ദുരിതബാധിതർക്ക് കൈത്താങ്ങാകാൻ ഭക്തസംഘടനകൾ സജീവമാകണം; സഭയുടെ പൂർണ പിന്തുണ ഉറപ്പാക്കി ശ്രേഷ്ഠ കാതോലിക്ക ബാവ

പുത്തൻകുരിശ് ● സംസ്ഥാനത്തിന്റെ വിവിധ ഭാഗങ്ങളിൽ തുടരുന്ന അതിശക്തമായ മഴ, വെള്ളപ്പൊക്കം, മണ്ണിടിച്ചിൽ, ഉരുൾപൊട്ടൽ എന്നിവ മൂലം ദുരിതമനുഭവിക്കുന്ന ജനങ്ങൾക്ക് കൈത്താങ്ങാകാൻ സഭയുടെ എല്ലാ ഭക്തസംഘടനകളും സജീവമായി രംഗത്തിറങ്ങണമെന്ന് മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസേലിയോസ് ജോസഫ് ബാവ ആഹ്വാനം ചെയ്തു.യൂത്ത് അസോസിയേഷൻ ഉൾപ്പെടെയുള്ള എല്ലാ ഭക്തസംഘടനകളും ദുരിതബാധിതരെ കണ്ടെത്തി ആവശ്യമായ സഹായങ്ങൾ സമയബന്ധിതമായി എത്തിക്കുന്നതിന് മുൻകൈയെടുക്കണമെന്ന് ബാവ നിർദേശിച്ചു. പ്രത്യേകിച്ച് പ്രായമായവർ, രോഗികൾ, ഭിന്നശേഷിക്കാർ, യാത്രാസൗകര്യങ്ങൾ ലഭിക്കാത്തവർ എന്നിവരുടെ സുരക്ഷയ്ക്കും സംരക്ഷണത്തിനും മുൻഗണന നൽകണമെന്നും അദ്ദേഹം പറഞ്ഞു.ദുരിതാശ്വാസ ക്യാമ്പുകൾ സന്ദർശിച്ച് അവിടെയുള്ളവരുടെ ആവശ്യങ്ങൾ മനസ്സിലാക്കി ഭക്ഷണം, മരുന്ന്, വസ്ത്രം ഉൾപ്പെടെയുള്ള അവശ്യസാധനങ്ങൾ ലഭ്യമാക്കുന്നതിനുള്ള പ്രവർത്തനങ്ങൾ ഏകോപിപ്പിക്കണമെന്നും സർക്കാരിന്റെയും സംസ്ഥാന ദുരന്തനിവാരണ അതോറിറ്റിയുടെയും നിർദേശങ്ങൾ കർശനമായി പാലിച്ച് ദുരന്തനിവാരണ പ്രവർത്തനങ്ങളിൽ പങ്കാളികളാകണമെന്നും അദ്ദേഹം അഭ്യർഥിച്ചു.ആവശ്യമായ സാഹചര്യങ്ങളിൽ സഭയുടെയും ദൈവാലയങ്ങളുടെയും നേതൃത്വത്തിൽ ദുരിതാശ്വാസ ക്യാമ്പുകൾ ആരംഭിക്കാനും ദുരിതബാധിതർക്കാവശ്യമായ എല്ലാ സഹായങ്ങളും എത്തിക്കാനും സഭയുടെ പൂർണ പിന്തുണയും സഹകരണവും ഉണ്ടാകുമെന്ന് ശ്രേഷ്ഠ ബാവ ഉറപ്പുനൽകി.ജാതി, മത, രാഷ്ട്രീയ വ്യത്യാസങ്ങൾക്കതീതമായി പരസ്പരം കൈകോർത്തുപിടിച്ച് മനുഷ്യസ്നേഹത്തിന്റെ മാതൃക സൃഷ്ടിക്കേണ്ട സമയമാണിതെന്നും സേവനമനോഭാവവും സഹോദരസ്നേഹവും കൊണ്ട് ഈ പ്രതിസന്ധിഘട്ടത്തെ അതിജീവിക്കാമെന്നും അദ്ദേഹം സന്ദേശത്തിൽ പറഞ്ഞു. പ്രകൃതിക്ഷോഭങ്ങളിൽ ജീവൻ നഷ്ടപ്പെട്ടവർക്ക് ശ്രേഷ്ഠ കാതോലിക്ക ബാവ ആദരാഞ്ജലി അർപ്പിക്കുകയും ദുരിതബാധിതരായ എല്ലാവരെയും പ്രത്യേക പ്രാർത്ഥനയിൽ ഓർക്കുന്നുവെന്നും അറിയിച്ചു.

Comments (0)

Related Stories