ഹൈക്കോടതി വിധി സഭയുടെ നീതിപൂർവമായ പോരാട്ടത്തിന് ശക്തിപകരുന്നു; സ്വാഗതം ചെയ്ത് ഡോ. കുര്യാക്കോസ് മോർ തെയോഫിലോസ് മെത്രാപ്പോലീത്ത

പുത്തൻകുരിശ് ● മുഖത്തല സെന്റ് സ്റ്റീഫൻസ്, ചെറുകുന്നം സെന്റ് തോമസ്, മംഗലം ഡാം സെന്റ് മേരീസ്, എരക്കുംചിറ സെന്റ് മേരീസ്, ഓടക്കാലി സെന്റ് മേരീസ്, ആട്ടിൻകുന്ന് സെന്റ് മേരീസ് എന്നീ ആറ് ദൈവാലയങ്ങളുമായി ബന്ധപ്പെട്ട കേസിൽ കേരള ഹൈക്കോടതി പുറപ്പെടുവിച്ച വിധിയെ മലങ്കര യാക്കോബായ സുറിയാനി സഭ സ്വാഗതം ചെയ്തു. സഭയുടെ നീതിയുടെയും നിലനിൽപ്പിന്റെയും പോരാട്ടത്തിന് വിധി കൂടുതൽ നിയമപരമായ ശക്തി നൽകുന്നതാണെന്ന് യാക്കോബായ സുറിയാനി സഭ മീഡിയാ സെൽ ചെയർമാൻ ഡോ. കുര്യാക്കോസ് മോർ തെയോഫിലോസ് മെത്രാപ്പോലീത്ത പറഞ്ഞു.2017 ജൂലൈ 3ലെ സുപ്രീം കോടതി വിധിയുടെ അടിസ്ഥാനത്തിൽ മാത്രം, ആവശ്യമായ സിവിൽ നടപടിക്രമങ്ങൾ പൂർത്തിയാക്കാതെ ദൈവാലയങ്ങൾ ബലമായി കൈവശപ്പെടുത്താൻ കഴിയില്ലെന്ന സുപ്രധാന നിയമവശമാണ് ഹൈക്കോടതി വിധിയിലൂടെ വ്യക്തമാകുന്നതെന്ന് മെത്രാപ്പോലീത്ത ചൂണ്ടിക്കാട്ടി. സഭ വർഷങ്ങളായി തുടരുന്ന നീതിയുടെയും നിലനിൽപ്പിന്റെയും പോരാട്ടത്തിൽ ഈ വിധിയെ ദൈവിക ഇടപെടലായാണ് കാണുന്നതെന്നും അദ്ദേഹം പറഞ്ഞു.2017ലെ സുപ്രീം കോടതി വിധിയുടെ മറവിൽ യാക്കോബായ സുറിയാനി സഭയുടെ നിരവധി ദൈവാലയങ്ങൾ ഓർത്തഡോക്സ് വിഭാഗം കൈവശപ്പെടുത്തിയ നടപടികൾക്ക് പുതിയ വിധി നിയമപരമായ ചോദ്യങ്ങൾ ഉയർത്തുന്നതാണെന്നും മെത്രാപ്പോലീത്ത അഭിപ്രായപ്പെട്ടു. ആറ് ദൈവാലയങ്ങൾ കൈവശപ്പെടുത്തുന്നതിനായി പോലീസ് സംരക്ഷണം ആവശ്യപ്പെട്ട നടപടിയുമായി ബന്ധപ്പെട്ട മുൻവിധി സുപ്രീം കോടതി റദ്ദാക്കി, വിഷയങ്ങൾ വിശദമായി പരിശോധിച്ച് തീരുമാനമെടുക്കാൻ ഹൈക്കോടതിയോട് നിർദേശിച്ച സാഹചര്യത്തിലാണ് ഇപ്പോഴത്തെ വിധിയെന്നും അദ്ദേഹം വ്യക്തമാക്കി.2017ലെ വിധിയിൽ പരാമർശിച്ച കോലഞ്ചേരി, വരിക്കോലി, മണ്ണത്തൂർ ദൈവാലയങ്ങളിൽ വിധി യഥാവിധി നടപ്പാക്കിയിട്ടുണ്ടോ, അതിന്റെ അടിസ്ഥാനത്തിൽ ആവശ്യമായ സിവിൽ നടപടികൾ പൂർത്തിയാക്കാതെ മറ്റ് ദൈവാലയങ്ങൾ കൈവശപ്പെടുത്താൻ കഴിയുമോ തുടങ്ങിയ വിഷയങ്ങൾ ഹൈക്കോടതി പരിഗണിച്ചുവെന്നും