതിരെ മെത്രാൻകക്ഷികൾ നൽകിയ കേസുകളിലും അത് നിർണ്ണായകമായി.കട്ടച്ചിറ പള്ളിയിൽ സെമിത്തേരിയിൽ മൃതദേഹം അടക്കുന്നതുമായി ബന്ധപ്പെട്ട് പരിസരവാസികളുമായുണ്ടായിരുന്ന പ്രശ്നം അച്ചന്റെ നയപരമായ ഇടപെടലിലൂടെ പരിഹരിക്കുവാനും സെമിത്തേരിക്ക് അനുമതി ലഭിക്കുവാനും സാധിച്ചു.എന്റെ ഇടവകയുടെ കാവലാളായുംചെന്നിത്തലയച്ചനുമായുള്ള എന്റെ ബന്ധത്തിന് മറ്റൊരു വ്യക്തിപരമായ തലം കൂടിയുണ്ട്. എന്റെ മാതൃഇടവകയായ ചേപ്പാട് സെന്റ് ജോർജ് യാക്കോബായ സുറിയാനി പള്ളിയുടെ ചരിത്രത്തിലും അച്ചന്റെ ധീരമായ ഇടപെടലുകൾക്ക് നിർണ്ണായക സ്ഥാനമുണ്ട്.ചേപ്പാട് പള്ളിയിൽ സഭാതർക്കത്തിന്റെ ഭാഗമായി പ്രതിസന്ധി സൃഷ്ടിച്ച് ദൈവാലയം പൂട്ടിക്കുവാനുള്ള സാഹചര്യം ഉണ്ടായപ്പോൾ അതിനെ അതിജീവിക്കുന്നതിൽ അച്ചന്റെ നിശ്ചയദാർഢ്യവും നേതൃത്വവും നിർണ്ണായകമായി. അച്ചനോടൊപ്പം യാതൊരു ഭയവും കൂടാതെ നിന്ന ചെന്നിത്തല പള്ളിയിലെയും കായംകുളം കാദീശ പള്ളിയിലെയും വിശ്വാസികളുടെയും, ചേപ്പാട് പള്ളിയിലെ ഞാപ്പള്ളി, കരിമ്പനക്കൽ കുടുംബാംഗങ്ങളുടെയും ത്യാഗവും ഈ ചരിത്രത്തോടൊപ്പം ആദരവോടെ സ്മരിക്കപ്പെടേണ്ടതാണ്.അവരുടെ വിശ്വാസധൈര്യത്തിന്റെയും ത്യാഗത്തിന്റെയും ഫലമായി ആ ദേവാലയം ഇന്നും മലങ്കര യാക്കോബായ സുറിയാനി സഭയ്ക്കും പ്രത്യേകിച്ച് നിരണം ഭദ്രാസനത്തിനും അഭിമാനമായി നിലകൊള്ളുന്നു.അതുകൊണ്ട് ചെന്നിത്തലയച്ചനെ ഓർക്കുമ്പോൾ, എന്നെ മാമോദീസ മുക്കുകയും പിന്നീട് ദൈവാലയ ശുശ്രൂഷയിലേക്ക് കൈപിടിച്ചുയർത്തുകയും ചെയ്ത ആചാര്യനെ മാത്രമല്ല ഞാൻ കാണുന്നത്; എന്റെ മാതൃഇടവകയുടെ പ്രതിസന്ധിഘട്ടത്തിൽ അതിനൊപ്പം ഉറച്ചുനിന്ന ഒരു ധീരനായ ഇടയനെയും കൂടിയാണ് ഞാൻ ഓർക്കുന്നത്.പൂതിക്കോട്ട് തിരുമേനിയുടെ വലംകൈയായിതെക്കൻ ഭദ്രാസന മെത്രാപ്പോലീത്തയായിരുന്ന പുണ്യശ്ലോകനായ കുര്യാക്കോസ് മോർ കൂറിലോസ് തിരുമേനിയുടെ സന്തതസഹചാരിയായിരുന്നു അച്ചൻ.