സഹോദരതുല്യമായ സ്നേഹബന്ധത്തിന് സാക്ഷിയായി ക്ലീമിസ് ബാവായ്ക്ക് രജതജൂബിലി ആശംസകൾ

മലങ്കര സുറിയാനി കത്തോലിക്കാ സഭയുടെ മേജർ ആർച്ച് ബിഷപ്പ് കർദിനാൾ മോർ ബസേലിയോസ് ക്ലീമിസ് കാതോലിക്കാ ബാവായുടെ മെത്രാഭിഷേക രജതജൂബിലിയോടനുബന്ധിച്ച് യാക്കോബായ സുറിയാനി സഭയുടെ ശ്രേഷ്ഠ കാതോലിക്കാ ബാവാ ആബൂൻ മോർ ബസേലിയോസ് ജോസഫ് ബാവ ആശംസകളും പ്രാർഥനകളും നേർന്നു. ആത്മീയ ശുശ്രൂഷയ്ക്കപ്പുറം സഭകളും സമൂഹവും തമ്മിലുള്ള സൗഹൃദത്തിനും സഹവർത്തിത്വത്തിനും നേതൃത്വം നൽകുന്ന ക്ലീമിസ് ബാവായുമായുള്ള തന്റെ ആഴത്തിലുള്ള ആത്മബന്ധവും, യാക്കോബായ സഭയുടെ പ്രതിസന്ധിഘട്ടങ്ങളിൽ അദ്ദേഹം നൽകിയ സ്നേഹപൂർവമായ പിന്തുണയും അനുസ്മരിച്ചുകൊണ്ടാണ് ആശംസാസന്ദേശം. 2025 മാർച്ച് 25ന് ബെയ്റൂട്ടിലെ പാത്രിയർക്കാ ആസ്ഥാനത്ത് നടന്ന ശ്രേഷ്ഠ കാതോലിക്കാ ബാവായുടെ സ്ഥാനാരോഹണ ശുശ്രൂഷയിൽ ക്ലീമിസ് ബാവാ നേരിട്ട് സന്നിഹിതനായ അനുഭവവും സന്ദേശത്തിൽ പ്രത്യേകം പരാമർശിക്കുന്നു. ക്രൈസ്തവ മൂല്യങ്ങൾ, മാനവികത, ഐക്യം, സാഹോദര്യം, സമാധാനം എന്നിവയ്ക്കായി ക്ലീമിസ് ബാവാ നടത്തുന്ന സേവനങ്ങളെ അഭിനന്ദിച്ചുകൊണ്ട്, സഭയെയും സമൂഹത്തെയും ഇനിയും ദീർഘകാലം സ്നേഹത്തോടും ജ്ഞാനത്തോടും കൂടി നയിക്കാൻ ദൈവം കൃപയും ശക്തിയും നൽകട്ടെയെന്ന പ്രാർഥനയോടെയാണ് സന്ദേശം സമാപിക്കുന്നത്.കാതോലിക്ക ബാവായുടെ സന്ദേശംസഹോദരതുല്യമായ സ്നേഹബന്ധം; മെത്രാഭിഷേക രജത ജൂബിലി ആശംസകൾമലങ്കര സുറിയാനി കത്തോലിക്കാ സഭയുടെ മേജർ ആർച്ച് ബിഷപ്പ് കർദിനാൾ മോർ ബസേലിയോസ് ക്ലീമിസ് കാതോലിക്കാ ബാവായുടെ മെത്രാഭിഷേക രജത ജൂബിലിയുടെ ഈ അനുഗ്രഹീത വേളയിൽ ഹൃദയം നിറഞ്ഞ ആശംസകളും പ്രാർത്ഥനകളും നേരുന്നു.കഴിഞ്ഞ കാൽനൂറ്റാണ്ടുകാലമായി സഭയ്ക്കും സമൂഹത്തിനും അദ്ദേഹം പകർന്നുനൽകുന്ന പ്രകാശപൂർണ്ണമായ ആത്മീയ മാർഗദർശനവും സഹജീവികളോടുള്ള കരുണയും സേവനസന്നദ്ധതയും ഏവർക്കും വലിയ പ്രചോദനമാണ്. വിശ്വാസത്തിലും ആത്മീയതയിലും ഉറച്ചുനിന്നുകൊണ്ട്, സമൂഹത്തിന്റെ വിവിധ മേഖലകളിൽ സജീവമായി ഇടപെട്ടും എല്ലാവരെയും ചേർത്തുനിർത്തിയും അദ്ദേഹം നടത്തുന്ന ശുശ്രൂഷ ഏറെ ശ്രദ്ധേയമാണ്.