“സ്വാതന്ത്ര്യം അവകാശം മാത്രമല്ല, ഉത്തരവാദിത്വവും” — ബസേലിയോസ് ജോസഫ് കാതോലിക്ക ബാവ

ശ്രേഷ്ഠ ബാവയുടെ സ്വാതന്ത്ര്യദിന സന്ദേശം :നമ്മുടെ രാജ്യം, നമ്മുടെ അഭിമാനംനമ്മുടെ മഹത്തായ രാജ്യം 80-ാം സ്വാതന്ത്ര്യദിനം ആഘോഷിക്കുകയാണ്. രാജ്യത്തിന്റെ സ്വാതന്ത്ര്യത്തിനും അഭിമാനത്തിനും വേണ്ടി പോരാടി വീരമൃത്യു വരിച്ച അനേകായിരം ധീരദേശസ്നേഹികളുടെ പാവനസ്മരണകൾക്ക് മുന്നിൽ പ്രണാമം അർപ്പിക്കുന്നു.പൂർവികർ പോരാടി നേടിയ സ്വാതന്ത്ര്യം വെറുമൊരു ചരിത്രസ്മരണയല്ല; ജനാധിപത്യത്തിന്റെ കാവലാളുകളായി ഓരോ തലമുറയും ഏറ്റെടുക്കേണ്ട മഹത്തായ ഉത്തരവാദിത്വം കൂടിയാണ്. സ്വാതന്ത്ര്യദിനം ആഘോഷിക്കുമ്പോൾ, സ്വാതന്ത്ര്യം നമുക്ക് പകർന്നുനൽകുന്ന അവകാശങ്ങളോടൊപ്പം അതിനെ സംരക്ഷിക്കാനുള്ള കടമയും നാം ഓർക്കണം. നമ്മുടെ ഐക്യവും ഭരണഘടനാ മൂല്യങ്ങളും കാത്തുസൂക്ഷിക്കുക എന്നത് ഓരോ പൗരന്റെയും ഉത്തരവാദിത്വമാണ്.സ്വാതന്ത്ര്യത്തിന്റെ അനുഭവവും അവകാശങ്ങളും സമൂഹത്തിലെ എല്ലാ വിഭാഗം ജനങ്ങൾക്കും ഒരുപോലെ ലഭ്യമാകണം. ഇന്ത്യൻ ഭരണഘടന വിഭാവനം ചെയ്യുന്ന മഹത്തായ മൂല്യങ്ങൾ പൂർണമായി സംരക്ഷിക്കപ്പെടുകയും വേണം. ആരുടെയെങ്കിലും സ്വാതന്ത്ര്യം എവിടെയെങ്കിലും നിഷേധിക്കപ്പെടുന്നത് ഭരണഘടനയ്ക്ക് ഏൽക്കുന്ന ഗുരുതരമായ മുറിവായിരിക്കും.ഭരണഘടനാ മൂല്യങ്ങൾക്ക് യാതൊരു വിധത്തിലുള്ള ക്ഷതവും ഏൽക്കാൻ അനുവദിക്കാതെ നമ്മുടെ സ്വാതന്ത്ര്യം സംരക്ഷിക്കേണ്ടത് ഓരോ പൗരന്റെയും കടമയാണ്. ജനാധിപത്യത്തിന്റെയും ഭരണഘടനയുടെയും അന്തസ്സും ആത്മാവും കാത്തുസൂക്ഷിക്കേണ്ടത് നമ്മുടെയെല്ലാം ഉത്തരവാദിത്വമാണ്.മതത്തിന്റെയും ജാതിയുടെയും പേരിൽ മനുഷ്യരെ വിഭജിക്കാനുള്ള ശ്രമങ്ങളെ അതിജീവിച്ച്, ജനാധിപത്യം, മതേതരത്വം, തുല്യത എന്നീ മഹത്തായ മൂല്യങ്ങൾ ഉയർത്തിപ്പിടിച്ച് നമുക്ക് ഒരുമിച്ച് മുന്നേറാം. രാജ്യത്തിന്റെ മഹത്തായ പാരമ്പര്യങ്ങളും വൈവിധ്യങ്ങളും സംരക്ഷിച്ച്, ഇന്ത്യൻ പൗരൻ എന്ന നിലയിലുള്ള ആത്മാഭിമാനം ഉയർത്തിപ്പിടിക്കാം.സ്വാതന്ത്ര്യത്തിന്റെ വെളിച്ചം എന്നും നമ്മെ നയിക്കട്ടെ. സ്വാതന്ത്ര്യത്തിന്റെ മഹത്വവും രാജ്യത്തിന്റെ അഭിമാനവും ഹൃദയത്തിൽ ചേർത്തുപിടിച്ച്, രാജ്യത്തിന്റെ ഐക്യത്തിനും സമാധാനത്തിനും പുരോഗതിക്കും വേണ്ടി നമുക്ക് ഒന്നായി കൈകോർക്കാം.ഏവർക്കും ഹൃദയം നിറഞ്ഞ സ്വാതന്ത്ര്യദിനാശംസകൾ! സ്നേഹാദരങ്ങളോടെ,ബസേലിയോസ് ജോസഫ് കാതോലിക്ക

Comments (0)

Related Stories