മെത്രാഭിഷേകത്തിന് ശേഷം ആദ്യമായി സ്വിറ്റ്സർലണ്ടിൽ എത്തുന്ന ഗബ്രീയേൽ മോർ ഗ്രിഗോറിയോസ് മെത്രാപ്പോലീത്തയ്ക്ക് ഊഷ്മള സ്വീകരണം.

സ്വിറ്റ്സർലണ്ട് ● മലങ്കര യാക്കോബായ സുറിയാനി ഓർത്തഡോക്സ് സഭയിലെ നവാഭിഷിക്ത മെത്രാപ്പോലീത്ത അഭിവന്ദ്യ ഗബ്രീയേൽ മോർ ഗ്രിഗോറിയോസ് മെത്രാപ്പോലീത്ത മെത്രാഭിഷേകത്തിന് ശേഷം ആദ്യമായി സ്വിറ്റ്സർലണ്ടിലെത്തി. ഒരാഴ്ച നീണ്ടുനിൽക്കുന്ന സന്ദർശനത്തിന്റെ ഭാഗമായി വിവിധ ആത്മീയ-സഭാ പരിപാടികളിൽ മെത്രാപ്പോലീത്ത പങ്കെടുക്കും.സ്വിറ്റ്സർലണ്ടിലെ സെന്റ് മേരീസ് യാക്കോബായ സുറിയാനി ഇടവക വികാരി റവ. ഫാ. പോൾ പുന്നക്കൽ, സെക്രട്ടറി ബോബ് തടത്തിൽ, ട്രസ്റ്റി ബേസിൽ ചേലാടൻ, മറ്റ് ഭരണസമിതി അംഗങ്ങൾ എന്നിവർ അഭിവന്ദ്യ പിതാവിനെ സന്ദർശിച്ച് സ്വീകരണം നൽകുകയും അനുഗ്രഹം പ്രാപിക്കുകയും ചെയ്തു.സന്ദർശനത്തിന്റെ ഭാഗമായി മെത്രാപ്പോലീത്ത, ഉപരിപഠനകാലത്ത് ദീർഘനാൾ താമസിച്ചിരുന്ന മോർ ഔഗേൻ ദയറിൽ ഞായറാഴ്ച വിശുദ്ധ കുർബാന അർപ്പിക്കും. കൂടാതെ സ്വിറ്റ്സർലണ്ടിലെ വിവിധ സിറിയൻ ഓർത്തഡോക്സ് ഇടവകകൾ സന്ദർശിക്കുകയും, സഹോദരീ സഭകളുടെ സഭാധ്യക്ഷന്മാരുമായി കൂടിക്കാഴ്ച നടത്തുകയും, വിവിധ സ്വീകരണ സമ്മേളനങ്ങളിൽ പങ്കെടുക്കുകയും ചെയ്യും.മെത്രാഭിഷേകത്തിന് ശേഷം ആദ്യമായാണ് അഭിവന്ദ്യ ഗബ്രീയേൽ മോർ ഗ്രിഗോറിയോസ് മെത്രാപ്പോലീത്ത സ്വിറ്റ്സർലണ്ട് സന്ദർശിക്കുന്നത് എന്നതിനാൽ ഈ സന്ദർശനത്തിന് പ്രത്യേക പ്രാധാന്യമുണ്ട്. ഉപരിപഠനകാലത്ത് ആത്മീയ രൂപീകരണം നേടിയ സ്ഥലങ്ങൾ വീണ്ടും സന്ദർശിക്കുന്നതും സ്വിറ്റ്സർലണ്ടിലെ വിശ്വാസിസമൂഹവുമായി ആത്മീയ സൗഹൃദം പങ്കിടുന്നതും സന്ദർശനത്തിന്റെ ശ്രദ്ധേയമായ ഘടകങ്ങളാണ്.ആത്മീയ ശുശ്രൂഷകളും സഭാ സന്ദർശനങ്ങളും പൂർത്തിയാക്കിയ ശേഷം അടുത്ത ആഴ്ച മെത്രാപ്പോലീത്ത നാട്ടിലേക്ക് മടങ്ങും.

Comments (0)

Related Stories