തെക്കൻ ഭദ്രാസനങ്ങളുടെ ദൈനംദിന പ്രവർത്തനങ്ങൾ മുന്നോട്ടുകൊണ്ടുപോകാൻ ബുദ്ധിമുട്ടുകൾ നേരിട്ടിരുന്ന കാലത്തും വൈദികരുടെ കുറവ് അനുഭവപ്പെട്ടിരുന്ന സാഹചര്യത്തിലും വിവിധ ദേവാലയങ്ങളിലെ വിശ്വാസികളുടെ ആത്മീയ ആവശ്യങ്ങൾ നിറവേറ്റുന്നതിനായി തിരുമേനിയെ സഹായിച്ചിരുന്ന ചുരുക്കം ചില വൈദികരിൽ മുൻനിരയിലായിരുന്നു ഡാനിയേൽ അച്ചൻ.കുര്യാക്കോസ് മോർ കൂറിലോസ് തിരുമേനിയുടെ അംബാസിഡർ കാർ, അടൂർ MMDITC തുടങ്ങി ഭദ്രാസനത്തിനുവേണ്ടി വിവിധ വസ്തുവകകളും സൗകര്യങ്ങളും സമ്പാദിക്കുന്നതിൽ തിരുമേനിയോടൊപ്പം അച്ചൻ വഹിച്ച പങ്കും വിസ്മരിക്കാനാവില്ല.തീർത്ഥാടനവഴികളിലും അദ്ദേഹത്തിന്റെ കൈയൊപ്പ്മഞ്ഞനിക്കര തീർത്ഥാടകർക്കായി തെക്കൻ ഭദ്രാസന കവാടമായ തിരുവല്ല രാമൻചിറയിൽ സ്വീകരണവും പൊതിച്ചോറും, ആറന്മുളയിൽ വിശ്രമവും ഭക്ഷണവും ഒരുക്കുന്ന പതിവിന് തുടക്കം കുറിക്കുന്നതിലും പുണ്യശ്ലോകനായ കുര്യാക്കോസ് മോർ കൂറിലോസ് തിരുമേനിയോടൊപ്പം വന്ദ്യ അച്ചൻ ശ്രദ്ധേയമായ പങ്കുവഹിച്ചു.മഞ്ഞനിക്കര ബാവായുടെ നാമത്തിൽ സ്ഥലം വാങ്ങി ആറന്മുളയിൽ കുരിശുപള്ളി സ്ഥാപിക്കുന്നതിനും പുണ്യശ്ലോകനായ പൂതിക്കോട്ട് തിരുമേനിയോടൊപ്പം തോളോടുതോൾ ചേർന്ന് അച്ചൻ പ്രവർത്തിച്ചു.വിശ്വാസത്തിനായി തെരുവിലിറങ്ങിയ പുരോഹിതൻഏകദേശം രണ്ടര പതിറ്റാണ്ട് സഭാ മാനേജിങ് കമ്മിറ്റിയിൽ പ്രവർത്തിച്ച വന്ദ്യ അച്ചൻ സഭയുടെ നിർണ്ണായകമായ പല പോരാട്ടങ്ങളിലും മുൻനിരയിലുണ്ടായിരുന്നു.1970-കളുടെ മധ്യത്തോടെ ആലുവ തൃക്കുന്നത്ത് സെമിനാരിയിൽ പോലീസ് സംവിധാനത്തിന്റെ ഒത്താശയോടെ മെത്രാൻകക്ഷികൾ പ്രശ്നമുണ്ടാക്കിയ സമയത്ത്, അന്നത്തെ അഭിവന്ദ്യ തോമസ് മോർ ദിവന്ന്യാസിയോസ് തിരുമേനി — പിന്നീട് ശ്രേഷ്ഠ മോർ ബസേലിയോസ് തോമസ് പ്രഥമൻ കാതോലിക്കാ ബാവ — ഉപവാസസമരം നടത്തിയപ്പോൾ തെക്കൻ ഭദ്രാസനങ്ങളിലെ വിവിധ ദേവാലയങ്ങളിൽനിന്നുള്ള വിശ്വാസികളെ ഏകോപിപ്പിച്ച് അച്ചൻ നിരവധി ദിവസങ്ങളിൽ സമരത്തിൽ പങ്കെടുത്തു. പോലീസ് ലാത്തിച്ചാർജും അറസ്റ്റും ഉൾപ്പെടെയുള്ള പ്രതിസന്ധികളെ അദ്ദേഹം നിർഭയം നേരിട്ടു.സഭ നൽകിയ ആദരവിന്റെ മുദ്രഅച്ചന്റെ സഭയെപ്രതിയുള്ള പ്രവർത്തനങ്ങളും കഷ്ടപ്പാടുകളും മാനിച്ച് പരിശുദ്ധ ഇഗ്നാത്തിയോസ് സഖാ പ്രഥമൻ പാത്രിയർക്കീസ് ബാവായുടെ മലങ്കരയിലെ പ്രഥമ സന്ദർശനവേളയിൽ, അച്ചൻ വികാരിയായിരുന്ന കാരക്കാട് സീനായിക്കുന്ന് ദൈവാലയത്തിൽവച്ച് അദ്ദേഹത്തിന് ‘പാത്രിയർക്കൽ മെഡൽ’ നൽകി ആദരിച്ചു.പരിശുദ്ധ മോറാന്റെ പ്രസ്തുത സന്ദർശനവേളയിൽ മണർകാട് സെന്റ് മേരീസ് പള്ളിയിൽ നടന്ന വിശുദ്ധ മൂറോൻ കൂദാശാ ശുശ്രൂഷയിൽ അംശവസ്ത്രം ധരിച്ച് ശുശ്രൂഷിച്ച പന്ത്രണ്ട് വൈദികരിൽ ഒരാളാകുവാനുള്ള ഭാഗ്യവും അച്ചന് ലഭിച്ചു.കർക്കശനായ ആചാര്യന്റെ കരുണയുള്ള മുഖംവിശ്വാസകാര്യങ്ങളിൽ ഡാനിയേൽ അച്ചൻ കർക്കശക്കാരനായിരുന്നു. എന്നാൽ ആ കർക്കശത ഒരിക്കലും മനുഷ്യബന്ധങ്ങളിൽ മതിലുകൾ സൃഷ്ടിച്ചില്ല.രാഷ്ട്രീയ നേതാക്കളുമായും സഹോദരീ സഭകളിലെ അംഗങ്ങളുമായും NSS, SNDP, മുസ്ലിം സമൂഹം തുടങ്ങി ഇതര സമുദായങ്ങളിലെ സഹോദരങ്ങളുമായും യാതൊരു ഉച്ചനീചത്വവുമില്ലാതെ അദ്ദേഹം സൗഹൃദം പുലർത്തി.സാമ്പത്തികമായി പിന്നാക്കം നിൽക്കുന്നവരെ സഭ, ജാതി, മത, വർഗ്ഗ, വർണ്ണ വ്യത്യാസമില്ലാതെ സഹായിച്ചു. ചികിത്സ, ഉന്നതവിദ്യാഭ്യാസം, തൊഴിൽ തുടങ്ങി അനേകം ആവശ്യങ്ങളിൽ സാധാരണക്കാരുടെ ആശ്രയമായിരുന്നു അച്ചൻ. സാധുജന സംരക്ഷണത്തിൽ അദ്ദേഹത്തിന് പ്രത്യേക താൽപര്യമുണ്ടായിരുന്നു.ചെന്നിത്തലയിൽ എ.ഡി. 