ആരോഗ്യകരമായ ജീവിതശൈലിക്ക് പ്രചോദനമായി സെന്റ് ഗ്രിഗോറിയോസ് മെൻസ് ഫെലോഷിപ്പ് ആരോഗ്യ സെമിനാർ

അയർലണ്ട് (ഡബ്ലിൻ ) ● സെന്റ് ഗ്രിഗോറിയോസ് യാക്കോബായ സുറിയാനി പള്ളിയിലെ സെന്റ് ഗ്രിഗോറിയോസ് മെൻസ് ഫെലോഷിപ്പിന്റെ ആഭിമുഖ്യത്തിൽ വിശുദ്ധ കുർബാനയ്ക്കുശേഷം സംഘടിപ്പിച്ച ആരോഗ്യ ബോധവൽക്കരണ സെമിനാർ ഇടവകാംഗങ്ങളുടെ മികച്ച പങ്കാളിത്തത്തോടെ നടന്നു. ആരോഗ്യകരമായ ജീവിതശൈലി പ്രോത്സാഹിപ്പിക്കുകയും സമീകൃത ഭക്ഷണക്രമത്തിന്റെ പ്രാധാന്യത്തെക്കുറിച്ച് വിശ്വാസിസമൂഹത്തെ ബോധവൽക്കരിക്കുകയുമെന്ന ലക്ഷ്യത്തോടെയായിരുന്നു പരിപാടി. രജിസ്റ്റേർഡ് ഡയറ്റീഷ്യൻ ശ്രീമതി അന്നു എൽദോ നയിച്ച ക്ലാസിൽ, ആധുനിക ജീവിതരീതിയിൽ ആരോഗ്യ സംരക്ഷണത്തിന് ആവശ്യമായ ഭക്ഷണക്രമം, ദൈനംദിന ജീവിതത്തിൽ എളുപ്പത്തിൽ പിന്തുടരാവുന്ന ആരോഗ്യശീലങ്ങൾ, പോഷകസമൃദ്ധമായ ആഹാരത്തിന്റെ ആവശ്യകത, ജീവിതശൈലി രോഗങ്ങൾ പ്രതിരോധിക്കാനുള്ള മാർഗങ്ങൾ തുടങ്ങിയ വിഷയങ്ങൾ വിശദമായി അവതരിപ്പിച്ചു. സെമിനാറിൽ റവ. ഫാ. ജെനി ആൻഡ്രൂസ്, റവ. ഫാ. പോൾസൺ കീരിക്കാട്ടിൽ, മെൻസ് ഫെലോഷിപ്പ് ഭാരവാഹികൾ, ഇടവകാംഗങ്ങൾ എന്നിവർ പങ്കെടുത്തു. ആരോഗ്യസംരക്ഷണവുമായി ബന്ധപ്പെട്ട സംശയങ്ങൾക്ക് വിദഗ്ധ മറുപടികളും പ്രായോഗിക നിർദേശങ്ങളും നൽകിയതിനാൽ പരിപാടി ഏറെ പ്രയോജനകരമായിരുന്നുവെന്ന് പങ്കെടുത്തവർ അഭിപ്രായപ്പെട്ടു. സമീകൃത ഭക്ഷണക്രമം കുടുംബജീവിതത്തിൽ എങ്ങനെ നടപ്പാക്കാം, കുട്ടികളുടെയും മുതിർന്നവരുടെയും ആരോഗ്യസംരക്ഷണത്തിൽ ശ്രദ്ധിക്കേണ്ട കാര്യങ്ങൾ, ലളിതമായ ജീവിതശൈലി മാറ്റങ്ങളിലൂടെ ആരോഗ്യകരമായ ജീവിതം എങ്ങനെ കൈവരിക്കാം തുടങ്ങിയ വിഷയങ്ങൾ ഉദാഹരണങ്ങളോടെ അവതരിപ്പിച്ചത് സെമിനാറിന്റെ പ്രധാന ആകർഷണമായി. സെമിനാറിന്റെ സമാപന സമ്മേളനത്തിൽ റവ. ഫാ. ജെനി ആൻഡ്രൂസും റവ. ഫാ. പോൾസൺ കീരിക്കാട്ടിലും സന്ദേശങ്ങൾ നൽകി. തുടർന്ന് ശ്രീ ഡേവിഡ് തങ്കച്ചൻ നന്ദി രേഖപ്പെടുത്തി. ആത്മീയ ജീവിതത്തോടൊപ്പം ശാരീരിക ആരോഗ്യത്തിനും പ്രാധാന്യം നൽകുന്ന ഇത്തരം ബോധവൽക്കരണ പരിപാടികൾ ഇടവകയിലെ കുടുംബങ്ങൾക്ക് ഏറെ പ്രയോജനകരമാണെന്നും, ഭാവിയിലും ആരോഗ്യ, കുടുംബ, സാമൂഹിക വിഷയങ്ങളിൽ സമാനമായ സെമിനാറുകൾ സംഘടിപ്പിക്കുമെന്ന് മെൻസ് ഫെലോഷിപ്പ് ഭാരവാഹികൾ അറിയിച്ചു.

Comments (0)

Related Stories