മെത്രാപ്പോലീത്ത പറഞ്ഞു. പ്രത്യേകിച്ച്, സിവിൽ നടപടിക്രമങ്ങൾ പൂർത്തിയാക്കാതെ പോലീസ് സഹായത്തോടെ ദൈവാലയങ്ങൾ ബലമായി കൈവശപ്പെടുത്താൻ കഴിയുമോ എന്നതിലെ കോടതി നിരീക്ഷണങ്ങൾ ഏറെ നിർണായകമാണെന്നും അദ്ദേഹം കൂട്ടിച്ചേർത്തു.2017ന് ശേഷമുണ്ടായ സാഹചര്യങ്ങളും സംഭവവികാസങ്ങളും പരിഗണിച്ചാണ് ഹൈക്കോടതി വിധി പ്രസ്താവിച്ചതെന്നതും ശ്രദ്ധേയമാണെന്ന് മെത്രാപ്പോലീത്ത പറഞ്ഞു. ദൈവാലയങ്ങൾ കൈവശപ്പെടുത്തുന്നതിനായി ഓർത്തഡോക്സ് വിഭാഗം നടത്തിയ ശ്രമങ്ങൾക്ക് വിധി തിരിച്ചടിയായെന്നും അദ്ദേഹം അവകാശപ്പെട്ടു.മതപരമായ വിഷയങ്ങൾ ക്രമസമാധാന പ്രശ്നങ്ങളിലേക്ക് മാറുന്ന സാഹചര്യത്തിൽ സർക്കാരിന് ഇടപെടാനും ആവശ്യമായ നിയമനിർമാണ നടപടികൾ സ്വീകരിക്കാനും അധികാരമുണ്ടെന്ന 2017ലെ സുപ്രീം കോടതി വിധിയിലെ നിയമതത്വങ്ങളും നിലവിലെ സാഹചര്യത്തിൽ പ്രസക്തമാണെന്ന് മെത്രാപ്പോലീത്ത ചൂണ്ടിക്കാട്ടി.മലങ്കര സഭാ തർക്കത്തിന് ശാശ്വതവും നീതിപൂർവവുമായ പരിഹാരം കണ്ടെത്തുന്നതിനായി സർക്കാർ നടത്തുന്ന മധ്യസ്ഥ ശ്രമങ്ങൾക്കും ആവശ്യമായ നിയമനിർമാണ നടപടികൾക്കും ഹൈക്കോടതി വിധി കൂടുതൽ നിയമപരമായ പിന്തുണ നൽകുന്നതാണെന്നും അദ്ദേഹം പറഞ്ഞു. മുഖ്യമന്ത്രിയുടെ നേതൃത്വത്തിലുള്ള സംസ്ഥാന സർക്കാർ വിഷയത്തിൽ സ്വീകരിക്കുന്ന നിലപാടുകൾക്കും മധ്യസ്ഥ ശ്രമങ്ങൾക്കും വിധി പുതിയ പ്രസക്തി നൽകുന്നതായും മെത്രാപ്പോലീത്ത വ്യക്തമാക്കി.മലങ്കര സഭാ തർക്കത്തിന്റെ ഗൗരവം ഉൾക്കൊണ്ട് നീതിപൂർവമായ പരിഹാരത്തിലേക്ക് മുന്നോട്ടുപോകാൻ തയ്യാറാകണമെന്നും അദ്ദേഹം അഭ്യർഥിച്ചു. ഇനിയൊരു ദൈവാലയവും ബലമായി കൈവശപ്പെടുത്താനുള്ള ശ്രമങ്ങൾ ഉണ്ടാകരുതെന്നും, ഇതിനകം യാക്കോബായ സുറിയാനി സഭയിൽനിന്ന് കൈവശപ്പെടുത്തിയ ദൈവാലയങ്ങൾ തിരികെ നൽകുന്നതിനുള്ള മാന്യതയും സഹോദരസ്നേഹവും പ്രകടിപ്പിക്കണമെന്നും ഡോ. കുര്യാക്കോസ് മോർ തെയോഫിലോസ് മെത്രാപ്പോലീത്ത ആവശ്യപ്പെട്ടു.മലങ്കര സഭാ തർക്കത്തിന് ശാശ്വതവും സമാധാനപരവുമായ പരിഹാരം കണ്ടെത്തുന്നതിനുള്ള സർക്കാർ ശ്രമങ്ങൾക്ക് യാക്കോബായ സുറിയാനി സഭയുടെ പൂർണ പിന്തുണയുണ്ടെന്നും അദ്ദേഹം അറിയിച്ചു.

Comments (0)

Related Stories