'സ്നേഹസ്പർശം': അൻപിലെ മാതാപിതാക്കൾക്കൊപ്പം സ്നേഹസായാഹ്നം ഒരുക്കി നിരണം ഭദ്രാസന യുവജന സഖ്യം.

നിരണം/ആനിക്കാട്: യാക്കോബായ സുറിയാനി ഓർത്തഡോക്സ് യൂത്ത് അസോസിയേഷൻ (JSOYA) നിരണം ഭദ്രാസനത്തിന്റെ നേതൃത്വത്തിൽ 'സ്നേഹസ്പർശം' പരിപാടി സംഘടിപ്പിക്കുന്നു. "അൻപിലെ മാതാപിതാക്കന്മാർക്കൊപ്പം ഒരു സ്നേഹസായാഹ്നം" എന്ന പ്രമേയത്തിൽ സംഘടിപ്പിക്കുന്ന പരിപാടി 2026 ജൂലൈ 26 ഞായറാഴ്ച ഉച്ചയ്ക്ക് 1:30 മുതൽ വൈകീട്ട് 6:30 വരെ ആനിക്കാട് 'ദയറ & അൻപ് ഓൾഡ് ഏജ് ഹോമിൽ' വച്ച് നടക്കും.മുതിർന്ന പൗരന്മാർക്ക് മാനസിക സന്തോഷവും സ്നേഹനിർഭരമായ അന്തരീക്ഷവും സമ്മാനിക്കുക എന്ന ലക്ഷ്യത്തോടെയാണ് യുവജന പ്രസ്ഥാനം ഈ കൂട്ടായ്മ ഒരുക്കുന്നത്.വൈവിധ്യമാർന്ന പരിപാടികളാണ് ആസൂത്രണം ചെയ്തിരിക്കുന്നത്. അൻപിലെ മാതാപിതാക്കളുടെ പങ്കാളിത്തത്തോടെ ദിവസം മുഴുവൻ നീളുന്ന വിവിധ പരിപാടികളാണ് ആസൂത്രണം ചെയ്തിരിക്കുന്നത്, ആത്മീയ നിർവൃതി ഏകുന്ന പ്രാർത്ഥനാ ശുശ്രൂഷകൾ. വ്യക്തിത്വ വികസനത്തിനും ആത്മീയ വളർച്ചയ്ക്കുമായി പ്രത്യേക പഠനക്ലാസുകൾ. അൻപിലെ മാതാപിതാക്കളുടെ മനോവീര്യം ഉയർത്തുന്ന വിനോദ പരിപാടികളും കൂട്ടായ്മകളും തുടങ്ങി സാംസ്കാരിക പരിപാടികളും, യുവജനങ്ങളുടെയും മാതാപിതാക്കളുടെയും കലാപരിപാടികളും നടത്തപ്പെടും "എന്റെ ഈ ഏറ്റവും ചെറിയ സഹോദരന്മാരിൽ ഒരുത്തനു നിങ്ങൾ ചെയ്തേടത്തോളം എല്ലാം എനിക്കു ചെയ്തു എന്നു ഞാൻ സത്യമായിട്ടു നിങ്ങളോടു പറയുന്നു" (മത്തായി 25:40) എന്ന ബൈബിൾ വാക്യം മുൻനിർത്തി, സഹജീവി സ്നേഹവും കരുണയും പ്രവൃത്തിപഥത്തിൽ എത്തിക്കുകയാണ് ഈ കൂട്ടായ്മയിലൂടെ ലക്ഷ്യമിടുന്നതെന്ന് ഭാരവാഹികൾ അറിയിച്ചു.നിരണം ഭദ്രാസനാധിപൻ അഭിവന്ദ്യ ഡോ. ഗീവർഗീസ് മോർ കൂറിലോസ് മെത്രാപ്പോലീത്തപരിപാടിയിൽ മുഖ്യസാന്നിധ്യമായിരിക്കും. ഭദ്രാസനത്തിലെ വൈദികരും വിവിധ ഇടവകകളിൽ നിന്നുള്ള യുവജന പ്രസ്ഥാന ഭാരവാഹികളും പ്രവർത്തകരും ചടങ്ങിൽ സംബന്ധിക്കും.നിരണം ഭദ്രാസനത്തിലെ എല്ലാ ഇടവകകളിൽ നിന്നുമുള്ള യുവജനങ്ങളുടെയും വിശ്വാസികളുടെയും സഹകരണവും സാന്നിധ്യവും സംഘാടകർ അഭ്യർത്ഥിച്ചു.

Comments (0)

Related Stories