വന്ദ്യ കുര്യാക്കോസ് കാലായിൽ കശ്ശീശ കോർ എപ്പിസ്കോപ്പയായി ഉയർത്തപ്പെട്ടു

മണർകാട് ● മലങ്കര യാക്കോബായ സുറിയാനി ഓർത്തഡോക്സ് സഭയുടെ ആഗോള മരിയൻ തീർത്ഥാടന കേന്ദ്രമായ മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിലെ സഹവികാരിയായ വന്ദ്യ കുര്യാക്കോസ് കാലായിൽ കശ്ശീശ, കോർഎപ്പിസ്കോപ്പ പദവിയിലേക്ക് ഉയർത്തപ്പെട്ടു.പരിശുദ്ധ അന്ത്യോഖ്യാ സിംഹാസനാധിപനും ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷനുമായ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവായുടെ അനുഗ്രഹകൽപ്പനപ്രകാരം, കോട്ടയം ഭദ്രാസനാധിപനും ഇടവക മെത്രാപ്പോലീത്തയുമായ അഭിവന്ദ്യ ഡോ. തോമസ് മോർ തീമോത്തിയോസ് മെത്രാപ്പോലീത്തയുടെ തൃക്കരങ്ങളാൽ ഇന്ന് മണർകാട് കത്തീഡ്രലിൽ നടന്ന വിശുദ്ധ ശുശ്രൂഷകൾക്കിടയിലാണ് സ്ഥാനാരോഹണ കർമം നിർവഹിക്കപ്പെട്ടത്. ശുശ്രൂഷകളിൽ കോഴിക്കോട് ഭദ്രാസനാധിപൻ അഭിവന്ദ്യ മോർ ഐറേനിയോസ് പൗലോസ് മെത്രാപ്പോലീത്ത സഹകാർമികനായിരുന്നു.ദീർഘകാലമായി മണർകാട് കത്തീഡ്രലിന്റെ ആത്മീയ ശുശ്രൂഷകളിലും ഇടവകയുടെ ആരാധനാ-ഭരണ പ്രവർത്തനങ്ങളിലും സമർപ്പിത സേവനം കാഴ്ചവെച്ചുവരുന്ന ഫാ. കുര്യാക്കോസ് കാലായിലിന് ലഭിച്ച ഈ പദവി, അദ്ദേഹത്തിന്റെ മാതൃകാപരമായ പൗരോഹിത്യ ജീവിതത്തിനും സഭയോടുള്ള അർപ്പണബോധത്തിനും ലഭിച്ച അംഗീകാരമാണ്.സ്ഥാനാരോഹണ ശുശ്രൂഷകളിൽ സഭയിലെ വൈദികരും വിവിധ ഇടവകകളിൽ നിന്നുള്ള വിശ്വാസികളും സന്നിഹിതരായി. വിശുദ്ധ ശുശ്രൂഷകൾക്കുശേഷം കോർഎപ്പിസ്കോപ്പയ്ക്ക് സഭാ നേതാക്കളും വൈദികരും വിശ്വാസികളും പ്രാർത്ഥനാശംസകൾ നേർന്നു. ജേക്കബൈറ്റ് ഓൺലൈൻ കുടുംബം വന്ദ്യ കുര്യാക്കോസ് കാലായിൽ കോർ എപ്പിസ്കോപ്പയ്ക്ക്ഹൃദയം നിറഞ്ഞ പ്രാർത്ഥനാശംസകൾ നേരുന്നു. പരിശുദ്ധ അന്ത്യോഖ്യാ സിംഹാസനത്തോടുള്ള അചഞ്ചലമായ വിശ്വസ്തതയിലും വിശുദ്ധ സഭയുടെ ആത്മീയ ശുശ്രൂഷകളിലും അദ്ദേഹം ഇനിയും സമൃദ്ധമായി സേവനം അനുഷ്ഠിക്കാൻ സർവ്വശക്തനായ ദൈവം സമൃദ്ധമായ കൃപയും ആരോഗ്യവും ദീർഘായുസ്സും നൽകട്ടെയെന്ന് പ്രാർത്ഥിക്കുന്നു.

Comments (0)

Related Stories