മോർ ബസേലിയോസ് പൗലോസ് ദ്വിതീയൻ ബാവയുടെയും പരിശുദ്ധ യൂയാക്കിം മോർ കൂറിലോസ് ബാവയുടെയും ഓർമ്മപ്പെരുന്നാൾ ആഗസ്റ്റ് 23 മുതൽ സെപ്റ്റംബർ 2 വരെ

മലേക്കുരിശ്: പരിശുദ്ധ അന്ത്യോഖ്യാ സിംഹാസനം വക മലേക്കുരിശ് ദയറായിൽ കബറടങ്ങിയിരിക്കുന്ന പുണ്യശ്ലോകനായ ശ്രേഷ്ഠ മോർ ബസേലിയോസ് പൗലോസ് ദ്വിതീയൻ കാതോലിക്കാ ബാവയുടെ 30-ാം മത് ശ്രാദ്ധപ്പെരുന്നാൾ 2026 ആഗസ്റ്റ് 23 മുതൽ സെപ്റ്റംബർ 2 വരെയുള്ള തീയതികളിൽ പരിശുദ്ധ സഭ ആഘോഷിക്കും. മുളന്തുരുത്തി മാർത്തോമൻ പള്ളിയിൽ കബറടങ്ങിയിരിക്കുന്ന പരിശുദ്ധനായ യൂയാക്കീം മോർ കൂറിലോസ് ബാവയുടെ 152-ാം മത് ഓർമ്മപ്പെരുന്നാൾ സെപ്റ്റംബർ 1, 2 തീയതികളിലും ആചരിക്കും.അന്ത്യോഖ്യാ സിംഹാസന വിശ്വാസ തീർത്ഥയാത്രാ സംഘത്തിന്റെ രക്ഷാധികാരി ദീയോസ്കോറോസ് കുറിയാക്കോസ് മെത്രാപ്പോലീത്ത പുറപ്പെടുവിച്ച കൽപ്പനയിലാണ് പെരുന്നാൾ പരിപാടികളുടെ വിശദാംശങ്ങൾ അറിയിച്ചിരിക്കുന്നത്.ആഗസ്റ്റ് 31-ാം തീയതി വിവിധ ദൈവാലയങ്ങളിൽ നിന്ന് കബറിങ്കലേക്ക് കാൽനടയായി എത്തിച്ചേരുന്ന തീർത്ഥാടകർക്ക് വൈകുന്നേരം 5.00 മണിക്ക് മലേക്കുരിശ് ദയറായിൽ സ്വീകരണം നൽകും. തുടർന്ന് സന്ധ്യാ പ്രാർത്ഥന, കബറിങ്കൽ ധൂപ പ്രാർത്ഥന, അത്താഴ സദ്യ എന്നിവ ഉണ്ടായിരിക്കും.സെപ്റ്റംബർ 1-ാം തീയതി രാവിലെ 8.30 മണിക്ക് അഭിവന്ദ്യ പിതാക്കന്മാരുടെ കാർമ്മികത്വത്തിൽ വിശുദ്ധ മൂന്നിന്മേൽ കുർബ്ബാന, കബറിങ്കൽ ധൂപപ്രാർത്ഥന, ശ്രാദ്ധസദ്യ എന്നിവ നടക്കും. മലേക്കുരിശ് ദയറായിലെ പെരുന്നാളിനുശേഷം ഉച്ചകഴിഞ്ഞ് 1.30 മണിക്ക് മുളന്തുരുത്തിയിൽ കബറടങ്ങിയിരിക്കുന്ന പരിശുദ്ധനായ യൂയാക്കീം മോർ കൂറിലോസ് ബാവയുടെ കബറിങ്കലേക്കുള്ള തീർത്ഥയാത്ര ദയറായിൽ നിന്ന് പുറപ്പെടും.സ്നേഹത്തിന്റെയും ത്യാഗത്തിന്റെയും മൂർത്തീഭാവമായി നമ്മുടെ മദ്ധ്യേ ജീവിച്ച് നല്ല മാതൃക കാണിച്ചുതന്ന പുണ്യപിതാക്കന്മാരുടെ കബറിങ്കലേക്കുള്ള തീർത്ഥയാത്രയിൽ പങ്കെടുക്കുന്നതും കബറിങ്കലെത്തി പ്രാർത്ഥിക്കുന്നതും അനുഗ്രഹദായകമാണെന്ന് കൽപ്പന ഓർമ്മിപ്പിക്കുന്നു.