നോമ്പ്... നാം ആരെയാണ് അനുസരിക്കുന്നത് ? — പരിശുദ്ധ പാത്രിയർക്കീസ് ബാവായുടെ കല്പന അനുസരിക്കണമോ വേണ്ടയോ ?. ഒരു സാധാരണ വിശ്വാസിയുടെ ആത്മാർത്ഥമായ ചോദ്യം

ഇത് ആരെയെങ്കിലും കുറ്റപ്പെടുത്താനോ വിമർശിക്കാനോ എഴുതുന്നതല്ല. ഒരു സാധാരണ വിശ്വാസിയുടെ മനസ്സിൽ വർഷങ്ങളായി കിടക്കുന്ന ഒരു സംശയം പങ്കുവയ്ക്കാനാണ്.ഓരോ വർഷവും ശൂനോയോ നോമ്പ്, എൽദോ നോമ്പ്, ശ്ലീഹാ നോമ്പ് എന്നിവ ആരംഭിക്കുമ്പോൾ നമ്മുടെ സഭയിലെ വിശ്വാസികൾ രണ്ടുവഴിയിലാകുന്നത് നാം കാണാറുണ്ട്. ഒരു കൂട്ടർ ഒരു തീയതി മുതൽ നോമ്പ് ആരംഭിക്കുന്നു. മറ്റൊരു കൂട്ടർ മറ്റൊരു തീയതി മുതൽ.അപ്പോൾ സ്വാഭാവികമായി ഒരു ചോദ്യം ഉയരുന്നു...ശരിയായ തീയതി ഏതാണ്?പരിശുദ്ധ മോറാൻ മോർ ഇഗ്നാത്തിയോസ് സഖാ പ്രഥമൻ ഇവാസ് പാത്രിയർക്കീസ് ബാവ രചിച്ച "Fasting: A Definition" എന്ന ലേഖനത്തിൽ ഈ വിഷയത്തെക്കുറിച്ച് വളരെ വ്യക്തമായ വിശദീകരണമുണ്ട്.ആ ലേഖനത്തിൽ പറയുന്നത്, 1946-ൽ ഹോംസിൽ ചേർന്ന സുന്നഹദോസിന്റെ തീരുമാനപ്രകാരം, പരിശുദ്ധ അപ്രേം പ്രഥമൻ ബർസൗം പാത്രിയർക്കീസ് ബാവ 1946 ഡിസംബർ 7-ന് പുറപ്പെടുവിച്ച പാത്രിയർക്കാ കല്പനയിലൂടെ യൽദോ നോമ്പ്, ദൈവമാതാവിന്റെ (ശൂനോയോ) നോമ്പ്, ശ്ലീഹാ നോമ്പ് എന്നിവയുടെ പഴയ കാലക്രമം റദ്ദാക്കുകയും, സുന്നഹദോസ് നിശ്ചയിച്ച പുതിയ കാലക്രമം സഭയുടെ ഔദ്യോഗിക നിയമമായി പ്രഖ്യാപിക്കുകയും ചെയ്തുവെന്നാണ്.ഈ ലേഖനം ഇന്നും എല്ലാവർക്കും ലഭ്യമാണ്. ഇംഗ്ലീഷിൽ SyrianOrthodoxChurch.org-ലും മലയാളത്തിൽ JacobiteOnline.com-ലും വായിക്കാം.എന്നിട്ടും ഓരോ വർഷവും വീണ്ടും അതേ ആശയക്കുഴപ്പം.ചില പള്ളികളിൽ ഒരു തീയതി മുതൽ നോമ്പ് ആരംഭിക്കുന്നു. മറ്റു ചില പള്ളികളിൽ മറ്റൊരു തീയതി മുതൽ. ചില വൈദികർ ഒരു രീതിയിൽ പഠിപ്പിക്കുന്നു. മറ്റു ചിലർ വേറൊരു രീതിയിൽ.ഇതിനിടയിൽ ആശയക്കുഴപ്പത്തിലാകുന്നത് ആരാണ്?സാധാരണ വിശ്വാസികൾ.ഇപ്പോൾ ഉയരുന്ന ഏറ്റവും പ്രധാനപ്പെട്ട ചോദ്യം ഇതാണ്.പരിശുദ്ധ പാത്രിയർക്കീസ് ബാവയുടെ കല്പനയും ആഗോള സുന്നഹദോസിന്റെ തീരുമാനവും ഇന്നും പ്രാബല്യത്തിലാണോ?പ്രാബല്യത്തിലാണെങ്കിൽ എല്ലാവരും അതുതന്നെ അനുസരിക്കേണ്ടതല്ലേ?