അധ്യാപകർ മാതൃകയാകണം : ദേശീയ അദ്ധ്യാപക നേതൃത്വ പരിശീലന ക്യാമ്പ് ‘ബേത് മൽഫോനെ’ സമാപിച്ചു.

പെരുമ്പാവൂർ ● മലങ്കര യാക്കോബായ സിറിയൻ സൺഡേ സ്കൂൾ അസോസിയേഷന്റെ (MJSSA) ആഭിമുഖ്യത്തിൽ സംഘടിപ്പിച്ച ദേശീയ അധ്യാപക നേതൃത്വ പരിശീലന ക്യാമ്പ് “ബേത് മൽഫോനെ – House of Teachers 2026” മണ്ണൂർ സെന്റ് ജോർജ് ബേത്ലഹേം യാക്കോബായ സുറിയാനി പള്ളിയിൽ സമാപിച്ചു. വിവിധ ഭദ്രാസനങ്ങളിൽ നിന്നുള്ള അധ്യാപകരും ഭാരവാഹികളും ഉൾപ്പെടെ 180 പ്രതിനിധികൾ ദ്വിദിന ക്യാമ്പിൽ പങ്കെടുത്തു.“ഏതു കാര്യത്തിലും എല്ലാ സൽപ്രവൃത്തികളിലും നീ നിന്നെ തന്നെ മാതൃകയായി കാണിച്ചു കൊടുക്കണം” (തീത്തോസ് 2:7) എന്ന ചിന്താവിഷയത്തെ ആസ്പദമാക്കി ആഗസ്റ്റ് 8, 9 തീയതികളിലായിരുന്നു ക്യാമ്പ്. സ്വയം നവീകരിക്കുന്നതിനും പുതിയ ചിന്തകളെ സ്വീകരിക്കുന്നതിനും വിശ്വാസത്തിന്റെ മൂല്യങ്ങൾ പുതുതലമുറയിലേക്ക് പകരുന്നതിനും അധ്യാപകർക്ക് ആവശ്യമായ പുതിയ കാഴ്ചപ്പാടും നേതൃത്വപാടവവും നൽകുകയായിരുന്നു ക്യാമ്പിന്റെ ലക്ഷ്യം.എം.ജെ.എസ്.എസ്.എ പ്രസിഡന്റ് അഭി. ഏലിയാസ് മോർ യൂലിയോസ് മെത്രാപ്പോലീത്തയുടെ അധ്യക്ഷതയിൽ നടന്ന സമ്മേളനം പെരുമ്പാവൂർ മേഖല മെത്രാപ്പോലീത്ത അഭി. മാത്യൂസ് മോർ അപ്രേം മെത്രാപ്പോലീത്ത ഉദ്ഘാടനം ചെയ്തു. മൂവാറ്റുപുഴ മേഖല മെത്രാപ്പോലീത്ത അഭി. ഗബ്രിയേൽ മോർ ഗ്രിഗോറിയോസ് മെത്രാപ്പോലീത്ത അനുഗ്രഹപ്രഭാഷണം നടത്തി. എം.ജെ.എസ്.എസ്.എ വൈസ് പ്രസിഡന്റ് ഫാ. ഷിബിൻ പോൾ പതാക ഉയർത്തി.“The Art of Leadership: Leading with Vision, Voice and Values” എന്ന വിഷയത്തിൽ മൂവാറ്റുപുഴ എം.എൽ.എ ഡോ. മാത്യു കുഴൽനാടൻ ക്ലാസ് നയിച്ചു. “സുറിയാനി സഭയും മധ്യസ്ഥന്മാരും”, “പരിശുദ്ധ സഭയും സൺഡേസ്കൂളും എന്റെ അഭിമാനം” എന്നീ വിഷയങ്ങളിൽ യഥാക്രമം മാത്യൂസ് മോർ അപ്രേം മെത്രാപ്പോലീത്തയും ഡോ. മാത്യൂസ് മോർ അന്തീമോസ് മെത്രാപ്പോലീത്തയും ക്ലാസുകൾ നയിച്ചു.