'കൂട്' ഭവനപദ്ധതിക്ക് തുടക്കം; നാല് നിർധന കുടുംബങ്ങളുടെ സ്വപ്നഭവനങ്ങൾക്ക് ശിലാസ്ഥാപനം നിർവഹിച്ചു

മലബാർ ● സ്വന്തമായി ഒരു സുരക്ഷിത ഭവനം എന്ന സ്വപ്നവുമായി വർഷങ്ങളായി കഴിയുന്ന നാല് നിർധന കുടുംബങ്ങൾക്ക് പ്രതീക്ഷയുടെ പുതിയ അധ്യായം തുറന്ന്, പരിശുദ്ധ യാക്കോബായ സുറിയാനി ക്രിസ്ത്യാനി സഭയുടെ മലബാർ ഭദ്രാസന സാമൂഹ്യസേവന വിഭാഗമായ 'കൂട്' ഭവനപദ്ധതിയുടെ ഭാഗമായി നിർമ്മിക്കുന്ന നാല് വീടുകളുടെ ശിലാസ്ഥാപനം ഭക്തിനിർഭരമായ ചടങ്ങിൽ നടന്നു.അഭിവന്ദ്യ സ്റ്റീഫാനോസ് ഗീവർഗീസ് മെത്രാപ്പോലീത്ത ശിലാസ്ഥാപന കർമം നിർവഹിച്ചു. സ്വന്തമായി ഒരു വീട് എന്നത് വെറും നാല് ചുമരുകളും ഒരു മേൽക്കൂരയും മാത്രമല്ല, സുരക്ഷിതമായ ജീവിതത്തിന്റെയും പ്രതീക്ഷയുടെയും അന്തസ്സിന്റെയും പ്രതീകമാണ്, സാധാരണ മനുഷ്യൻ സന്ധ്യയാകുമ്പോൾ സ്വന്തം വീട്ടിലേക്ക് മടങ്ങുമ്പോൾ, അന്തിയുറങ്ങാൻ പോലും ഇടമില്ലാതെ കഴിയുന്ന കുടുംബങ്ങളുടെ വേദന സമൂഹത്തിന്റെ കൂട്ടുത്തരവാദിത്വമാണ്, അത്തരത്തിൽ ജീവിതത്തിന്റെ പ്രയാസങ്ങൾക്കിടയിൽ കഴിയുന്ന നാല് കുടുംബങ്ങൾക്കാണ് 'കൂട്' പദ്ധതിയിലൂടെ സുരക്ഷിതമായ ഭവനങ്ങൾ നിർമ്മിച്ച് നൽകുന്നത്.ഈ ജീവകാരുണ്യ പദ്ധതിയുടെ ഏറ്റവും ശ്രദ്ധേയമായ ഭാഗം, വീടുകൾ നിർമ്മിക്കുന്നതിനായി ആടുപാറ പുത്തൻപുരയിൽ ബൈജുവും കുടുംബവും സ്വന്തം സ്ഥലം സൗജന്യമായി വിട്ടുനൽകിയതാണ്. സഹജീവികളോടുള്ള കരുതലിന്റെയും മനുഷ്യസ്നേഹത്തിന്റെയും ഉത്തമ മാതൃകയായ ഈ പ്രവർത്തനത്തിന് പ്രത്യേകം അഭിനന്ദനം അർഹിക്കുന്നു.പദ്ധതിയുടെ സാക്ഷാത്കാരത്തിനായി അമേരിക്കൻ ഭദ്രാസനാധിപൻ അഭിവന്ദ്യ എൽദോ മോർ തീത്തോസ് മെത്രാപ്പോലീത്ത ഉൾപ്പെടെ നിരവധി സുമനസുകളും സഹായഹസ്തവുമായി മുന്നോട്ടുവന്നിട്ടുണ്ട്. പണത്തിന്റെ മഹത്വത്തേക്കാൾ മനുഷ്യസ്നേഹത്തിന്റെയും കാരുണ്യത്തിന്റെയും മഹത്വമാണ് സമൂഹത്തെ മുന്നോട്ട് നയിക്കുന്നത് എന്ന് നമ്മെ ഓര്മിപ്പിക്കുന്നതായിരുന്നു ചടങ്ങുകൾ. 2026 ജൂലൈ 20-ന് രാവിലെ 10 മണിക്ക് നടന്ന ശിലാസ്ഥാപന ചടങ്ങിൽ മലബാർ ഭദ്രാസന വൈദികരും വിശ്വാസികളും സാമൂഹ്യ-സാംസ്കാരിക രംഗത്തെ പ്രമുഖരും പങ്കെടുത്തു. നാല് വീടുകൾ മാത്രമല്ല, നാല് കുടുംബങ്ങളുടെ ഭാവിയും പ്രതീക്ഷയും സുരക്ഷിതമാക്കുന്ന ഒരു ജീവകാരുണ്യ ദൗത്യമാണ് 'കൂട്' ഭവനപദ്ധതി. ഇത്തരത്തിലുള്ള കാരുണ്യ പ്രവർത്തനങ്ങളിൽ പങ്കാളികളാകാൻ കൂടുതൽ സുമനസ്സുകൾ മുന്നോട്ടുവരണമെന്നും, സമൂഹത്തിലെ നിർധനർക്കും ഭവനരഹിതർക്കും പ്രതീക്ഷയുടെ ചിറകുകൾ നൽകുന്ന ഈ സംരംഭത്തിന് എല്ലാവരുടെയും പ്രാർത്ഥനയും പിന്തുണയും അഭ്യർഥിക്കുന്നതായും അഭിവന്ദ്യ സ്റ്റീഫാനോസ് ഗീവർഗീസ് മെത്രാപ്പോലീത്ത പറഞ്ഞു.

Comments (0)

Related Stories