കനാൻ സീനിയർ ലിവിംഗ് ഹോം ജൂലൈ 18-ന് സമർപ്പിക്കും; ശ്രേഷ്ഠ കാതോലിക്ക ബാവ മന്ദിരകൂദാശ നിർവഹിക്കും

കോട്ടയം ● പരിശുദ്ധ യാക്കോബായ സുറിയാനി ക്രിസ്ത്യാനി സഭയുടെ നിയന്ത്രണത്തിൽ പ്രവർത്തിക്കുന്ന മോർ അന്തോണിയോസ് ഇവാഞ്ചലിക്കൽ മിഷൻ (AEM) ട്രസ്റ്റിന്റെ ആഭിമുഖ്യത്തിൽ നിർമ്മിച്ച കനാൻ സീനിയർ ലിവിംഗ് ഹോം ജൂലൈ 18-ന് ഉദ്ഘാടനം ചെയ്യും. മുതിർന്ന പൗരന്മാർക്ക് സുരക്ഷിതവും സ്നേഹപൂർണവും ആത്മീയാന്തരീക്ഷമുള്ള താമസസൗകര്യം ഒരുക്കുകയെന്ന ലക്ഷ്യത്തോടെയാണ് ഈ ജീവകാരുണ്യ സംരംഭം യാഥാർഥ്യമായിരിക്കുന്നത്. സാന്ത്വനത്തിന്റെയും കാരുണ്യസേവനത്തിന്റെയും പുതിയ അധ്യായത്തിന് തുടക്കം കുറിച്ചുകൊണ്ട് 2026 ജൂലൈ 18 ശനിയാഴ്ച വൈകുന്നേരം 4 മണിക്ക് നടക്കുന്ന ചടങ്ങിൽ കനാൻ സീനിയർ ലിവിംഗ് ഹോമിന്റെ മന്ദിരകൂദാശയും, വിവിധ ജീവകാരുണ്യ പദ്ധതികളുടെ ഉദ്ഘാടനവും നടക്കും. പരിശുദ്ധ സഭയുടെ ശ്രേഷ്ഠ കാതോലിക്ക ആബൂൻ മോർ ബസേലിയോസ് ജോസഫ് ബാവ മന്ദിരകൂദാശ കർമം നിർവഹിക്കും. തുടർന്ന് കേരള മുഖ്യമന്ത്രി ശ്രീ. വി.ഡി. സതീശൻ കനാൻ സീനിയർ ലിവിംഗ് ഹോം ഉദ്ഘാടനം ചെയ്യും. കേരള നിയമസഭാ സ്പീക്കർ അഡ്വ. തിരുവഞ്ചൂർ രാധാകൃഷ്ണൻ വിവിധ ജീവകാരുണ്യ പദ്ധതികൾ ഉദ്ഘാടനം നിർവഹിക്കും. ചടങ്ങിൽ പുതുപ്പള്ളി എം.എൽ.എ ശ്രീ. ചാണ്ടി ഉമ്മൻ മുഖ്യപ്രഭാഷണം നടത്തും. കൂടാതെ വിവിധ രാഷ്ട്രീയ, സാമൂഹിക, മത, സാംസ്കാരിക രംഗങ്ങളിലെ പ്രമുഖർ ചടങ്ങിൽ പങ്കെടുക്കുകയും ആശംസകൾ അർപ്പിക്കുകയും ചെയ്യും. മുതിർന്ന പൗരന്മാർക്ക് സംരക്ഷണവും പരിചരണവും ആത്മീയ പിന്തുണയും ഉറപ്പാക്കുന്ന ഈ സംരംഭം സഭയുടെ ജീവകാരുണ്യ ദൗത്യത്തിലെ സുപ്രധാന നാഴികക്കല്ലായി മാറുമെന്ന് സംഘാടകർ അറിയിച്ചു. വയോജനങ്ങളുടെ അന്തസ്സും സുരക്ഷിതത്വവും ഉറപ്പുവരുത്തുന്നതിനൊപ്പം സ്നേഹത്തിന്റെയും സേവനത്തിന്റെയും ക്രൈസ്തവ മൂല്യങ്ങൾ സമൂഹത്തിലേക്ക് പകർന്നുനൽകുന്ന മാതൃകാ പദ്ധതിയായിരിക്കും കനാൻ സീനിയർ ലിവിംഗ് ഹോമെന്നും അവർ കൂട്ടിച്ചേർത്തു. സ്നേഹത്തിന്റെയും പ്രാർത്ഥനയുടെയും ഈ അനുഗ്രഹീത നിമിഷത്തിന് സാക്ഷ്യം വഹിക്കുന്നതിനായി വിശ്വാസിസമൂഹത്തെയും പൊതുജനങ്ങളെയും ചടങ്ങിലേക്ക് സംഘാടകർ ഹാർദ്ദവമായി ക്ഷണിച്ചിട്ടുണ്ട്.

Comments (0)

Related Stories