അത്ഭുതദൃശ്യം ഉളവായ തെങ്ങോട് മോർ കുര്യാക്കോസ് സഹദാ ചാപ്പലിൽ ഓർമ്മപ്പെരുന്നാളിന് ഭക്തിനിർഭര തുടക്കം

കാക്കനാട് ● അങ്കമാലി ഭദ്രാസനത്തിലെ തെങ്ങോട് വിശുദ്ധ മർത്തമറിയം യാക്കോബായ സുറിയാനി പള്ളിയുടെ കീഴിലുള്ള, വിശ്വാസികൾ അത്ഭുതദൃശ്യം ഉളവായതായി വിശ്വസിക്കുന്ന മോർ കുര്യാക്കോസ് സഹദാ ചാപ്പലിൽ, വിശുദ്ധ മോർ കുര്യാക്കോസ് സഹദായുടെയും മോർത്ത് യൂലിത്തി അമ്മയുടെയും ഓർമ്മപ്പെരുന്നാൾ ഭക്തിനിർഭരമായ ചടങ്ങുകളോടെ ആരംഭിച്ചു. പെരുന്നാളിന് തുടക്കം കുറിച്ചുകൊണ്ട് ജൂലൈ 11-ന് വിശുദ്ധ കുർബാനയ്ക്കുശേഷം കൊടിയേറ്റ ശുശ്രൂഷ നടന്നു. തുടർന്ന് വിശുദ്ധ കുർബാന, സന്ധ്യാപ്രാർത്ഥന, പ്രത്യേക ആത്മീയ ശുശ്രൂഷകൾ എന്നിവയോടെ പെരുന്നാൾ ദിനങ്ങൾ ആചരിച്ചുവരികയാണ്. ജൂലൈ 14-ന് രാവിലെ 6.30-ന് പ്രഭാതപ്രാർത്ഥനയും 7 മണിക്ക് റവ. ഫാ. എൽദോ വർക്കി തൈക്കാനത്തിന്റെ കാർമികത്വത്തിൽ വിശുദ്ധ കുർബാനയും നടക്കും. വൈകിട്ട് 7 മണിക്ക്, അഭിവന്ദ്യ ഡോ. മോർ ഗീവർഗീസ് കൂറിലോസ് മെത്രാപ്പോലീത്തയുടെ നേതൃത്വത്തിൽ സന്ധ്യാനമസ്കാരവും ആത്മീയ സന്ദേശവും ഉണ്ടായിരിക്കും. തുടർന്ന് ഇടവകയിലെ വിവിധ പരീക്ഷകളിൽ ഉന്നത വിജയം നേടിയ വിദ്യാർത്ഥികൾക്കുള്ള അനുമോദനവും അവാർഡ് വിതരണവും, 'കൈത്താങ്ങ്' ചികിത്സാ സഹായ വിതരണം, പാച്ചോർ നേർച്ച, രാത്രി 9.15-ന് അഖണ്ഡ പ്രാർത്ഥന എന്നിവയും ക്രമീകരിച്ചിട്ടുണ്ട്. പ്രധാന പെരുന്നാൾ ദിനമായ ജൂലൈ 15-ന് രാവിലെ 6 മണിക്ക് അഖണ്ഡ പ്രാർത്ഥന സമാപിക്കും. 7.30-ന് പ്രഭാതപ്രാർത്ഥനയും 8.30-ന് അഭിവന്ദ്യ മോർ ഈവാനിയോസ് മാത്യൂസ് മെത്രാപ്പോലീത്തയുടെ മുഖ്യകാർമികത്വത്തിൽ വിശുദ്ധ കുർബാനയും അനുഗ്രഹപ്രഭാഷണവും നടക്കും. തുടർന്ന് വിശുദ്ധന്റെ തിരുശ്ശേഷിപ്പ് ആഘോഷപൂർവം പേടകത്തിൽ നിന്ന് പുറത്തെടുക്കുകയും, പ്രദക്ഷിണം, വിശ്വാസികൾക്കുള്ള ആശീർവാദം, നേർച്ചസദ്യ, എഴുത്തിനിരുത്തൽ ശുശ്രൂഷ എന്നിവ നടത്തുകയും ചെയ്യും. ഉച്ചയ്ക്ക് 12 മണിക്ക് തിരുശ്ശേഷിപ്പ് വീണ്ടും പേടകത്തിലേക്ക് ആഘോഷപൂർവം പ്രതിഷ്ഠിക്കുന്നതോടെയും കൊടിയിറക്കത്തോടെയും പെരുന്നാൾ സമാപിക്കും. പെരുന്നാൾ ശുശ്രൂഷകൾക്ക് ഇടവക വികാരിമാരായ റവ. ഫാ. ഷിബു ചെറിയാൻ കൂളിയാട്ട്, റവ. ഫാ. ഹെനു തമ്പി കണ്ടോത്തുമറ്റത്തിൽ, ട്രസ്റ്റിമാരായ എബ്രഹാം ചെറിയാൻ ഇടയത്ത്, ബിജു കുര്യൻ കയ്യാലത്ത് എന്നിവർ നേതൃത്വം നൽകും. പെരുന്നാളിന്റെ മുഴുവൻ വിശുദ്ധ ശുശ്രൂഷകളും മലങ്കര യാക്കോബായ സുറിയാനി ഓർത്തഡോക്സ് സഭയുടെ ഔദ്യോഗിക മാധ്യമ വിഭാഗമായ ജെ.എസ്.സി ന്യൂസ് മുഖേന തത്സമയം സംപ്രേഷണം ചെയ്യുമെന്ന് സംഘാടകർ അറിയിച്ചു.

Comments (0)

Related Stories