ലാമ്പത്ത് പാലസിൽ ചരിത്രസംഗമം; കാന്റർബറി ആർച്ച് ബിഷപ്പുമായി സഭൈക്യവും ചരിത്രപാരമ്പര്യവും ചർച്ച ചെയ്ത് ശ്രേഷ്ഠ കാതോലിക്ക ബാവ

ലണ്ടൻ ● മലങ്കര യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കയും മലങ്കര മെത്രാപ്പോലീത്തയുമായ ആബൂൻ മോർ ബസേലിയോസ് ജോസഫ് ബാവ, ചർച്ച് ഓഫ് ഇംഗ്ലണ്ടിന്റെ പരമാധ്യക്ഷയും ആർച്ച് ബിഷപ്പ് ഓഫ് കാന്റർബറിയുമായ മോസ്റ്റ് റവ. സാറാ മുള്ളലിയെ ലണ്ടനിലെ ഔദ്യോഗിക വസതിയായ ലാമ്പത്ത് പാലസിൽ സന്ദർശിച്ച് സൗഹൃദ കൂടിക്കാഴ്ച നടത്തി.സഭാചരിത്രത്തിനും സഭൈക്യ ബന്ധങ്ങൾക്കും പ്രാധാന്യമേകിയ കൂടിക്കാഴ്ചയിൽ, 1876-ലെ മുളന്തുരുത്തി സുന്നഹദോസിന് മുന്നോടിയായി പരിശുദ്ധ ഇഗ്നാത്തിയോസ് പത്രോസ് തൃതീയൻ പാത്രിയർക്കീസ് ബാവ നടത്തിയ ചരിത്രപ്രസിദ്ധമായ ലണ്ടൻ സന്ദർശനവും ബ്രിട്ടീഷ് രാജ്ഞി വിക്ടോറിയയുമായുള്ള കൂടിക്കാഴ്ചയും അനുസ്മരിച്ചു. സത്യവിശ്വാസ സംരക്ഷണം, വിദ്യാഭ്യാസ രംഗത്തെ പുരോഗതി, അച്ചടി-പ്രസാധന മേഖലയിലെ നവീകരണം എന്നിവയ്ക്കായി പരിശുദ്ധ പാത്രിയർക്കീസ് ബാവ നടത്തിയ ദീർഘവീക്ഷണമാർന്ന പ്രവർത്തനങ്ങൾ ഇരുസഭാ നേതാക്കളും പ്രത്യേകം ചർച്ച ചെയ്തു.ആധുനിക ലോകത്തിൽ ക്രൈസ്തവ സഭകൾ അഭിമുഖീകരിക്കുന്ന വെല്ലുവിളികൾ, ക്രൈസ്തവ സാക്ഷ്യത്തിന്റെ പ്രസക്തി, സമൂഹത്തിലെ സമാധാനവും നീതിയും മാനവിക മൂല്യങ്ങളും സംരക്ഷിക്കുന്നതിൽ സഭകൾക്കുള്ള ഉത്തരവാദിത്വം, സഭകൾ തമ്മിലുള്ള പരസ്പര സഹകരണവും എക്യുമെനിക്കൽ ബന്ധങ്ങളും കൂടുതൽ ശക്തിപ്പെടുത്തേണ്ടതിന്റെ ആവശ്യകത എന്നിവയും കൂടിക്കാഴ്ചയിലെ പ്രധാന ചർച്ചാവിഷയങ്ങളായിരുന്നു.ക്രിസ്തുവിന്റെ സ്നേഹത്തിലും സുവിശേഷ സാക്ഷ്യത്തിലും അധിഷ്ഠിതമായ ഐക്യവും സഹകരണവും ലോകമെമ്പാടുമുള്ള ക്രൈസ്തവ സമൂഹത്തിന്റെ ശക്തിയാണെന്നും, ചരിത്രപാരമ്പര്യങ്ങളെ മാനിച്ചുകൊണ്ട് ഭാവിയിലേക്കുള്ള സംയുക്ത പ്രവർത്തനങ്ങൾക്ക് ഇത്തരത്തിലുള്ള കൂടിക്കാഴ്ചകൾ കൂടുതൽ കരുത്തേകുമെന്നും ഇരുനേതാക്കളും അഭിപ്രായപ്പെട്ടു.കൂടിക്കാഴ്ചയിൽ ബിഷപ്പ് ഓഫ് സൗത്വർക്ക് റൈറ്റ് റവ. ക്രിസ്റ്റഫർ ചെസ്സൻ, എക്യുമെനിക്കൽ റിലേഷൻസ് അഡ്വൈസർ റവ. ഡോ. മത്തിയാസ് ഗ്രീബ്, ലാമ്പത്ത് പാലസിലെ മറ്റ് ഉദ്യോഗസ്ഥർ എന്നിവരും പങ്കെടുത്തു. ശ്രേഷ്ഠ കാതോലിക്ക ബാവയ്ക്കൊപ്പമുണ്ടായിരുന്നത് അങ്കമാലി മേഖല മെത്രാപ്പോലീത്ത ഡോ. മാത്യൂസ് മോർ അന്തിമോസ്, ലണ്ടൻ സെന്റ് തോമസ് യാക്കോബായ സുറിയാനി പള്ളി വികാരി റവ. ഫാ. ഗീവർഗീസ് തണ്ടായത്ത്, സെക്രട്ടറി ബേസിൽ ജോൺ, കോർഡിനേറ്റർ മാത്യൂസ് ജേക്കബ് എന്നിവരായിരുന്നു. ചരിത്രസ്മരണകൾ പുതുക്കിക്കൊണ്ട് സഭൈക്യത്തിനും ക്രൈസ്തവ സഹകരണത്തിനും പുതിയ ദിശാബോധം നൽകുന്ന ശ്രദ്ധേയമായ കൂടിക്കാഴ്ചയായാണ് ഈ സന്ദർശനത്തെ സഭാ വൃത്തങ്ങൾ വിലയിരുത്തുന്നത്.

Comments (0)

Related Stories