മണർകാട് കത്തീഡ്രലിൽ ചരിത്രപ്രസിദ്ധമായ എട്ടുനോമ്പ് പെരുന്നാൾ സെപ്റ്റംബർ 1 മുതൽ

മണർകാട് ● പുണ്യപിതാക്കന്മാർക്ക് വെളിവായ ദർശനത്തിന്റെ അടിസ്ഥാനത്തിൽ സ്ഥാപിതമായതും ചരിത്രപ്രസിദ്ധമായ എട്ടുനോമ്പ് പെരുന്നാളിന്റെ ആരംഭസ്ഥാനവും ആഗോള മരിയൻ തീർഥാടനകേന്ദ്രവുമായ മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിലെ 2026-ലെ എട്ടുനോമ്പ് പെരുന്നാൾ സെപ്റ്റംബർ 1 മുതൽ 8 വരെ ഭക്തിനിർഭരമായ ചടങ്ങുകളോടെ നടക്കും.പെരുന്നാളിനോടനുബന്ധിച്ച് സെപ്റ്റംബർ 1 മുതൽ 14 വരെയുള്ള ദിവസങ്ങളിൽ വിവിധ ആത്മീയ ശുശ്രൂഷകൾ ക്രമീകരിച്ചിട്ടുണ്ട്. പരിശുദ്ധ സഭയുടെ ശ്രേഷ്ഠ കാതോലിക്ക ബാവായും അഭിവന്ദ്യ പിതാക്കന്മാരും വിവിധ ദിവസങ്ങളിലെ പെരുന്നാൾ ശുശ്രൂഷകൾക്ക് മുഖ്യകാർമികത്വം വഹിക്കും.ദൈവമാതാവായ പരിശുദ്ധ കന്യകാമറിയത്തിന്റെ മധ്യസ്ഥതയിൽ അനുഗ്രഹം തേടി കേരളത്തിന്റെ വിവിധ ഭാഗങ്ങളിൽനിന്നും രാജ്യത്തിന്റെ വിവിധ പ്രദേശങ്ങളിൽനിന്നും ആയിരക്കണക്കിന് വിശ്വാസികളാണ് ഓരോ വർഷവും മണർകാട് കത്തീഡ്രലിലെ എട്ടുനോമ്പ് പെരുന്നാളിൽ പങ്കെടുക്കുന്നത്. വിശ്വാസത്തിന്റെയും പ്രാർഥനയുടെയും ആത്മീയ കൂട്ടായ്മയുടെയും വലിയ സംഗമമായി മാറുന്ന പെരുന്നാളിനായി കത്തീഡ്രലിൽ വിപുലമായ ക്രമീകരണങ്ങൾ ഒരുക്കിവരുന്നു. പെരുന്നാൾ ദിവസങ്ങളിൽ നടക്കുന്ന വിശുദ്ധ കുർബാന, പ്രാർഥനകൾ, വചനശുശ്രൂഷകൾ, പ്രദക്ഷിണം തുടങ്ങിയ വിവിധ ആത്മീയ ശുശ്രൂഷകളിൽ വിശ്വാസികൾക്ക് ഭക്തിപൂർവം പങ്കുചേരാനുള്ള സൗകര്യങ്ങൾ ഒരുക്കും. പെരുന്നാൾ ശുശ്രൂഷകളിൽ പങ്കെടുത്ത് ദൈവമാതാവിന്റെ മധ്യസ്ഥതയാൽ അനുഗ്രഹം പ്രാപിക്കാൻ ഏവരെയും കത്തീഡ്രൽ അധികൃതർ സ്വാഗതം ചെയ്തു.

Comments (0)

Related Stories