ദിൽഷാദ് ഗാർഡൻ സെന്റ് മേരീസ് പള്ളിയിൽ വാങ്ങിപ്പ് പെരുന്നാൾ; സിൽവർ ജൂബിലി ആഘോഷങ്ങൾക്ക് തുടക്കം

ദിൽഷാദ് ഗാർഡൻ ● ഡൽഹി ഭദ്രാസനത്തിലെ ദിൽഷാദ് ഗാർഡൻ സെന്റ് മേരീസ് യാക്കോബായ സുറിയാനി പള്ളിയിൽ വിശുദ്ധ ദൈവമാതാവിന്റെ വാങ്ങിപ്പ് പെരുന്നാളും ഇടവകയുടെ സിൽവർ ജൂബിലി ആഘോഷങ്ങളുടെ ഉദ്ഘാടനവും ഭക്തിനിർഭരമായി നടന്നു. ഡൽഹി ഭദ്രാസനാധിപൻ അഭിവന്ദ്യ കുര്യാക്കോസ് മോർ യൗസേബിയോസ് മെത്രാപ്പോലീത്ത മുഖ്യകാർമികത്വം വഹിച്ചു.വിശുദ്ധ കുർബാനയ്ക്കുശേഷം നടന്ന ചടങ്ങിൽ ഇടവകയുടെ സിൽവർ ജൂബിലി വർഷത്തിന്റെ ലോഗോ ‘HESNO 2027’ അഭിവന്ദ്യ കുര്യാക്കോസ് മോർ യൗസേബിയോസ് മെത്രാപ്പോലീത്ത പ്രകാശനം ചെയ്തു. ജൂബിലി ആഘോഷങ്ങളുടെ ഭാഗമായി ഇടവകയിൽ വിവിധ ആത്മീയ, സാമൂഹിക, സാംസ്കാരിക പരിപാടികൾ സംഘടിപ്പിക്കുമെന്ന് ഭാരവാഹികൾ അറിയിച്ചു.മെത്രാപ്പോലീത്ത സ്ഥാനാരോഹണത്തിന്റെ 20 വർഷം പൂർത്തിയാക്കിയ അഭിവന്ദ്യ കുര്യാക്കോസ് മോർ യൗസേബിയോസ് മെത്രാപ്പോലീത്തയെയും, കഴിഞ്ഞ എട്ടുവർഷമായി ഡൽഹി ഭദ്രാസന സൺഡേ സ്കൂൾ സെക്രട്ടറിയായി സേവനം അനുഷ്ഠിച്ച ഇടവകാംഗം ജോബി കെ.വി.യെയും ചടങ്ങിൽ ആദരിച്ചു.ഇടവകയിൽ നിന്ന് പത്താം ക്ലാസ്, പ്ലസ് ടു, ജെ.എസ്.എസ്.എൽ.സി. പരീക്ഷകളിൽ വിജയം നേടിയ വിദ്യാർഥികളെയും ചടങ്ങിൽ അനുമോദിച്ചു. പഠനരംഗത്ത് മികച്ച നേട്ടം കൈവരിച്ച വിദ്യാർഥികളെ ആദരിച്ചത് പുതിയ തലമുറയ്ക്ക് പ്രോത്സാഹനമായി.വികാരി ഫാ. തേജസ് ചെറിയാൻ, ട്രസ്റ്റി കിരൺ കുര്യാക്കോസ്, കൺവീനർ ജോഷി കുര്യൻ പോൾ, സെക്രട്ടറി ജോസ് ടി. ചെറിയാൻ എന്നിവർ പരിപാടികൾക്ക് നേതൃത്വം നൽകി.ഡൽഹി ഭദ്രാസനത്തിലെ ഡൽഹി മേഖലയിലെ വിവിധ ദൈവാലയങ്ങളിൽ നിന്നുള്ള വൈദികരും നൂറുകണക്കിന് വിശ്വാസികളും പെരുന്നാൾ ശുശ്രൂഷകളിലും ജൂബിലി ഉദ്ഘാടന ചടങ്ങുകളിലും പങ്കെടുത്തു. വിശുദ്ധ ദൈവമാതാവിന്റെ മധ്യസ്ഥതയിൽ ഇടവകയുടെ സിൽവർ ജൂബിലി വർഷം ആത്മീയമായി അനുഗ്രഹീതവും ഫലപ്രദവുമാകട്ടെയെന്ന പ്രാർഥനയോടെയാണ് ആഘോഷങ്ങൾക്ക് തുടക്കമായത്.

Comments (0)

Related Stories