പുണ്യശ്ലോകനായ ബസേലിയോസ് പൗലോസ് ദ്വിതീയൻ കാതോലിക്കാ ബാവായുടെ 30-ാം ശ്രാദ്ധപ്പെരുന്നാൾ ആഗസ്റ്റ് 31, സെപ്റ്റംബർ 1 തീയതികളിൽ

പുത്തൻകുരിശ് ● മലങ്കര യാക്കോബായ സുറിയാനി ക്രിസ്ത്യാനി സഭയുടെ പുണ്യശ്ലോകനായ ശ്രേഷ്ഠ കാതോലിക്കാ ബാവാ ബസേലിയോസ് പൗലോസ് ദ്വിതീയന്റെ 30-ാം അനുഗ്രഹീത ശ്രാദ്ധപ്പെരുന്നാൾ ആഗസ്റ്റ് 31, സെപ്റ്റംബർ 1 തീയതികളിൽ മലേക്കുരിശ് ദയറായിൽ ഭക്ത്യാദരപൂർവം ആചരിക്കും. അന്ത്യോഖ്യാ സിംഹാസനത്തിൻ കീഴിലുള്ള യാക്കോബായ സുറിയാനി സഭയെ പ്രതിസന്ധികളുടെ കാലഘട്ടങ്ങളിൽ ത്യാഗപൂർവം നയിച്ച പുണ്യശ്ലോകനായ കാതോലിക്കാ ബാവായുടെ കബറിടം സ്ഥിതി ചെയ്യുന്ന മലേക്കുരിശ് ദയറായിലാണ് രണ്ടുദിവസങ്ങളിലായി ശ്രാദ്ധപ്പെരുന്നാൾ ശുശ്രൂഷകൾ നടക്കുക.മലേക്കുരിശ് ദയറാധിപൻ അഭിവന്ദ്യ കുര്യാക്കോസ് മോർ ദിയസ്കോറോസ് മെത്രാപ്പോലീത്തായുടെ നേതൃത്വത്തിൽ പെരുന്നാളിനുള്ള ക്രമീകരണങ്ങൾ പുരോഗമിച്ചുവരുന്നതായി ശ്രേഷ്ഠ കാതോലിക്കാ ബാവാ ബസേലിയോസ് ജോസഫ് കാതോലിക്കായുടെ പേരിൽ പുത്തൻകുരിശ് പാത്രിയർക്കാസെന്ററിൽ നിന്ന് ആഗസ്റ്റ് 12ന് പുറത്തിറക്കിയ സർക്കുലറിൽ അറിയിച്ചു.ആഗസ്റ്റ് 31 തിങ്കളാഴ്ച വിവിധ പ്രദേശങ്ങളിൽ നിന്നായി മലേക്കുരിശ് ദയറായിൽ എത്തിച്ചേരുന്ന തീർഥാടക സംഘങ്ങൾക്ക് സ്വീകരണം നൽകും. തുടർന്ന് സന്ധ്യാപ്രാർഥനയും കബറിങ്കൽ ധൂപപ്രാർഥനയും നടക്കും. സഭയുടെ വിവിധ ഭാഗങ്ങളിൽനിന്ന് വിശ്വാസികൾ തീർഥാടകരായി എത്തിച്ചേരുന്നതിനാൽ ദയറായിൽ വിപുലമായ ക്രമീകരണങ്ങളാണ് ഒരുക്കുന്നത്.സെപ്റ്റംബർ 1 ചൊവ്വാഴ്ച രാവിലെ വിശുദ്ധ മൂന്നിന്മേൽ കുർബാനയും കബറിങ്കൽ ധൂപപ്രാർഥനയും നടക്കും. പെരുന്നാളുമായി ബന്ധപ്പെട്ട കൂടുതൽ ക്രമീകരണങ്ങളും വിശദവിവരങ്ങളും വിവിധ മാധ്യമങ്ങളിലൂടെയും മലേക്കുരിശ് ദയറായിൽനിന്നും അറിയിക്കുമെന്ന് സഭാ നേതൃത്വം അറിയിച്ചു. വിശുദ്ധ സഭയുടെ പ്രതിസന്ധിഘട്ടങ്ങളിൽ സഭയെ സ്നേഹത്തോടെയും ത്യാഗപൂർവവും നയിച്ച പുണ്യശ്ലോകനായ ബസേലിയോസ് പൗലോസ് ദ്വിതീയൻ കാതോലിക്കാ ബാവായുടെ ഓർമകൾ പുതുതലമുറയ്ക്ക് പകർന്നുനൽകുന്നതിനും അദ്ദേഹത്തിന്റെ ആത്മീയ ജീവിതവും സഭാസേവനവും അനുസ്മരിക്കുന്നതിനും ശ്രാദ്ധപ്പെരുന്നാൾ അവസരമാകും.

Comments (0)

Related Stories