പുനർനിർമാണം പുരോഗമിക്കുന്ന റാക്കാട് സെന്റ് മേരീസ് നേർച്ചപള്ളി സന്ദർശിച്ച് മോർ തീമോഥിയോസ് മാത്യൂസ് മെത്രാപ്പോലീത്ത

റാക്കാട് (മൂവാറ്റുപുഴ) ● വീട്ടൂർ ദയറാധിപൻ അഭിവന്ദ്യ മോർ തീമോഥിയോസ് മാത്യൂസ് മെത്രാപ്പോലീത്ത, പുനർനിർമാണം പുരോഗമിക്കുന്ന റാക്കാട് സെന്റ് മേരീസ് യാക്കോബായ സുറിയാനി നേർച്ചപള്ളി സന്ദർശിച്ചു. നിർമാണ പ്രവർത്തനങ്ങളുടെ പുരോഗതി നേരിട്ട് വിലയിരുത്തിയ തിരുമേനി, ദൈവാലയത്തിന്റെ നിർമ്മാണം ദൈവാനുഗ്രഹത്താൽ സുഗമമായും ഭംഗിയായും പൂർത്തീകരിക്കപ്പെടട്ടെയെന്ന് പ്രാർത്ഥിക്കുകയും ആശംസകൾ അറിയിക്കുകയും ചെയ്തു. സന്ദർശനത്തിനിടെ നിർമാണത്തിന്റെ വിവിധ ഘട്ടങ്ങളെക്കുറിച്ച് മെത്രാപ്പോലീത്ത വിശദമായി മനസ്സിലാക്കി. വിശ്വാസിസമൂഹത്തിന്റെ സഹകരണത്തോടെയും സമർപ്പണത്തോടെയും പുരോഗമിക്കുന്ന ദൈവാലയ നിർമ്മാണം ഇടവകയുടെ ആത്മീയ വളർച്ചയ്ക്ക് പുതിയ ഊർജം പകരുന്നതാണെന്ന് അദ്ദേഹം അഭിപ്രായപ്പെട്ടു. ദൈവാലയ നിർമാണ പ്രവർത്തനങ്ങൾക്കായി അക്ഷീണം പരിശ്രമിക്കുന്ന വൈദികരെയും ഇടവക ഭാരവാഹികളെയും വിശ്വാസികളെയും തിരുമേനി അഭിനന്ദിച്ചു. നിർമ്മാണ പ്രവർത്തനങ്ങൾ സമയബന്ധിതമായി പൂർത്തിയാക്കി വിശ്വാസിസമൂഹത്തിന് സമർപ്പിക്കാൻ സർവ്വശക്തനായ ദൈവം അനുഗ്രഹം നൽകട്ടെയെന്നും അദ്ദേഹം ആശംസിച്ചു. ഇടവക വികാരി റവ. ഫാ. എൽദോസ് മോളെകുടിയിൽ, സഹവികാരി റവ. ഫാ. ബേസിൽ പതിയാരത്ത് പറമ്പിൽ എന്നിവർ മെത്രാപ്പോലീത്തയെ സ്വീകരിച്ചു. ഇടവക ട്രസ്റ്റിമാർ, മാനേജിങ് കമ്മിറ്റി അംഗങ്ങൾ, നിർമാണ കമ്മിറ്റി ഭാരവാഹികൾ, വിശ്വാസികൾ എന്നിവരും സന്ദർശനത്തിൽ സന്നിഹിതരായിരുന്നു. ആത്മീയ പാരമ്പര്യവും വിശ്വാസജീവിതവും കൂടുതൽ ശക്തിപ്പെടുത്തുന്ന ദൈവാലയമായി റാക്കാട് സെന്റ് മേരീസ് നേർച്ചപള്ളി വളരട്ടെയെന്ന് പ്രാർത്ഥിച്ചുകൊണ്ടാണ് മെത്രാപ്പോലീത്ത മടങ്ങിപ്പോയത്.

Comments (0)

Related Stories