കോടതി വിധി ആശ്വാസകരം; സഭാതർക്കത്തിന് ശാശ്വത പരിഹാരം ഉണ്ടാകട്ടെ: കാതോലിക്ക ബാവ

പുത്തൻകുരിശ് ● പോലീസ് സംരക്ഷണം ആവശ്യപ്പെട്ട് ഓർത്തഡോക്സ് വിഭാഗം നൽകിയ അപ്പീലിൽ കേരള ഹൈക്കോടതി പുറപ്പെടുവിച്ച വിധി വിശുദ്ധ യാക്കോബായ സുറിയാനി സഭയെ സംബന്ധിച്ച് ഏറെ ആശ്വാസകരമാണെന്ന് മലങ്കര യാക്കോബായ സുറിയാനി സഭയുടെ ശ്രേഷ്ഠ കാതോലിക്ക ബാവ ആബൂൻ മോർ ബസേലിയോസ് ജോസഫ് പറഞ്ഞു.നൂറ്റാണ്ടുകളായി തുടരുന്ന സഭാതർക്കങ്ങൾക്ക് പരിഹാരം കണ്ടെത്തി സമാധാനാന്തരീക്ഷത്തിലേക്ക് മുന്നേറുന്നതിനുള്ള തുടക്കമായി കോടതി വിധിയെ കാണുന്നതായും കാതോലിക്ക ബാവ വ്യക്തമാക്കി. ഇരുസഭകളും രണ്ടു വിശ്വാസസമൂഹങ്ങളുമെന്ന യാഥാർഥ്യം ഉൾക്കൊണ്ട്, മുഖ്യമന്ത്രി ശ്രീ. വി ഡി സതീശന്റെയും കേരള സർക്കാരിന്റെയും നേതൃത്വത്തിൽ നടക്കുന്ന സമാധാന ചർച്ചകളിലൂടെ ശാശ്വതമായ പരിഹാരം ഉണ്ടാകുന്നതിനായി പ്രാർഥിക്കണമെന്നും അദ്ദേഹം ആഹ്വാനം ചെയ്തു.സത്യത്തിനൊപ്പം നിന്ന ഈ വിധിയിൽ ദൈവത്തെ മഹത്വപ്പെടുത്തുന്നതായും കേസിന്റെ നടത്തിപ്പുമായി ബന്ധപ്പെട്ട് പ്രവർത്തിച്ച എല്ലാവരെയും, പ്രത്യേകിച്ച് പ്രതിസന്ധികളുടെ നടുവിലും വിശ്വാസത്തിനായി ത്യാഗങ്ങൾ സഹിച്ച വിശ്വാസി സമൂഹത്തെയും പ്രത്യേകം അനുസ്മരിച്ച് പ്രാർഥിക്കുന്നതായും കാതോലിക്ക ബാവ പറഞ്ഞു.സഭാതർക്കത്തിന് ശാശ്വത പരിഹാരം കണ്ടെത്തുന്നതിനായി സർക്കാർ നടത്തുന്ന സമാധാന ശ്രമങ്ങൾക്ക് യാക്കോബായ സുറിയാനി സഭയുടെ പൂർണ പിന്തുണയും സഹകരണവും അദ്ദേഹം അറിയിച്ചു. സമാധാന ശ്രമങ്ങൾ വിജയിക്കുകയും സഭയ്ക്കും സമൂഹത്തിനും ആശ്വാസകരമായ അന്തരീക്ഷം സംജാതമാകുകയും ചെയ്യുന്നതിനായി എല്ലാ വിശ്വാസികളും പ്രാർഥനയിൽ ഒന്നിക്കണമെന്നും കാതോലിക്ക ബാവ അഭ്യർഥിച്ചു

Comments (0)

Related Stories