പിറമാടം പള്ളി സംഘർഷം; സഭാതർക്കത്തിന് ശാശ്വത പരിഹാരം വേണമെന്ന ആവശ്യം ശക്തം

പിറമാടം ● പിറമാടം സെന്റ് ജോൺസ് ബെത്ലഹേം യാക്കോബായ സുറിയാനി പള്ളിയിൽ ഉണ്ടായ സംഘർഷത്തിന്റെ പശ്ചാത്തലത്തിൽ, ദീർഘകാലമായി തുടരുന്ന സഭാതർക്കത്തിന് ശാശ്വതവും സമാധാനപരവുമായ പരിഹാരം കണ്ടെത്തണമെന്ന ആവശ്യം ശക്തമാകുന്നു.സഭാതർക്കവുമായി ബന്ധപ്പെട്ട വിവിധ കേസുകൾ കേരള ഹൈക്കോടതിയിലും സുപ്രീം കോടതിയിലും പരിഗണനയിലിരിക്കെ, സംസ്ഥാന സർക്കാരിന്റെ നേതൃത്വത്തിൽ മധ്യസ്ഥ ചർച്ചകൾ പുരോഗമിക്കുന്നതിനിടെയാണ് പിറമാടം പള്ളിയിൽ വീണ്ടും സംഘർഷാവസ്ഥ ഉണ്ടായത്. യാക്കോബായ സഭയുടെ നിയന്ത്രണത്തിലുള്ള ദൈവാലയത്തിൽ വിശുദ്ധ ആരാധന നടക്കുന്നതിനിടെ മെത്രാൻകക്ഷി വിഭാഗത്തിൽപ്പെട്ട പുരോഹിത വേഷധാരി പള്ളിക്കുള്ളിൽ പ്രവേശിച്ച് ആരാധന തടസ്സപ്പെടുത്താൻ ശ്രമിച്ചതാണ് സംഘർഷത്തിന് കാരണമായതെന്നാണ് യാക്കോബായ സഭാ വിശ്വാസികളുടെ വിശദീകരണം.സംഭവത്തെ തുടർന്ന് പള്ളിയിലും പരിസരത്തും സംഘർഷാവസ്ഥ രൂപപ്പെട്ടെങ്കിലും, മെത്രാൻകക്ഷി വിഭാഗത്തിൽപ്പെട്ടവരെ പിന്നീട് അവിടെനിന്നും നീക്കംചെയ്തു എന്നും നിലവിൽ ദൈവാലയത്തിൽ സമാധാനപരമായ അന്തരീക്ഷമാണെന്നും ഇടവക നേഭാരവാഹികൾ അറിയിച്ചു.സംഭവസമയത്ത് വിശ്വാസികൾക്ക് പിന്തുണയുമായി മലങ്കര യാക്കോബായ സുറിയാനി സഭ അൽമായ ട്രസ്റ്റി കമാൻഡർ തമ്പു ജോർജ് തുകലൻ, വർക്കിംഗ് കമ്മിറ്റി അംഗം ജെയ്സ് ജോൺ, കണ്ടനാട് യൂത്ത് അസോസിയേഷൻ ഭാരവാഹികൾ തുടങ്ങിയവർ പള്ളിയിലെത്തി. സംഘർഷസാഹചര്യത്തിൽ സഭാ-ഭക്തസംഘടനാ ഭാരവാഹികളുടെ സാന്നിധ്യം വിശ്വാസികൾക്ക് ആത്മവിശ്വാസം പകർന്നതായി ഇടവക നേതൃത്വം പറഞ്ഞു.കുറിഞ്ഞി പള്ളിയിലുൾപ്പെടെ നേരത്തെ ഉണ്ടായ സംഭവങ്ങളും സഭാതർക്കവുമായി ബന്ധപ്പെട്ട് വിവിധ പ്രദേശങ്ങളിൽ ആവർത്തിക്കുന്ന സംഘർഷങ്ങളും വിശ്വാസികൾക്കിടയിൽ ആശങ്ക വർധിപ്പിക്കുന്നതായി ചൂണ്ടിക്കാട്ടുന്നു. കോടതി നടപടികൾ തുടരുന്നതിനൊപ്പം പരസ്പര ബഹുമാനവും സമാധാനവും മുൻനിർത്തിയുള്ള ചർച്ചകളിലൂടെ തർക്കത്തിന് ദീർഘകാല പരിഹാരം കണ്ടെത്തണമെന്നാണ് വിശ്വാസികളുടെ ആവശ്യം.ആരാധനാലയങ്ങൾ സംഘർഷത്തിന്റെയും ഏറ്റുമുട്ടലിന്റെയും വേദികളാകാതെ പ്രാർഥനയുടെയും സമാധാനത്തിന്റെയും കേന്ദ്രങ്ങളായി നിലനിൽക്കണമെന്ന ആവശ്യവും ഉയരുന്നുണ്ട്. സംസ്ഥാന സർക്കാരിന്റെ നേതൃത്വത്തിലുള്ള മധ്യസ്ഥ ചർച്ചകൾ കൂടുതൽ ഫലപ്രദമാക്കി, ഇരുവിഭാഗങ്ങളുടെയും അവകാശങ്ങളും ആരാധനാ സ്വാതന്ത്ര്യവും പരിഗണിച്ച് സഭാതർക്കത്തിന് സമാധാനപരമായ പരിഹാരം കണ്ടെത്തണമെന്നാണ് വിശ്വാസികളുടെ ആവശ്യം.

Comments (0)

Related Stories