905-ൽ കബറടങ്ങിയ പരിശുദ്ധ റാബാൻ റമ്പാച്ചന്റെ കബറിട ട്രസ്റ്റിന്റെ പ്രസിഡന്റായി ദീർഘകാലം പ്രവർത്തിച്ച അച്ചൻ ചെന്നിത്തല YMCA-യുടെ ആദ്യകാല രക്ഷാധികാരിയുമായിരുന്നു.രോഗത്തിനും തളർത്താനാകാത്ത സഭാസ്നേഹം2000-ൽ കട്ടച്ചിറയിൽ വീണ്ടും പ്രതിസന്ധിയുണ്ടായപ്പോൾ സ്വന്തം രോഗാവസ്ഥ പോലും വകവയ്ക്കാതെ പുണ്യശ്ലോകനായ ബന്യാമിൻ തിരുമേനിയോടൊപ്പം അച്ചൻ അണിനിരന്നു.1975-ൽ കട്ടച്ചിറ പള്ളിയുടെ വികാരിയായിരുന്ന കാലംമുതൽ ആ ഇടവകയുമായി അദ്ദേഹത്തിനുണ്ടായിരുന്ന ആത്മബന്ധത്തിന്റെ തുടർച്ചയായിരുന്നു അത്.എന്നെ മാമോദീസ മുക്കിയ കൈകൾ...ഈ അനുസ്മരണത്തിലെ ഏറ്റവും വ്യക്തിപരമായ അധ്യായം എനിക്ക് ഇതാണ്.ചെന്നിത്തലയച്ചൻ എനിക്ക് ചരിത്രത്തിലെ ഒരു വൈദികനോ സഭാപോരാട്ടങ്ങളിലൂടെ കേട്ടറിഞ്ഞ ഒരു വ്യക്തിത്വമോ മാത്രമല്ല. എന്റെ സ്വന്തം ക്രിസ്തീയജീവിതത്തിന്റെ ആരംഭത്തിലും ദൈവാലയ ശുശ്രൂഷയിലേക്കുള്ള എന്റെ ആദ്യചുവടുകളിലും അദ്ദേഹത്തിന്റെ കരസ്പർശമുണ്ട്.എന്നെ വിശുദ്ധ മാമോദീസയിലൂടെ ക്രിസ്തുവിന്റെ സഭയിലേക്ക് ചേർത്തത് വന്ദ്യ ഡാനിയേൽ അച്ചനായിരുന്നു.അതുകൊണ്ടുതന്നെ അച്ചനെക്കുറിച്ചുള്ള എന്റെ ഓർമ്മകൾക്ക് മറ്റൊരു ആഴമുണ്ട്. എന്നെ മാമോദീസ മുക്കിയ ആ കൈകൾ തന്നെയാണ് പിന്നീട് ദൈവാലയ ശുശ്രൂഷയിലേക്കും എന്നെ കൈപിടിച്ചുയർത്തിയത്.വിശുദ്ധ മദ്ബഹയോടും ആരാധനയോടും അച്ചനുണ്ടായിരുന്ന നിഷ്ഠ നേരിട്ട് അനുഭവിച്ചറിയാൻ എനിക്കു കഴിഞ്ഞിട്ടുണ്ട്. ശുശ്രൂഷയിലെ തെറ്റുകളോട് അച്ചൻ കർക്കശനായിരുന്നു. എന്നാൽ ആ കർക്കശതയുടെ പിന്നിൽ മദ്ബഹയോടുള്ള അഗാധമായ സ്നേഹവും ശുശ്രൂഷയുടെ വിശുദ്ധി അടുത്ത തലമുറയ്ക്ക് പകർന്നുകൊടുക്കണമെന്ന ആചാര്യഹൃദയവുമായിരുന്നു.ഇന്ന് ആ ബന്ധത്തെ തിരിഞ്ഞുനോക്കുമ്പോൾ, എന്റെ വിശ്വാസജീവിതത്തിന്റെ ആരംഭത്തിലും ദൈവാലയ ശുശ്രൂഷയുടെ തുടക്കത്തിലും ഒരേ ആചാര്യന്റെ കൈകൾ ഉണ്ടായിരുന്നത് ദൈവം എനിക്കു നൽകിയ വലിയ അനുഗ്രഹങ്ങളിലൊന്നായി ഞാൻ കാണുന്നു.