അല്ലെങ്കിൽ പിന്നീട് ആ കല്പന തിരുത്തുകയോ റദ്ദാക്കുകയോ ചെയ്ത പുതിയ സുന്നഹദോസ് തീരുമാനമോ പാത്രിയർക്കാ കല്പനയോ ഉണ്ടോ?ഉണ്ടെങ്കിൽ അത് സഭ ഔദ്യോഗികമായി വിശ്വാസികളെ അറിയിക്കേണ്ടതല്ലേ?ഇന്ന് പലരും പറയുന്നത് ഇങ്ങനെയാണ്."ഞങ്ങൾ ആദ്യം മുതൽ ഇങ്ങനെയാണ് നോമ്പ് നോക്കുന്നത്."മറ്റുചിലർ പറയുന്നു,"പരിശുദ്ധ പാത്രിയർക്കീസ് ബാവയുടെ കല്പന കണ്ടശേഷം അതനുസരിച്ചാണ് ഇപ്പോൾ ഞങ്ങൾ നോമ്പ് ആചരിക്കുന്നത്."ഇങ്ങനെ രണ്ട് വിഭാഗങ്ങളായി വിശ്വാസികൾ മാറുന്നത് കാണുമ്പോൾ ഏറെ വേദന തോന്നുന്നു.നോമ്പ് എന്നത് തർക്കത്തിനുള്ള വിഷയമല്ല. അത് പ്രാർത്ഥനയുടെയും അനുസരണത്തിന്റെയും ആത്മീയ ജീവിതത്തിന്റെയും ഭാഗമാണ്.ഇതിനിടയിൽ മറ്റൊരു സംശയവും ഉയരുന്നു.പരിശുദ്ധ സഭയുടെ ഔദ്യോഗിക കലണ്ടറിൽ നൽകിയിരിക്കുന്ന തീയതികളാണ് ശരിയെങ്കിൽ, സഭയുടെ ഭാവി വൈദികരെ വാർത്തെടുക്കുന്ന സെമിനാരികളിലും അതേ പഠിപ്പിക്കപ്പെടുകയും അതേ പ്രാവർത്തികമാക്കപ്പെടുകയും ചെയ്യുന്നുണ്ടോ?സാധാരണ വിശ്വാസികൾ സോഷ്യൽ മീഡിയയിലും വിവിധ ഔദ്യോഗിക പേജുകളിലും വ്യത്യസ്ത സന്ദേശങ്ങൾ കാണുമ്പോൾ ആശയക്കുഴപ്പം വർധിക്കുന്നത് സ്വാഭാവികമാണ്.പരിശുദ്ധ മോറാൻ മോർ ഇഗ്നാത്തിയോസ് സഖാ പ്രഥമൻ ഇവാസ് പാത്രിയർക്കീസ് ബാവ തന്റെ ലേഖനത്തിൽ വളരെ മനോഹരമായി പറയുന്നു: "ക്രിസ്തു നോമ്പിന്റെയും പ്രാർത്ഥനയുടെയും തത്ത്വം സ്ഥാപിച്ചു. എന്നാൽ അവ ആചരിക്കേണ്ട ദിവസങ്ങളും കാലക്രമവും ക്രമീകരിക്കാനുള്ള അധികാരം സഭയെ ഏൽപ്പിച്ചു." അങ്ങനെയെങ്കിൽ ആ അധികാരം ഉപയോഗിച്ച് പരിശുദ്ധ സഭ എടുത്ത തീരുമാനമാണ് നമ്മുടെ മാർഗദർശകമാകേണ്ടത്.ഈ ലേഖനം എഴുതുന്നതിന്റെ ഉദ്ദേശ്യം ആരെയും വിമർശിക്കുക എന്നതല്ല.ഒരേയൊരു അപേക്ഷ മാത്രമാണ്.പരിശുദ്ധ സഭയോ നമ്മുടെ പ്രാദേശിക സുന്നഹദോസോ ഈ വിഷയത്തിൽ വ്യക്തമായ ഒരു ഔദ്യോഗിക വിശദീകരണമോ സർക്കുലറോ പുറപ്പെടുവിച്ചാൽ, വർഷംതോറും ആവർത്തിക്കുന്ന ഈ ആശയക്കുഴപ്പത്തിന് വിരാമമാകും.വിശ്വാസികൾ തമ്മിലുള്ള അനാവശ്യ തർക്കങ്ങളും അവസാനിക്കും.നാം എല്ലാവരും ഒരേ മനസ്സോടെയും ഒരേ അനുസരണത്തോടെയും ഒരേ സഭയുടെ മക്കളായി നോമ്പും പ്രാർത്ഥനയും ആചരിക്കാൻ അതുവഴി സാധിക്കും. ദൈവം എല്ലാവരെയും അനുഗ്രഹിക്കട്ടെ.

Comments (0)

Related Stories