തിരുവനന്തപുരം മേഖലയ്ക്ക് പുതിയ നേതൃത്വം; ഡോ. മോർ തെയോഫിലോസ് കുര്യാക്കോസ് മെത്രാപ്പോലീത്തയുടെ സുന്ത്രോണീസോ ഭക്തിനിർഭരമായി

തിരുവനന്തപുരം ● മലങ്കര യാക്കോബായ സുറിയാനി ഓർത്തഡോക്സ് സഭയുടെ പുതുതായി രൂപീകരിച്ച തിരുവനന്തപുരം മേഖലയുടെ പ്രഥമ മെത്രാപ്പോലീത്തയായി അഭിവന്ദ്യ ഡോ. മോർ തെയോഫിലോസ് കുര്യാക്കോസ് മെത്രാപ്പോലീത്തയുടെ സുന്ത്രോണീസോ (സ്ഥാനാരോഹണ) ശുശ്രൂഷ തിരുവനന്തപുരം പുന്നൻ റോഡിലെ സെന്റ് പീറ്റേഴ്സ് യാക്കോബായ സുറിയാനി ഓർത്തഡോക്സ് സിംഹാസന കത്തീഡ്രലിൽ ഭക്തിനിർഭരമായ അന്തരീക്ഷത്തിൽ നടന്നു. മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കയും മലങ്കര മെത്രാപ്പോലീത്തയുമായ ആബൂൻ മോർ ബസേലിയോസ് ജോസഫ് ബാവ മുഖ്യകാർമികത്വം വഹിച്ച ശുശ്രൂഷയിൽ സഭയിലെ മെത്രാപ്പോലീത്തമാരും വൈദികരും സഹകാർമികരായി. തുടർന്ന് നടന്ന സ്വീകരണ സമ്മേളനത്തിൽ കേരള മുഖ്യമന്ത്രി ശ്രീ വി.ഡി. സതീശൻ ആശംസകൾ അർപ്പിച്ചു, പ്രസംഗത്തിൽ മലങ്കര സഭാ തർക്കം എല്ലാവർക്കും സ്വീകാര്യമായ രീതിയിൽ പരിഹരിക്കുകയാണ് സംസ്ഥാന സർക്കാരിന്റെ ആഗ്രഹമെന്ന് മുഖ്യമന്ത്രി വ്യക്തമാക്കി. ആർക്കും അഭിമാനപ്രശ്നം ഉണ്ടാകാത്ത വിധത്തിൽ പ്രശ്നത്തിന് പരിഹാരം കാണാൻ കഴിയണമെന്നാണ് സർക്കാരിന്റെ നിലപാടെന്നും, അതിനായി സർക്കാർ മുൻകൈയെടുത്ത് ആത്മാർത്ഥമായ ഇടപെടൽ നടത്തുമെന്നും അദ്ദേഹം പറഞ്ഞു. മലങ്കര സഭാ തർക്കം പരിഹരിക്കപ്പെടുക എന്നത് തന്റെ സ്വപ്നങ്ങളിൽ ഒന്നാണെന്നും, പരസ്പര ബഹുമാനവും സഹകരണവും നിലനിർത്തി എല്ലാ വിഭാഗങ്ങൾക്കും അംഗീകരിക്കാവുന്ന ശാശ്വത പരിഹാരത്തിലേക്ക് എത്താൻ സർക്കാർ പ്രതിബദ്ധമാണെന്നും മുഖ്യമന്ത്രി കൂട്ടിച്ചേർത്തു. ആയതിനു മലങ്കര സുറിയാനി കത്തോലിക്കാ സഭയുടെ തലവൻ കർദിനാൾ ബസേലിയോസ് ക്ലീമിസ് കാതോലിക്കാ ബാവയുടെ പൂർണ്ണ പിന്തുണയും അദ്ദേഹം അഭ്യർത്ഥിച്ചു. ചടങ്ങിനിടെ ശ്രേഷ്ഠ കാതോലിക്ക ആബൂൻ മോർ ബസേലിയോസ് ജോസഫ് ബാവ, സഭയുടെ ഉപഹാരമായി 'സുറിയാനിസഭ ചരിത്രവും വിശ്വാസസത്യങ്ങളും' എന്ന ഗ്രന്ഥം ഉൾപ്പെടെ മൂന്ന് പുസ്തകങ്ങൾ കേരള മുഖ്യമന്ത്രി വി.