കരുണയുടെ പുതിയ അധ്യായത്തിന് തുടക്കം; കനാൻ സീനിയർ ലിവിംഗ് ഹോമിന് ശ്രേഷ്ഠ കാതോലിക്ക ബാവ മന്ദിരകൂദാശ നിർവഹിച്ചു

കോട്ടയം ● പരിശുദ്ധ യാക്കോബായ സുറിയാനി ക്രിസ്ത്യാനി സഭയുടെ നിയന്ത്രണത്തിൽ പ്രവർത്തിക്കുന്ന മോർ അന്തോണിയോസ് ഇവാഞ്ചലിക്കൽ മിഷൻ (AEM) ട്രസ്റ്റിന്റെ ആഭിമുഖ്യത്തിൽ നിർമ്മിച്ച കനാൻ സീനിയർ ലിവിംഗ് ഹോമിന്റെ മന്ദിരകൂദാശ ഭക്തിനിർഭരമായ അന്തരീക്ഷത്തിൽ നടന്നു.പരിശുദ്ധ സഭയുടെ ശ്രേഷ്ഠ കാതോലിക്ക ആബൂൻ മോർ ബസേലിയോസ് ജോസഫ് ബാവ മന്ദിരകൂദാശ കർമം നിർവഹിച്ച് സീനിയർ ലിവിംഗ് ഹോം സമർപ്പിച്ചു. വയോജനങ്ങൾക്ക് സുരക്ഷിതവും സ്നേഹപൂർണവും ആത്മീയാന്തരീക്ഷമുള്ള താമസസൗകര്യം ഒരുക്കുകയെന്ന ലക്ഷ്യത്തോടെയുള്ള ഈ ജീവകാരുണ്യ സംരംഭം സഭയുടെ സാമൂഹിക പ്രതിബദ്ധതയുടെ മറ്റൊരു സുപ്രധാന നാഴികക്കല്ലായാണ് വിലയിരുത്തപ്പെടുന്നത്.ചടങ്ങിൽ തൂത്തൂട്ടി മോർ ഗ്രിഗോറിയൻ ധ്യാനകേന്ദ്രം ഡയറക്ടറും മലങ്കര യാക്കോബായ സുറിയാനി ഓർത്തഡോക്സ് സഭയുടെ ഇടുക്കി ഭദ്രാസനാധിപനുമായ അഭിവന്ദ്യ സഖറിയാസ് മോർ പീലക്സിനോസ് മെത്രാപ്പോലീത്ത, അഭിവന്ദ്യ മാത്യൂസ് മോർ അഫ്രേം മെത്രാപ്പോലീത്ത, റമ്പാൻമാർ, വൈദികർ, സന്യാസിനികൾ, വിവിധ ഇടവകകളിൽ നിന്നുള്ള വിശ്വാസികൾ എന്നിവർ സന്നിഹിതരായി.വയോജനങ്ങൾക്ക് അന്തസ്സോടെയും സുരക്ഷിതത്വത്തോടെയും ആത്മീയ പരിപാലനത്തോടെയും ജീവിക്കാൻ അനുയോജ്യമായ അന്തരീക്ഷം ഒരുക്കുകയെന്ന ലക്ഷ്യത്തോടെയാണ് കനാൻ സീനിയർ ലിവിംഗ് ഹോം സജ്ജമാക്കിയിരിക്കുന്നത്. ആരാധനാ ശുശ്രൂഷകൾക്കും ആശീർവാദത്തിനും ശേഷമാണ് മന്ദിരകൂദാശ ചടങ്ങുകൾ സമാപിച്ചത്. തുടർന്ന് വൈകിട്ട് 4 മണിക്ക് നടക്കുന്ന പൊതുസമ്മേളനത്തിൽ കേരള മുഖ്യമന്ത്രി ശ്രീ. വി.ഡി. സതീശൻ കനാൻ സീനിയർ ലിവിംഗ് ഹോം ഉദ്ഘാടനം ചെയ്യും. കേരള നിയമസഭാ സ്പീക്കർ അഡ്വ. തിരുവഞ്ചൂർ രാധാകൃഷ്ണൻ വിവിധ ജീവകാരുണ്യ പദ്ധതികളുടെ ഉദ്ഘാടനം നിർവഹിക്കും. പുതുപ്പള്ളി എം.എൽ.എ ശ്രീ. ചാണ്ടി ഉമ്മൻ മുഖ്യപ്രഭാഷണം നടത്തും.രാഷ്ട്രീയ, സാമൂഹിക, മത, സാംസ്കാരിക രംഗങ്ങളിലെ പ്രമുഖർ ചടങ്ങിൽ പങ്കെടുക്കുകയും ആശംസകൾ അർപ്പിക്കുകയും ചെയ്യും.

Comments (0)

Related Stories