തിരുവനന്തപുരം മേഖലയുടെ പ്രഥമ മെത്രാപ്പോലീത്തയായി സ്ഥാനമേൽക്കുന്ന ഡോ. മോർ തെയോഫിലോസ് കുര്യാക്കോസ് മെത്രാപ്പോലീത്ത കത്തീഡ്രലിൽ വിശുദ്ധ കുർബാന അർപ്പിച്ചു

തിരുവനന്തപുരം ● മലങ്കര യാക്കോബായ സുറിയാനി ഓർത്തഡോക്സ് സഭയുടെ പുതുതായി രൂപീകരിച്ച തിരുവനന്തപുരം മേഖലയുടെ പ്രഥമ മെത്രാപ്പോലീത്തയായി ചുമതലയേൽക്കുന്ന അഭിവന്ദ്യ ഡോ. മോർ തെയോഫിലോസ് കുര്യാക്കോസ് മെത്രാപ്പോലീത്ത, സ്ഥാനാരോഹണ ശുശ്രൂഷകൾക്ക് മുന്നോടിയായി ഇന്ന് രാവിലെ തിരുവനന്തപുരം പുന്നൻ റോഡിലെ സെന്റ് പീറ്റേഴ്സ് യാക്കോബായ സുറിയാനി ഓർത്തഡോക്സ് സിംഹാസന കത്തീഡ്രലിൽ വിശുദ്ധ കുർബാനയ്ക്ക് മുഖ്യകാർമികത്വം വഹിച്ചു. പുതിയ മേഖലയുടെ ആത്മീയ നേതൃത്വത്തിന്റെ തുടക്കമെന്ന നിലയിൽ വിശേഷ പ്രാധാന്യമാർന്ന ഈ വിശുദ്ധ കുർബാനയിൽ വൈദികരും വിശ്വാസിസമൂഹവും വലിയ ഭക്തിനിർഭരതയോടെ പങ്കുചേർന്നു. പുതിയ ശുശ്രൂഷാ ദൗത്യത്തിന് ദൈവാനുഗ്രഹം പ്രാർത്ഥിച്ചുകൊണ്ടാണ് വിശുദ്ധ കുർബാന അർപ്പിക്കപ്പെട്ടത്. ഇന്ന് വൈകുന്നേരം 5 മണിക്ക് കത്തീഡ്രലിൽ നടക്കുന്ന സ്ഥാനാരോഹണ ശുശ്രൂഷയിൽ മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കയും മലങ്കര മെത്രാപ്പോലീത്തയുമായ ആബൂൻ മോർ ബസേലിയോസ് ജോസഫ് കാതോലിക്കാ ബാവ മുഖ്യകാർമികത്വം വഹിക്കും. സഭയിലെ മെത്രാപ്പോലീത്തമാരും വൈദികരും ശുശ്രൂഷയിൽ സഹകാർമികരാകും.തുടർന്ന് നടക്കുന്ന സ്വീകരണ സമ്മേളനത്തിൽ കേരളത്തിന്റെ രാഷ്ട്രീയ, സാമൂഹിക, സാംസ്കാരിക, മത മേഖലകളിലെ പ്രമുഖർ പങ്കെടുക്കും.ചടങ്ങിൽ കേരള മുഖ്യമന്ത്രി ശ്രീ. വി.ഡി. സതീശൻ, കേരള നിയമസഭാ സ്പീക്കർ അഡ്വ. തിരുവഞ്ചൂർ രാധാകൃഷ്ണൻ, മന്ത്രിമാർ, ജനപ്രതിനിധികൾ, മലങ്കര യാക്കോബായ സുറിയാനി ഓർത്തഡോക്സ് സഭയിലെ മെത്രാപ്പോലീത്തമാർ, വിവിധ ക്രൈസ്തവ സഭകളിലെ മെത്രാപ്പോലീത്തമാർ, വൈദികർ, സന്യാസിമാർ, മത-രാഷ്ട്രീയ-സാമൂഹിക-സാംസ്കാരിക രംഗങ്ങളിലെ പ്രമുഖർ എന്നിവർ പങ്കെടുക്കുമെന്ന് സംഘാടകർ അറിയിച്ചു.തിരുവനന്തപുരം മേഖലയുടെ ആത്മീയ നേതൃത്വത്തിന് പുതിയ അധ്യായത്തിന് തുടക്കം കുറിക്കുന്ന സുപ്രധാന ചടങ്ങായാണ് സുന്ത്രോണീസോ ശുശ്രൂഷയെ സഭ വിലയിരുത്തുന്നത്. മെത്രാപ്പോലീത്തയുടെ നേതൃത്വത്തിൽ മേഖലയുടെ ആത്മീയ പ്രവർത്തനങ്ങൾക്കും അജപാലന ശുശ്രൂഷകൾക്കും കൂടുതൽ കരുത്തും ദിശാബോധവും ലഭിക്കുമെന്ന പ്രതീക്ഷയാണ് വിശ്വാസിസമൂഹത്തിനുള്ളത്.തിരുവനന്തപുരം മേഖലയിലെ വിവിധ ഇടവകകളിൽ നിന്നായി വലിയ തോതിൽ വൈദികരും വിശ്വാസികളും ചടങ്ങിൽ പങ്കെടുക്കും. വിശുദ്ധ ശുശ്രൂഷകൾക്കും സ്വീകരണ സമ്മേളനത്തിനുമുള്ള എല്ലാ ഒരുക്കങ്ങളും പൂർത്തിയായതായി സംഘാടക സമിതി അറിയിച്ചു.പരിശുദ്ധ അന്ത്യോഖ്യാ സിംഹാസനത്തോടുള്ള അചഞ്ചലമായ വിശ്വസ്തതയും സഭയുടെ അപ്പസ്തോലിക പാരമ്പര്യവും ഉയർത്തിപ്പിടിച്ചുകൊണ്ട് തിരുവനന്തപുരം മേഖലയുടെ ആത്മീയ വളർച്ചയ്ക്ക് അഭിവന്ദ്യ ഡോ. കുര്യാക്കോസ് മോർ തെയോഫിലോസ് മെത്രാപ്പോലീത്തയുടെ നേതൃത്വം പുതിയ ഊർജവും ദിശയും നൽകുമെന്ന പ്രത്യാശയിലാണ് സഭയും വിശ്വാസിസമൂഹവും.

Comments (0)

Related Stories