പ്രതിസന്ധികളുടെ മദ്ധ്യത്തിൽ, ജനിച്ചു വളർന്ന നാടും വീടും വിട്ട്, ഇൻഡ്യയിലുള്ള സഭയെ കരുതി ഇവിടെ വന്ന് ത്യാഗങ്ങൾ സഹിച്ച്, ഈ സഭയെ സത്യവിശ്വാസത്തിൽ നിലനിർത്തിയ പരിശുദ്ധ യൂയാക്കീം മോർ കൂറിലോസ് ബാവ ജീവിച്ചിരിക്കുമ്പോൾ തന്നെ പരിശുദ്ധനെന്ന് സഭ സാക്ഷ്യപ്പെടുത്തിയ പിതാവാണെന്നും കൽപ്പനയിൽ അനുസ്മരിക്കുന്നു. വിശുദ്ധ സഭയ്ക്കുവേണ്ടി പ്രാണത്യാഗം ചെയ്ത ആത്മീയ പിതാക്കന്മാർ അന്ത്യവിശ്രമം കൊള്ളുന്ന കബറിടങ്ങളിലേക്കുള്ള തീർത്ഥയാത്രയിൽ ത്യാഗമനസ്ഥിതിയോടെ സർവ്വാത്മനാ സഹകരിക്കണമെന്നും ഓരോ പള്ളിയിൽ നിന്നും കഴിയുന്നത്ര അംഗങ്ങൾ പങ്കെടുക്കണമെന്നും മെത്രാപ്പോലീത്ത ആഹ്വാനം ചെയ്തു.അന്ത്യോഖ്യാ സിംഹാസന വിശ്വാസ തീർത്ഥയാത്രാ സംഘത്തിന്റെ 2026–'27 വർഷത്തെ പ്രവർത്തനങ്ങൾക്കായി പുതിയ ഭാരവാഹികളെ തിരഞ്ഞെടുത്തു.ഭാരവാഹികൾ: റവ. ഫാ. ബിനു സ്കറിയ കോഴിക്കോട്ട്, വടകര (പ്രസിഡന്റ്), ശ്രീ. ടൈറ്റസ് സി.പി. ചേലച്ചുവട്ടിൽ, ശ്രാപ്പിള്ളി (വൈസ് പ്രസിഡന്റ്), ശ്രീ. സണ്ണി സി.ജെ. ചൂരക്കുളങ്ങര, മുളന്തുരുത്തി (സെക്രട്ടറി), ശ്രീ. സിജു ജോസ് വൈശ്ശേരിൽ, ആരക്കുന്നം (ജോയിന്റ് സെക്രട്ടറി), ഷെവ. വർഗീസ് സി.എ. ചെറുവുള്ളിൽ, കരിങ്ങാച്ചിറ (ട്രഷറർ), ശ്രീ. തമ്പി ചുണ്ടത്തടത്തിൽ, കോലഞ്ചേരി (കോ-ഓർഡിനേറ്റർ).എക്സിക്യൂട്ടീവ് കമ്മറ്റിയംഗങ്ങൾ: ശ്രീ. ഏലിയാസ് തോമസ്, ഞാറക്കാട്ടിൽ, മുളന്തുരുത്തി; ശ്രീ. രാജു ഇ.സി. ഇല്ലിമൂട്ടിൽ, മണീട്; ശ്രീ. ജോയി എബ്രഹാം, പാറക്കാടൻ, താമരച്ചാൽ; ശ്രീ. ബേബി പൗലോസ്, പുതുശ്ശേരി, അങ്കമാലി; റവ. ഫാ. ഷിബിൻ പോൾ, പെരുമ്പാട്ട്, വരിക്കോലി (പ്രത്യേക ക്ഷണിതാവ്).ഓഡിറ്റേഴ്സ്: ശ്രീ. ജോണി, കുഴലിക്കാട്, മുളന്തുരുത്തി; ശ്രീ. ജോയി, ചളക്കാട്ട്, മണീട്.സബ് കമ്മറ്റി ഭാരവാഹികൾ: റവ. ഫാ. ജോണി തുരുത്തിയിൽ, കടുംഗമംഗലം (പ്രസിഡന്റ്), ശ്രീ. വർഗീസ്, കല്ലിടിയിൽ, മണീട് (കൺവീനർ), ശ്രീ. റെജി ഇ.എ. ഇലഞ്ഞിക്കാട്ട്, വരിക്കോലി (ട്രഷറർ).തീർത്ഥയാത്രാ സംഘത്തിന്റെ പ്രവർത്തനങ്ങൾക്ക് സംഭാവനകൾ നൽകിയും അംഗത്വമെടുത്തും ഈ ആത്മീയ പ്രസ്ഥാനത്തിന്റെ വളർച്ചയിൽ പങ്കാളികളാകണമെന്ന് ദൈവമക്കളോട് മെത്രാപ്പോലീത്ത അഭ്യർത്ഥിച്ചു. 2026 ജൂലൈ 24-ാം തീയതി മലേക്കുരിശ് ദയറായിൽ നിന്നാണ് കൽപ്പന (നം. TS 5/2026) പുറപ്പെടുവിച്ചത്.

Comments (0)

Related Stories