ഉത്തരേന്ത്യയിലേക്കെത്തുന്ന മലയാളികൾക്ക് കൈത്താങ്ങായി ഡൽഹി ഭദ്രാസനത്തിന്റെ 'ഹെൽപ്പ് ഡെസ്ക്'; ലോഗോ പ്രകാശനം ചെയ്തു

ന്യൂഡൽഹി ● ഉത്തരേന്ത്യൻ സംസ്ഥാനങ്ങളിലേക്ക് വിവിധ ആവശ്യങ്ങൾക്കായി ആദ്യമായി എത്തുന്ന മലങ്കര യാക്കോബായ സുറിയാനി ഓർത്തഡോക്സ് സഭാംഗങ്ങൾക്കും മറ്റ് മലയാളികൾക്കും സുരക്ഷിത യാത്രയും ആവശ്യമായ സഹായവും ഉറപ്പാക്കുന്നതിനായി യാക്കോബായ സുറിയാനി സഭ ഡൽഹി ഭദ്രാസനം ആരംഭിക്കുന്ന 'ഹെൽപ്പ് ഡെസ്ക്' പദ്ധതിയുടെ ലോഗോ പ്രകാശനം ചെയ്തു.കിംഗ്സ്വേ ക്യാമ്പ് സെന്റ് തോമസ് യാക്കോബായ സുറിയാനി പള്ളിയിലെ പെരുന്നാൾ ആഘോഷങ്ങളുടെ ഭാഗമായി നടന്ന ചടങ്ങിൽ ഡൽഹി ഭദ്രാസനാധിപൻ അഭിവന്ദ്യ മോർ യൗസേബിയോസ് കുര്യാക്കോസ് മെത്രാപ്പോലീത്ത ലോഗോ പ്രകാശനം നിർവഹിച്ചു. ഹെൽപ്പ് ഡെസ്ക് കോർഡിനേറ്റർമാരായ റവ. ഫാ. ബോബി ജോർജ്, എ.ഐ. വർഗീസ്, ബിനു മാത്യു, മാത്യു കുര്യൻ, പോൾസൺ എം.എ. എന്നിവർക്ക് ലോഗോ കൈമാറിയാണ് പ്രകാശനകർമം നിർവഹിച്ചത്.ഡൽഹി ഭദ്രാസന കൗൺസിലിന്റെ സുപ്രധാന തീരുമാനങ്ങളിലൊന്നായ ഈ പദ്ധതി, ഡൽഹി, ഹരിയാന, പഞ്ചാബ്, രാജസ്ഥാൻ, മധ്യപ്രദേശ്, പശ്ചിമ ബംഗാൾ (കൊൽക്കത്ത), ചണ്ഡീഗഡ് എന്നിവ ഉൾപ്പെടെയുള്ള ഉത്തരേന്ത്യൻ സംസ്ഥാനങ്ങളിലേക്ക് പഠനം, തൊഴിൽ, ചികിത്സ, തീർഥാടനം, യാത്ര, വിദേശ ട്രാൻസിറ്റ് തുടങ്ങിയ ആവശ്യങ്ങൾക്കായി എത്തുന്ന മലയാളികൾക്ക് സമഗ്രമായ സഹായം ലഭ്യമാക്കുകയാണ് ലക്ഷ്യമിടുന്നത്.ഡൽഹി അന്താരാഷ്ട്ര വിമാനത്താവളത്തിലൂടെ ഒറ്റയ്ക്ക് ആഭ്യന്തര-അന്തർദേശീയ ട്രാൻസിറ്റ് യാത്ര നടത്തുന്ന മുതിർന്ന പൗരന്മാർക്ക് ആവശ്യമായ മാർഗനിർദേശവും സുരക്ഷയും യാത്രാസഹായവും ഹെൽപ്പ് ഡെസ്ക് ഉറപ്പാക്കും. ഭാഷാപരമായ ബുദ്ധിമുട്ടുകൾ നേരിടുന്നവർക്കും യാത്രയ്ക്കിടെയുണ്ടാകുന്ന അടിയന്തര സാഹചര്യങ്ങളിൽ സഹായം ആവശ്യമായവർക്കുമായി പ്രത്യേക പിന്തുണാ സംവിധാനവും ഒരുക്കിയിട്ടുണ്ട്.കൂടാതെ, ഉന്നതപഠനം, തൊഴിൽ, മത്സരപരീക്ഷകൾ, വിദേശയാത്രാ ട്രാൻസിറ്റ് എന്നിവയ്ക്കായി ഡൽഹിയിലെത്തുന്ന വിദ്യാർഥികൾക്കും യുവാക്കൾക്കും ആവശ്യമായ വിവരങ്ങളും മാർഗനിർദേശങ്ങളും ഹെൽപ്പ് ഡെസ്കിലൂടെ ലഭ്യമാക്കും.ഉത്തരേന്ത്യയിലെത്തുന്ന യാക്കോബായ സഭാംഗങ്ങൾക്കും മറ്റ് മലയാളികൾക്കും സുരക്ഷിതവും ആത്മവിശ്വാസപൂർണവുമായ യാത്രാനുഭവം ഒരുക്കുകയെന്ന ലക്ഷ്യത്തോടെ ആരംഭിക്കുന്ന ഈ സംരംഭം അനേകർക്ക് ആശ്വാസവും കൈത്താങ്ങുമായി മാറുമെന്ന് ഡൽഹി ഭദ്രാസന നേതൃത്വം അറിയിച്ചു. ഹെൽപ്പ് ഡെസ്കുമായി ബന്ധപ്പെടാൻ: 📞 81787 00696.

Comments (0)

Related Stories