അഭിവന്ദ്യ ക്ലീമിസ് ബാവായുമായി എനിക്ക് ഏറെ ആഴത്തിലുള്ള ആത്മബന്ധമുണ്ട്. സഹോദരതുല്യമായ സ്നേഹവും സൗഹൃദവുമാണ് ഞങ്ങൾ തമ്മിലുള്ളത്. യാക്കോബായ സുറിയാനി സഭ വിവിധ പ്രതിസന്ധിഘട്ടങ്ങളിലൂടെ കടന്നുപോയപ്പോഴെല്ലാം ഒപ്പംനിന്ന് അദ്ദേഹം നൽകിയ സ്നേഹവും കരുതലും പിന്തുണയും നന്ദിയോടെ സ്മരിക്കുന്നു.2025 മാർച്ച് 25-ന് ബെയ്റൂട്ടിലെ പാത്രിയർക്കാ ആസ്ഥാനത്ത് നടന്ന എൻ്റെ സ്ഥാനാരോഹണ ശുശ്രൂഷയിൽ ക്ലീമിസ് ബാവാ നേരിട്ടെത്തി സന്നിഹിതനായത്, സുറിയാനി സഭയോടും അതിൻ്റെ പാരമ്പര്യത്തോടുമുള്ള അദ്ദേഹത്തിന്റെ ആഴമായ ആത്മബന്ധത്തിന്റെയും സ്നേഹത്തിന്റെയും തെളിവാണ്. ആ സാന്നിധ്യം വ്യക്തിപരമായി എനിക്ക് ഏറെ വിലപ്പെട്ടതും ഹൃദയസ്പർശിയുമായ അനുഭവമായിരുന്നു.ആത്മീയ ശുശ്രൂഷയുടെ അതിരുകൾക്കപ്പുറം പൊതുസമൂഹത്തിന്റെ വിവിധ മേഖലകളിൽ മോർ ക്ലീമിസ് ബാവാ നടത്തുന്ന സജീവമായ ഇടപെടലുകൾ ഏറെ പ്രശംസനീയമാണ്. കേരളത്തിൽ മാത്രമല്ല, രാജ്യത്തുടനീളം ക്രൈസ്തവ സഭകളുടെ കരുത്തുറ്റ ശബ്ദമായി മാറാനും ക്രൈസ്തവ മൂല്യങ്ങൾക്കും മാനവികതയ്ക്കും വേണ്ടി ശക്തമായി നിലകൊള്ളാനും അദ്ദേഹത്തിന് സാധിച്ചിട്ടുണ്ട്. വിശ്വാസത്തിന്റെ അതിർവരമ്പുകൾക്കപ്പുറത്തേക്ക് മനുഷ്യത്വത്തിന്റെയും സാഹോദര്യത്തിന്റെയും വിശാലമായ കാഴ്ചപ്പാടോടെയാണ് അദ്ദേഹം എന്നും മുന്നോട്ടുപോകുന്നത്.സമൂഹത്തിൽ ഐക്യത്തിന്റെയും സ്നേഹത്തിന്റെയും പരസ്പര സഹകരണത്തിന്റെയും സന്ദേശം ഉയർത്തിപ്പിടിക്കുന്നതിൽ ക്ലീമിസ് ബാവ എന്നും ശ്രദ്ധേയമായ പങ്കുവഹിക്കുന്നു. സൗഹൃദത്തിലൂടെയും സംവാദത്തിലൂടെയും വ്യത്യസ്ത വിഭാഗങ്ങളെ ചേർത്തുനിർത്താനുള്ള അദ്ദേഹത്തിന്റെ സമീപനം ഇന്നത്തെ സമൂഹത്തിന് വലിയ മാതൃകയാണ്. മതപരവും രാഷ്ട്രീയവുമായ ഭിന്നതകൾക്കതീതമായി എല്ലാവരോടും ഒരുപോലെ സംവദിക്കുകയും പരസ്പര സഹവർത്തിത്വത്തിന്റെയും സമാധാനത്തിന്റെയും സന്ദേശം ഉയർത്തിപ്പിടിക്കുകയും ചെയ്യുന്ന അദ്ദേഹത്തിന്റെ നിലപാടുകൾ ഇന്നത്തെ കാലഘട്ടത്തിൽ ഏറെ പ്രസക്തമാണ്.കേരളത്തിന്റെ സാമൂഹിക, സാംസ്കാരിക, ആത്മീയ മേഖലകളിൽ അദ്ദേഹം നൽകിയ സംഭാവനകൾ വിലമതിക്കാനാവാത്തതാണ്. സഭയെയും സമൂഹത്തെയും ഒരുപോലെ ചേർത്തുപിടിക്കുന്ന അദ്ദേഹത്തിന്റെ നേതൃത്വവും ദർശനവും ഇനിയും അനേകം വർഷങ്ങൾ ജനങ്ങൾക്ക് വഴികാട്ടിയാകട്ടെ.മോർ ക്ലീമിസ് ബാവായെ ദൈവം സമൃദ്ധമായ ആയുരാരോഗ്യസൗഖ്യങ്ങളാൽ അനുഗ്രഹിക്കട്ടെ. ഇനിയും ദീർഘകാലം സഭയെയും സമൂഹത്തെയും സ്നേഹത്തോടും ജ്ഞാനത്തോടും കൂടി നയിക്കുവാൻ സർവ്വശക്തനായ ദൈവം ശക്തിയും കൃപയും നൽകട്ടെയെന്ന് ഹൃദയപൂർവ്വം പ്രാർത്ഥിക്കുന്നു.ഹൃദയം നിറഞ്ഞ മെത്രാഭിഷേക രജത ജൂബിലി ആശംസകൾ!പ്രാർത്ഥനാശംസകളോടെ,ബസേലിയോസ് ജോസഫ് കാതോലിക്ക

Comments (0)

Related Stories