ഒരു ആചാര്യൻ യാത്രയാകുമ്പോൾ...2001 ആഗസ്റ്റ് 22-ന് ഈ ഭൂമിയിലെ തന്റെ സുവിശേഷദൗത്യവും വിശ്വാസപോരാട്ടവും പൂർത്തീകരിച്ച് വന്ദ്യ ടി. കെ. ഡാനിയേൽ കശ്ശീശ തന്റെ നാഥങ്കലേക്ക് വാങ്ങിപ്പോയി.ദൈവസഭയ്ക്കായി അക്ഷീണം പ്രവർത്തിച്ച ആ വൈദികശ്രേഷ്ഠന്റെ ഭൗതികശരീരം ആഗസ്റ്റ് 28-ന് ചെന്നിത്തല സെന്റ് ജോർജ് ഹോറേബ് യാക്കോബായ സുറിയാനി പള്ളിയുടെ വടക്കേമുറ്റത്ത് കബറടക്കി.കാൽനൂറ്റാണ്ടിനിപ്പുറവും അണയാത്ത ഓർമ്മഇരുപത്തിയഞ്ചു വർഷങ്ങൾ കടന്നുപോയിരിക്കുന്നു. എന്നാൽ ചെന്നിത്തലയച്ചൻ നടന്നുപോയ വഴിത്താരകൾ മാഞ്ഞിട്ടില്ല.അദ്ദേഹം സംരക്ഷിച്ച വിശ്വാസത്തിൽ, പടുത്തുയർത്തിയ ദേവാലയങ്ങളിൽ, ചേർത്തുനിർത്തിയ വിശ്വാസസമൂഹങ്ങളിൽ, കൈപിടിച്ചുയർത്തിയ ശുശ്രൂഷകരിൽ — ആ ആചാര്യന്റെ ഓർമ്മ ഇന്നും ജീവിക്കുന്നു.എന്റെ ജീവിതത്തിലാകട്ടെ ആ ഓർമ്മയ്ക്ക് അതിലും വ്യക്തിപരമായൊരു മുഖമുണ്ട്.എന്നെ മാമോദീസ മുക്കിയ ആചാര്യൻ...എന്നെ ദൈവാലയ ശുശ്രൂഷയിലേക്ക് കൈപിടിച്ചുയർത്തിയ ഗുരു...എന്റെ മാതൃഇടവക പ്രതിസന്ധിയിലായപ്പോൾ അതിനൊപ്പം ഉറച്ചുനിന്ന ഇടയൻ...എന്റെ ക്രിസ്തീയജീവിതത്തിന്റെ ആരംഭത്തിലും ശുശ്രൂഷാജീവിതത്തിന്റെ ആദ്യചുവടുകളിലും, എന്റെ മാതൃഇടവകയുടെ ചരിത്രത്തിലും പതിഞ്ഞ ആ ആചാര്യകരങ്ങളുടെ അനുഗ്രഹസ്മരണയ്ക്കു മുന്നിൽ സ്നേഹാദരങ്ങളോടെ ശിരസ്സുനമിക്കുന്നു.ആചാര്യേശാ! മശീഹാ —കൂദാശകളർപ്പിച്ച ഈ ആചാര്യനേകുക പുണ്യം;നാഥാ, സ്തോത്രം.നമ്മുടെ പ്രിയപ്പെട്ട ചെന്നിത്തലയച്ചന്റെ പ്രാർത്ഥനയും മദ്ധ്യസ്ഥതയും നമ്മുടെ കർത്താവിന്റെ സന്നിധിയിൽ നമുക്ക് അഭയവും അനുഗ്രഹവുമായി ഭവിക്കട്ടെ.തോമസ് ഡാനിയേൽ കരിമ്പനയ്ക്കൽ (ഷെവലിയാർ)

Comments (0)

Related Stories