മണർകാട് കത്തീഡ്രലിൽ ഇന്ന് കോർ എപ്പിസ്കോപ്പ സ്ഥാനാരോഹണം: വന്ദ്യ കുര്യാക്കോസ് കാലായിൽ കശ്ശീശയെ ഇന്ന് കോർ എപ്പിസ്കോപ്പ പദവിയിലേക്ക് ഉയർത്തും.

മണർകാട് ● മലങ്കര യാക്കോബായ സുറിയാനി ഓർത്തഡോക്സ് സഭയുടെ ആഗോള മരിയൻ തീർത്ഥാടന കേന്ദ്രമായ മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിലെ സഹവികാരിയായ വന്ദ്യ കുര്യാക്കോസ് കാലായിൽ കശ്ശീശ ഇന്ന് കോർ എപ്പിസ്കോപ്പ പദവിയിലേക്ക് ഉയർത്തപ്പെടും. പരിശുദ്ധ അന്ത്യോഖ്യാ സിംഹാസനാധിപനും ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷനുമായ പരിശുദ്ധ മോറാൻ മോർ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവായുടെ അനുഗ്രഹകൽപ്പനപ്രകാരം, കോട്ടയം ഭദ്രാസനാധിപനും ഇടവക മെത്രാപ്പോലീത്തയുമായ അഭിവന്ദ്യ ഡോ. തോമസ് മോർ തീമോത്തിയോസ് മെത്രാപ്പോലീത്തയുടെ തൃക്കരങ്ങളാലാണ് സ്ഥാനാരോഹണ ശുശ്രൂഷകൾ നടക്കുന്നത്. മണർകാട് കത്തീഡ്രലിന്റെ ആത്മീയ-ഇടയശുശ്രൂഷകളിലും ഇടവകയുടെ ആരാധനാ, ഭരണ, സാമൂഹിക പ്രവർത്തനങ്ങളിലും ദീർഘകാലമായി ശ്രദ്ധേയമായ സേവനം അനുഷ്ഠിച്ചുവരുന്ന ഫാ. കുര്യാക്കോസ് കാലായിലിന് ലഭിക്കുന്ന കോർ എപ്പിസ്കോപ്പ പദവി, അദ്ദേഹത്തിന്റെ സമർപ്പിതമായ പൗരോഹിത്യ ജീവിതത്തിനുള്ള സഭയുടെ ആദരവും അംഗീകാരവുമായാണ് വിലയിരുത്തപ്പെടുന്നത്. വിശുദ്ധ ശുശ്രൂഷകളിൽ സഭയിലെ അഭിവന്ദ്യ മെത്രാപ്പോലീത്തമാർ, വൈദികർ, സന്യാസിമാർ, വിവിധ ഭദ്രാസനങ്ങളിൽ നിന്നുള്ള വിശ്വാസികൾ എന്നിവർ പങ്കെടുക്കും. മണർകാട് കത്തീഡ്രലിന്റെയും കോട്ടയം ഭദ്രാസനത്തിന്റെയും ആത്മീയ ജീവിതത്തിൽ ശ്രദ്ധേയമായ നാഴികക്കല്ലായി മാറുന്ന ഈ സ്ഥാനാരോഹണ ചടങ്ങിൽ വിശ്വാസികൾ വലിയ തോതിൽ പങ്കെടുക്കുമെന്ന് സംഘാടകർ അറിയിച്ചു.

Comments (0)

Related Stories