ഓടക്കാലി പള്ളിയിലെ മൃതസംസ്കാരവുമായി ബന്ധപ്പെട്ട ആരോപണങ്ങൾ വാസ്തവവിരുദ്ധം: യാക്കോബായ സഭ

പുത്തൻകുരിശ് ● സഭാതർക്കം നിലനിൽക്കുന്ന ഓടക്കാലി സെന്റ് മേരീസ് യാക്കോബായ സുറിയാനി പള്ളിയിലെ മൃതസംസ്കാരവുമായി ബന്ധപ്പെട്ട് ഓർത്തഡോക്സ് വിഭാഗം ഉന്നയിക്കുന്ന ആരോപണങ്ങൾ വാസ്തവവിരുദ്ധവും അടിസ്ഥാനരഹിതവുമാണെന്ന് യാക്കോബായ സുറിയാനി സഭ മീഡിയാ സെൽ ചെയർമാൻ ഡോ. കുര്യാക്കോസ് മോർ തെയോഫിലോസ് മെത്രാപ്പോലീത്ത വ്യക്തമാക്കി. ഹൈക്കോടതിയുടെ സിംഗിൾ ബെഞ്ച് ഉത്തരവ് നിലവിൽ വന്നതിനെ തുടർന്ന് കോടതി നിർദേശങ്ങൾ പൂർണമായി പാലിച്ചാണ് ഓടക്കാലി പള്ളി അധികൃതർ മൃതസംസ്കാരത്തിനാവശ്യമായ ക്രമീകരണങ്ങൾ ഒരുക്കിയതെന്ന് മെത്രാപ്പോലീത്ത പറഞ്ഞു. ഓർത്തഡോക്സ് വിഭാഗത്തിലെ വൈദികർക്കും മരിച്ചയാളുടെ ബന്ധുക്കൾക്കും പള്ളിയിൽ പ്രവേശിച്ച് ശുശ്രൂഷകൾ നടത്തുന്നതിനും മൃതദേഹം സെമിത്തേരിയിൽ ആചാരപ്രകാരം സംസ്കരിക്കുന്നതിനുമുള്ള സാഹചര്യം ഒരുക്കിയിരുന്നു. ക്രമസമാധാനവും സുരക്ഷയും ഉറപ്പാക്കുന്നതിനായി പോലീസ് സാന്നിധ്യവും ഏർപ്പെടുത്തിയിരുന്നുവെന്നും അദ്ദേഹം അറിയിച്ചു. കോടതി നിർദേശിച്ച സമയക്രമം പാലിച്ചുകൊണ്ട് ചടങ്ങുകൾ പൂർത്തിയാക്കുന്നതിനാവശ്യമായ സഹകരണം നൽകാൻ യാക്കോബായ പള്ളി നേതൃത്വം തയ്യാറായിരുന്നുവെന്നും മൃതസംസ്കാരത്തിന് തടസ്സം സൃഷ്ടിച്ചെന്ന പ്രചാരണം യാഥാർഥ്യവുമായി പൊരുത്തപ്പെടുന്നതല്ലെന്നും മെത്രാപ്പോലീത്ത വ്യക്തമാക്കി. മുൻകാലങ്ങളിലും ഓടക്കാലി യാക്കോബായ പള്ളിയുടെ ഭാഗത്തുനിന്ന് മൃതസംസ്കാര ചടങ്ങുകൾക്ക് ആവശ്യമായ സഹായങ്ങളും സൗകര്യങ്ങളും ഒരുക്കിയിട്ടുണ്ടെന്നും അദ്ദേഹം ചൂണ്ടിക്കാട്ടി. കോടതി ഉത്തരവില്ലാതെ പള്ളിയിൽ പ്രവേശനം അനുവദിക്കാനാകില്ലെന്ന നിലപാടാണ് നേരത്തെ സ്വീകരിച്ചിരുന്നതെന്നും, കോടതി ഉത്തരവ് ലഭിച്ചതോടെ അതിലെ നിർദേശങ്ങൾക്കനുസരിച്ചുള്ള ക്രമീകരണങ്ങൾ ഒരുക്കിയെന്നും മെത്രാപ്പോലീത്ത പറഞ്ഞു. സഭാതർക്കത്തിന്റെ പേരിൽ മൃതസംസ്കാരം പോലുള്ള മാനുഷികവും വൈകാരികവുമായ വിഷയങ്ങളെ വിവാദങ്ങളിലേക്ക് വലിച്ചിഴക്കുന്നത് ഒഴിവാക്കണമെന്ന് അദ്ദേഹം ആവശ്യപ്പെട്ടു. വസ്തുതകൾ വളച്ചൊടിച്ച് സമാധാനാന്തരീക്ഷം തകർക്കാനുള്ള ശ്രമങ്ങളിൽനിന്ന് എല്ലാവരും പിന്മാറണമെന്നും ഇത്തരം വിഷയങ്ങളിൽ സംയമനവും പരസ്പര ബഹുമാനവും പുലർത്തണമെന്നും ഡോ. കുര്യാക്കോസ് മോർ തെയോഫിലോസ് മെത്രാപ്പോലീത്ത അഭ്യർഥിച്ചു.

Comments (0)

Related Stories