“From Teacher to Influencer: Awaken the Leader within; Inspire the Generation Ahead” എന്ന വിഷയത്തിൽ ട്രെയിനറും മോട്ടിവേഷണൽ സ്പീക്കറുമായ ബിനു കാളിയാടൻ, “അധ്യാപകരും ജെൻ-സി കുട്ടികളും” എന്ന വിഷയത്തിൽ സൈക്കോളജിസ്റ്റും മോട്ടിവേഷണൽ സ്പീക്കറുമായ ഡോ. ജിഷാ മേരി, “Digital Age Teacher: Safe, Smart, Responsible” എന്ന വിഷയത്തിൽ കൊച്ചി ഇൻഫോപാർക്ക് സൈബർ ക്രൈം പോലീസ് സ്റ്റേഷനിലെ സൈബർ സെക്യൂരിറ്റി വിദഗ്ധൻ അരുൺ രാമകൃഷ്ണൻ എന്നിവരും പരിശീലന സെഷനുകൾ നയിച്ചു.സംസ്ഥാന സർക്കാരിന്റെ “ഓപ്പറേഷൻ തൂഫാൻ – ദ നാർക്കോ ഹണ്ട്” പദ്ധതിയുമായി സഹകരിച്ച് ലഹരിവിരുദ്ധ ബോധവൽക്കരണ പരിപാടിയും ക്യാമ്പിന്റെ ഭാഗമായി നടന്നു. പെരുമ്പാവൂർ എം.എൽ.എ മനോജ് മുത്തേടൻ മുഖ്യപ്രഭാഷണം നടത്തി. ക്യാമ്പംഗങ്ങളും സൺഡേസ്കൂൾ കുട്ടികളും ഇടവകാംഗങ്ങളും ചേർന്ന് ലഹരിവിരുദ്ധ പ്രതിജ്ഞയും എടുത്തു.പാഠപുസ്തകം, ജെ.എസ്.വി.ബി.എസ്. സിലബസ് പരിഷ്കരണം, ശിശുക്ലാസ്, അക്കാദമിക് കലണ്ടർ തുടങ്ങിയ വിഷയങ്ങളിൽ ഗ്രൂപ്പ് ചർച്ചകളും നടന്നു. ടീം പെരുമ്പാവൂരിന്റെ നേതൃത്വത്തിൽ നടന്ന കൾച്ചറൽ ഫെസ്റ്റും ശ്രദ്ധേയമായി. ക്യാമ്പംഗങ്ങളുടെ ഫീഡ്ബാക്ക് സെഷനുശേഷം സർട്ടിഫിക്കറ്റുകൾ വിതരണം ചെയ്തു.ബെസ്റ്റ് ക്യാമ്പർമാരായി കോഴിക്കോട് ഭദ്രാസനം കണ്ണൂർ ഡിസ്ട്രിക്ടിലെ കേളകം സെന്റ് തോമസ് സൺഡേസ്കൂൾ അധ്യാപകൻ **വർഗീസ് പി.എം.**യും തൃശൂർ ഭദ്രാസനം ചേലക്കര ഡിസ്ട്രിക്ടിലെ ചേലക്കര സെന്റ് ജോർജ് സൺഡേസ്കൂൾ അധ്യാപിക സിസ്. ഡേവിഡ്യും തിരഞ്ഞെടുക്കപ്പെട്ടു. സമാപന സമ്മേളനത്തിൽ എം.ജെ.എസ്.എസ്.എ പ്രസിഡന്റ് ഏലിയാസ് മോർ യൂലിയോസ് മെത്രാപ്പോലീത്ത സമാപന സന്ദേശം നൽകി. എം.ജെ.എസ്.എസ്.എ സെക്രട്ടറി അഡ്വ. പി.ഐ. കുര്യാക്കോസ് കൃതജ്ഞത അർപ്പിച്ചു. അധ്യാപകന്റെ വ്യക്തിത്വം, ജീവിതമാതൃക, വിശ്വാസം, ഉത്തരവാദിത്വം, സാമൂഹിക പ്രതിബദ്ധത എന്നിവയെ ആസ്പദമാക്കിയുള്ള പ്രചോദനാത്മക ക്ലാസുകളും പരിശീലനങ്ങളും സംവാദങ്ങളും ഉൾപ്പെട്ട ക്യാമ്പ് ആഗസ്റ്റ് 9ന് ഉച്ചയ്ക്ക് 1.30ന് സമാപിച്ചു.

Comments (0)

Related Stories