എം.ജെ.എസ്.എസ്.എ കലോത്സവ വിധികർത്താക്കൾക്ക് പരിശീലന ക്യാമ്പ്; പുതുക്കിയ മത്സരരീതികൾക്ക് പ്രത്യേക പരിശീലനം

പുത്തൻകുരിശ് ● മലങ്കര യാക്കോബായ സിറിയൻ സൺഡേ സ്കൂൾ അസോസിയേഷന്റെ (MJSSA) ആഭിമുഖ്യത്തിൽ 2026-ലെ കലോത്സവ മത്സരങ്ങളിൽ വിധികർത്താക്കളായി സേവനം അനുഷ്ഠിക്കുന്നവർക്കായുള്ള പരിശീലന ക്യാമ്പ് പുത്തൻകുരിശ് പാത്രിയർക്കാ സെന്ററിൽ സംഘടിപ്പിച്ചു. കലോത്സവങ്ങളുടെ മൂല്യനിർണയം കൂടുതൽ സുതാര്യവും ഏകീകൃതവും നിലവാരമുള്ളതുമാക്കുകയെന്ന ലക്ഷ്യത്തോടെയാണ് പരിശീലന പരിപാടി ക്രമീകരിച്ചത്. എം.ജെ.എസ്.എസ്.എ വൈസ് പ്രസിഡന്റ് റവ. ഫാ. ഷിബിൻ പോൾ അധ്യക്ഷത വഹിച്ച ഉദ്ഘാടന സമ്മേളനം അങ്കമാലി ഭദ്രാസന മൂവാറ്റുപുഴ മേഖല മെത്രാപ്പോലീത്ത അഭിവന്ദ്യ ഗബ്രിയേൽ മോർ ഗ്രീഗോറിയോസ് മെത്രാപ്പോലീത്ത ഉദ്ഘാടനം ചെയ്തു. നവാഭിഷിക്തനായ മെത്രാപ്പോലീത്തയ്ക്ക് എം.ജെ.എസ്.എസ്.എയുടെ ആഭിമുഖ്യത്തിൽ സ്വീകരണവും അനുമോദനവും ചടങ്ങിൽ നൽകി. എം.ജെ.എസ്.എസ്.എ ജനറൽ സെക്രട്ടറി എൽദോ ഐസക് സ്വാഗതം ആശംസിച്ച സമ്മേളനത്തിൽ, കലോത്സവങ്ങളുടെ ചുമതലയുള്ള സെക്രട്ടറി പി.വി. ജേക്കബ് ആമുഖ സന്ദേശം അവതരിപ്പിച്ചു. സെക്രട്ടറിമാരായ അഡ്വ. പി.ഐ. കുര്യാക്കോസ്, അവിനേഷ് തണ്ടാശ്ശേരിൽ, ട്രഷറർ എം.കെ. വർഗീസ്, മുൻ ജനറൽ സെക്രട്ടറിമാരായ ഷെവ. എം.ജെ. മർക്കോസ്, പി.വി. ഏലിയാസ്, എക്സിക്യൂട്ടീവ് കമ്മിറ്റി അംഗങ്ങളായ ഷെവ. ടി.ടി. ജോയി, സി.പി. ബെന്നി എന്നിവർ ആശംസകൾ നേർന്നു. പരിശീലന പരിപാടിയുടെ ഭാഗമായി റവ. ഫാ. സി.യു. എൽദോസ് (ആരാധനാഗീതം), റവ. ഫാ. ജിജോ വർഗീസ് (പ്രസംഗം), ബിജു ജോൺ (സംഗീതം), അവിനേഷ് തണ്ടാശ്ശേരിൽ (ക്വിസ്, തങ്കവാക്യം) എന്നിവർ വിവിധ മത്സര ഇനങ്ങളുമായി ബന്ധപ്പെട്ട പരിശീലന സെഷനുകൾ നയിച്ചു. കലോത്സവങ്ങളുടെ നടത്തിപ്പിലും മൂല്യനിർണയ രീതികളിലും ഈ വർഷം നടപ്പിലാക്കിയിട്ടുള്ള മാറ്റങ്ങൾ വിശദമായി അവതരിപ്പിക്കുകയും, വിധിനിർണയത്തിലെ ഏകീകരണം, സുതാര്യത, കൃത്യത എന്നിവ ഉറപ്പാക്കുന്നതിനുള്ള നിർദേശങ്ങൾ പരിശീലനത്തിന്റെ ഭാഗമായി നൽകുകയും ചെയ്തു. കേരളത്തിന്റെ വിവിധ ഭാഗങ്ങളിൽ നിന്നായി 192 വിധികർത്താക്കളും അധ്യാപകരും പരിശീലന ക്യാമ്പിൽ പങ്കെടുത്തത് ശ്രദ്ധേയമായി. വരാനിരിക്കുന്ന എം.ജെ.എസ്.എസ്.എ കലോത്സവങ്ങൾ കൂടുതൽ നിലവാരത്തോടെയും വിശ്വാസ്യതയോടെയും സംഘടിപ്പിക്കുന്നതിന് ഈ പരിശീലന ക്യാമ്പ് സഹായകരമാകുമെന്ന് സംഘാടകർ അറിയിച്ചു.

Comments (0)

Related Stories