ഡി. സതീശന് സമ്മാനിച്ചു. ചടങ്ങിൽ മന്ത്രി അനൂപ് ജേക്കബും പങ്കെടുത്തു. ആശംസകൾ നേർന്ന് സംസാരിച്ച മലങ്കര സുറിയാനി കത്തോലിക്കാ സഭയുടെ തലവൻ മേജർ ആർച്ച് ബിഷപ്പ് കർദിനാൾ ബസേലിയോസ് ക്ലീമിസ് കാതോലിക്കാ ബാവ, "ഒരു സഭാധ്യക്ഷൻ പറയേണ്ട വാക്കുകളാണ് മുഖ്യമന്ത്രി പറഞ്ഞത്" എന്ന് അഭിപ്രായപ്പെട്ടു. സഭകൾ തമ്മിലുള്ള ഐക്യവും പരസ്പര സഹകരണവും കാലഘട്ടത്തിന്റെ ആവശ്യകതയാണെന്നും അദ്ദേഹം പറഞ്ഞു. സ്വീകരണ സമ്മേളനത്തിൽ വിവിധ ക്രൈസ്തവ സഭകളുടെ മേലധ്യക്ഷന്മാർ, മെത്രാപ്പോലീത്തമാർ, വൈദികർ, സന്യാസിമാർ, ജനപ്രതിനിധികൾ, രാഷ്ട്രീയ, സാമൂഹിക, സാംസ്കാരിക രംഗങ്ങളിലെ പ്രമുഖർ, വിവിധ ഭദ്രാസനങ്ങളിൽ നിന്നുള്ള വിശ്വാസികൾ എന്നിവർ പങ്കെടുത്തു. സമ്മേളനത്തിന്റെ അവസാനം അഭിവന്ദ്യ ഡോ. മോർ തെയോഫിലോസ് കുര്യാക്കോസ് മെത്രാപ്പോലീത്ത നന്ദിപ്രസംഗം നടത്തി. പുതിയതായി രൂപീകരിച്ച തിരുവനന്തപുരം മേഖലയുടെ ആത്മീയ വളർച്ചയ്ക്കും സഭയുടെ ഇടയശുശ്രൂഷകൾ ശക്തിപ്പെടുത്തുന്നതിനുമായി പ്രാർത്ഥനയും സഹകരണവും നൽകിയ ശ്രേഷ്ഠ കാതോലിക്ക ബാവയ്ക്കും, മെത്രാപ്പോലീത്തമാർക്കും, വിവിധ സഭാ നേതാക്കൾക്കും, മുഖ്യമന്ത്രിക്കും, മന്ത്രിമാർക്കും, ജനപ്രതിനിധികൾക്കും, വിശിഷ്ടാതിഥികൾക്കും, വിശ്വാസിസമൂഹത്തിനും അദ്ദേഹം ഹൃദയംഗമമായ നന്ദി രേഖപ്പെടുത്തി. ചടങ്ങുകൾക്ക് സമാപനമായി ഒരുക്കിയ സ്നേഹവിരുന്നിൽ വിശിഷ്ടാതിഥികളും മെത്രാപ്പോലീത്തമാരും വൈദികരും വിവിധ സഭാ നേതാക്കളും വിശ്വാസിസമൂഹവും പങ്കുചേർന്നു. സ്നേഹത്തിന്റെയും സാഹോദര്യത്തിന്റെയും സന്ദേശം പകർന്ന സ്നേഹവിരുന്നിൽ സംബന്ധിച്ചശേഷമാണ് വിവിധ ഭാഗങ്ങളിൽ നിന്നെത്തിയ വിശ്വാസികൾ മടങ്ങിയത്.

Comments (0)

Related Stories