മലങ്കര സുറിയാനി ഓർത്തഡോക്സ് തിയോളജിക്കൽ സെമിനാരിയിൽ പുതിയ ഓറിയന്റേഷൻ ബാച്ചിന് സ്വീകരണം

മുളംതുരുത്തി ● മലങ്കര യാക്കോബായ സുറിയാനി ഓർത്തഡോക്സ് സഭയുടെ വൈദിക പരിശീലന കേന്ദ്രമായ മലങ്കര സുറിയാനി ഓർത്തഡോക്സ് തിയോളജിക്കൽ സെമിനാരിയിൽ ( MSOT Seminary ) 2026-ലെ പുതിയ ഓറിയന്റേഷൻ ബാച്ചിന് ആത്മീയവും പ്രാർത്ഥനാനിർഭരവുമായ അന്തരീക്ഷത്തിൽ സ്വീകരണം നൽകി.ജൂലൈ 22-ന് നടന്ന ചടങ്ങോടെ പുതിയ വിദ്യാർത്ഥികളുടെ സെമിനാരി ജീവിതത്തിന് ഔപചാരിക തുടക്കമായി. വൈദിക ശുശ്രൂഷയ്ക്കായി ദൈവം വിളിച്ചവരെന്ന ബോധ്യത്തോടെ പ്രാർത്ഥനയും ആത്മീയ രൂപീകരണവും ദൈവശാസ്ത്ര പഠനവും സഭാ ശുശ്രൂഷയും സമന്വയിപ്പിച്ചുള്ള പരിശീലന യാത്രയിലേക്കാണ് പുതിയ ബാച്ച് പ്രവേശിച്ചത്. "നിങ്ങൾ എന്നെ തിരഞ്ഞെടുത്തതല്ല, ഞാൻ നിങ്ങളെ തിരഞ്ഞെടുത്ത് നിങ്ങൾ പോയി ഫലം കായ്ക്കേണ്ടതിന് നിയമിച്ചിരിക്കുന്നു" (യോഹന്നാൻ 15:16) എന്ന തിരുവചനത്തെ ആസ്പദമാക്കിയാണ് നവാഗതരെ സെമിനാരി കുടുംബം സ്വീകരിച്ചത്. ദൈവവിളിയോട് വിശ്വസ്തരായി സഭയ്ക്കും സമൂഹത്തിനും ഫലദായകമായ ശുശ്രൂഷകർ ആകുവാൻ വിദ്യാർത്ഥികൾക്ക് ചടങ്ങിൽ ആഹ്വാനം നൽകി. ചടങ്ങിൽ സെമിനാരി റസിഡന്റ് മെത്രാപ്പോലീത്ത അഭിവന്ദ്യ ഡോ. മോർ തെയോഫിലോസ് കുര്യാക്കോസ്, സെമിനാരി പ്രിൻസിപ്പൽ വെരി റവ. അദായി ജേക്കബ് കോർഎപ്പിസ്കോപ്പ, വെരി. റെവ. മിഖായേൽ റമ്പാൻ, വെരി. റവ. സലീബ കൊള്ളന്നൂർ റമ്പാൻ എന്നിവർ സന്നിഹിതരായി നവാഗതരെ സ്വാഗതം ചെയ്യുകയും ആശംസകൾ നേർക്കുകയും ചെയ്തു. സെമിനാരി ജീവിതം ആത്മീയ വളർച്ചയുടെയും അച്ചടക്കത്തിന്റെയും വിജ്ഞാനാർജ്ജനത്തിന്റെയും സമഗ്ര രൂപീകരണത്തിന്റെയും കാലഘട്ടമാണെന്നും, ദൈവം ഏൽപ്പിച്ച ദൗത്യത്തിന് വിശ്വസ്തരായി സ്വയം ഒരുക്കപ്പെടണമെന്നും അവർ ഉദ്ബോധിപ്പിച്ചു. സെമിനാരി ജീവിതം കേവലം അക്കാദമിക പഠനത്തിൽ ഒതുങ്ങുന്നതല്ലെന്നും, ആത്മീയ രൂപീകരണം, പ്രാർത്ഥനാനിഷ്ഠ, സഭാപാരമ്പര്യങ്ങളിലുള്ള പരിശീലനം, അച്ചടക്കജീവിതം, ശുശ്രൂഷാ മനോഭാവം എന്നിവ വളർത്തിയെടുക്കുന്ന സമഗ്രമായ പരിശീലന പ്രക്രിയയാണെന്നും ചടങ്ങിൽ ചൂണ്ടിക്കാട്ടി. സെമിനാരി അധ്യാപകരും വൈദികരും വിദ്യാർത്ഥികളും ചേർന്ന് പുതിയ ഓറിയന്റേഷൻ ബാച്ചിനെ ഹൃദയപൂർവം സ്വീകരിച്ചു.

Comments (0)

Related Stories