ക്രൈസ്തവ ഐക്യത്തിന്റെ ശക്തി ദൈവവചനത്തിൽ; ബൈബിൾ സൊസൈറ്റി സപ്തതി ആഘോഷം ഉദ്ഘാടനം ചെയ്ത് ശ്രേഷ്ഠ കാതോലിക്ക ബാവ

കോതമംഗലം ● ബൈബിൾ സൊസൈറ്റി ഓഫ് ഇന്ത്യ കേരള ഓക്സിലറിയുടെ വാർഷിക സമ്മേളനവും സ്തോത്രശുശ്രൂഷയും സപ്തതി ആഘോഷങ്ങളുടെ സമാപനവും യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കയും മലങ്കര മെത്രാപ്പോലീത്തയുമായ ആബൂൻ മോർ ബസേലിയോസ് ജോസഫ് ബാവ ഉദ്ഘാടനം ചെയ്തു. പുതുപ്പാടി മരിയൻ അക്കാദമിയിൽ നടന്ന സമ്മേളനത്തിൽ സംസാരിച്ച ശ്രേഷ്ഠ കാതോലിക്ക ബാവ, സഭാ വിശ്വാസപാരമ്പര്യങ്ങളുടെ അതിർവരമ്പുകൾക്കപ്പുറം ദൈവവചനത്തിനുവേണ്ടി ക്രൈസ്തവർ ഒന്നിച്ചുനിൽക്കേണ്ടത് കാലഘട്ടത്തിന്റെ അനിവാര്യതയാണെന്ന് പറഞ്ഞു. ദൈവത്തോടൊത്ത് ജീവിക്കുമ്പോഴാണ് മനുഷ്യന് തന്റെ ജീവിതത്തിലൂടെ ദൈവത്തെ ലോകത്തിന് പ്രതിഫലിപ്പിക്കാൻ കഴിയുകയെന്നും ബാവ ചൂണ്ടിക്കാട്ടി. ദൈവവചന പ്രഘോഷണത്തിന്റെ 70 വർഷങ്ങൾ പൂർത്തിയാക്കുന്ന ബൈബിൾ സൊസൈറ്റി ഓഫ് ഇന്ത്യ കേരള ഓക്സിലിയറി, വരുംകാലങ്ങളിലും കൂടുതൽ ആത്മാർത്ഥതയോടെയും സമർപ്പണബോധത്തോടെയും പ്രവർത്തിച്ച് ദൈവവചനത്തിന്റെ വെളിച്ചം സമൂഹത്തിന്റെ എല്ലാ തലങ്ങളിലേക്കും എത്തിക്കണമെന്ന് ബാവ ആഹ്വാനം ചെയ്തു. ഓക്സിലിയറി പ്രസിഡന്റ് അഭിവന്ദ്യ ഡോ. തിയഡോഷ്യസ് മാർത്തോമ്മാ മെത്രാപ്പോലീത്ത അധ്യക്ഷത വഹിച്ച സമ്മേളനത്തിൽ ബൈബിൾ സൊസൈറ്റി ഓഫ് ഇന്ത്യ ജനറൽ സെക്രട്ടറി ഡോ. കവിത്തോ ജി. ഷിമോ മുഖ്യസന്ദേശം നൽകി. ഓക്സിലിയറി വൈസ് പ്രസിഡന്റ് റവ. വി.എസ്. ഫ്രാൻസിസ്, അഭിവന്ദ്യ ഡോ. സാമുവൽ മാർ തെയോഫിലോസ് മെത്രാപ്പോലീത്ത, റവ. ഡോ. ഏബ്രഹാം ചാക്കോ, അഭിവന്ദ്യ സിറിൽ മാർ ബസേലിയോസ് മെത്രാപ്പോലീത്ത, അഭിവന്ദ്യ മാത്യൂസ് മാർ അഫ്രേം മെത്രാപ്പോലീത്ത എന്നിവർ അനുഗ്രഹപ്രഭാഷണങ്ങൾ നടത്തി. ചടങ്ങിൽ ബൈബിൾ സൊസൈറ്റി ഓഫ് ഇന്ത്യയുടെ ട്രാൻസ്ലേഷൻ ഡിപ്പാർട്ട്മെന്റും കേരള ഓക്സിലിയറിയും സംയുക്തമായി തയ്യാറാക്കിയ 'മലയാളം ബൈബിൾ ഇൻ റോമൻ സ്ക്രിപ്റ്റ്' പ്രകാശനം ചെയ്തു. കൂടാതെ സപ്തതി ജൂബിലി സ്മരണികയും പ്രകാശനം ചെയ്തു. വിവിധ സഭകളുടെയും സംഘടനകളുടെയും പ്രതിനിധികളായ റവ. ഡോ. സി.ഐ. ഡേവിഡ് ജോയ്, പാസ്റ്റർ വൈ. റെജി, ഷെവ. ഷിബു തെക്കുംപുറം എം.എൽ.എ., പാസ്റ്റർ കെ.സി. ഉമ്മൻ, ലെഫ്റ്റനന്റ് കേണൽ ജേക്കബ് ജോൺ ജോസഫ്, സ്റ്റാർലാ ലൂക്ക്, ഡോ. സന്തോഷ് ജോൺ, മാർത്തോമ്മാ സഭാ സെക്രട്ടറി റവ. എബി ടി. മാമ്മൻ, ഓക്സിലിയറി സെക്രട്ടറി റവ. ജേക്കബ് ആന്റണി കുടത്തിങ്കൽ, ട്രഷറർ ഡോ. സാബു ടി. തോമസ്, സമ്മേളന ജനറൽ കൺവീനർ ഷെവ. പ്രഫ. ബേബി എം. വർഗീസ് ഉൾപ്പെടെ നിരവധി പ്രമുഖർ സമ്മേളനത്തെ അഭിസംബോധന ചെയ്തു. 2025–2026 സാമ്പത്തിക വർഷത്തിൽ വിഭവസമാഹരണത്തിലും മേരി ജോൺസ് കാർഡ് ശേഖരണത്തിലും മികച്ച പ്രകടനം കാഴ്ചവെച്ച ബ്രാഞ്ചുകൾക്കും റീജിയണുകൾക്കും വ്യക്തികൾക്കും ട്രോഫി, മെമന്റോ, സർട്ടിഫിക്കറ്റ് എന്നിവ ചടങ്ങിൽ വിതരണം ചെയ്തു. കേരളത്തിന്റെ വിവിധ ജില്ലകളിൽ നിന്നുള്ള വിവിധ ക്രൈസ്തവ സഭകളുടെ പ്രതിനിധികൾ, മെത്രാപ്പോലീത്തമാർ, വൈദികർ, ശുശ്രൂഷകർ, ബ്രാഞ്ച് പ്രവർത്തകർ, ബൈബിൾ സൊസൈറ്റി ഭാരവാഹികൾ, സ്റ്റാഫ് അംഗങ്ങൾ എന്നിവർ സമ്മേളനത്തിൽ പങ്കെടുത്തു. ദൈവവചന പ്രഘോഷണത്തിലൂടെ ക്രൈസ്തവ ഐക്യവും സമൂഹസേവനവും കൂടുതൽ ശക്തിപ്പെടുത്താനുള്ള പ്രതിജ്ഞയോടെയാണ് സപ്തതി ആഘോഷങ്ങൾക്ക് സമാപനമായത്.

Comments (0)

Related Stories